ގާސިމްގެ ރަނިން މޭޓާއި ޕާޓީގެ އިސް ބައެއް ބޭފުޅުން އެމްޑީޕީއަށް ސޮއިކުރައްވަނީ
23 ސެޕްޓެމްބަރު 2023 | ހޮނިހިރު 15:53ޖެޕީގެ ގިނަ ބޭފުޅުން ތާއީދުކުރައްވާފައި ވަނީ ރައީސުލްޖުމްހޫރިއްޔާ އަދި ގުޅިފައިވާ ޕާޓީތަކުގެ ރިޔާސީ ކެންޑިޑޭޓް، އިބްރާހީމް މުހައްމަދު ސާލިހަށް
ގާސިމްގެ ރަނިން މޭޓު، ޑރ. އަމީން
މިދިޔަ ރިޔާސީ އިންތިޚާބުގައި ޖުމްހޫރީ ޕާޓީ (ޖޭޕީ)ގެ ޓިކެޓުގައި ވާދަކުރެއްވި، އެ ޕާޓީގެ ލީޑަރު ގާސިމް އިބްރާހީމްގެ ރަނިން މޭޓް އަމީން އިބްރާހީމާއި ޖޭޕީގެ އިސް ބައެއް ފަރާތްތައް އެމްޑީޕީއާ މިރޭ ގުޅިވަޑައިގަތުމަށް ހަމަޖެހިއްޖެއެވެ.
"ރާއްޖެ އެމްވީ"އަށް މައުލޫމާތު ލިބިފައިވާގޮތުގައި މި ރޭ އެމްޑީޕީއާ ގުޅިވަޑައިގަންނަވާ ބޭފުޅުންގެ ތެރޭގައި، ޖޭޕީގެ އިސް ސަފުގައި މަސައްކަތްކުރައްވާ ބޭފުޅުން ހިމެނެއެވެ. މިކަމާގުޅޭ އިތުރު ތަފްސީލްތައް އަދި އެމްޑީޕީން ހާމައެއްނުކުރެއެވެ. ބެލެވޭގޮތުގައި މި ބޭފުޅުން އެމްޑީޕީއަށް ސޮއިކުރައްވާނީ މިރޭ އޮންނަ އެ ޕާޓީގެ ޖަލްސާގައެވެ.
ޖޭޕީގެ އިސް ބޭފުޅުން އެމްޑީޕީއާ ގުޅިވަޑައިގަތުމަށް ނިންމަވާފައި މި ވަނީ ކުރިއަށް އޮތް ރިޔާސީ އިންތިޚާބުގެ ދެވަނަ ބުރުގައި އެއްވެސް ބަޔަކާއެކު މަސައްކަތް ނުކުރުމަށް ޖުމްހޫރީ ޕާޓީން ނިންމާފައިވަނިކޮށެވެ. ނަމަވެސް ޖޭޕީގައި ތިބި ކުރީގެ މަޖިލީހުގެ މެމްބަރުންނާއި ސަރުކާރުތަކުގެ އިސް މަގާމްތައް ފުރުއްވި ގިނަ ބޭފުޅުން ތާއީދުކުރައްވާފައި ވަނީ ރައީސުލްޖުމްހޫރިއްޔާ އަދި ގުޅިފައިވާ ޕާޓީތަކުގެ ރިޔާސީ ކެންޑިޑޭޓް، އިބްރާހީމް މުހައްމަދު ސާލިހަށެވެ. ކުރިއަށް އޮތް ރިޔާސީ އިންތިޚާބަށް ވަމުންދާ ތައްޔާރީތަކުގެ ތެރެއިން އެމްޑީޕީއަށް މެމްބަރުން އިތުރުކުރުމުގެ މަސައްކަތް ދަނީ ކުރަމުންނެވެ.
