މިހާރުގެ ޓްރެންޑަކީ ފާހަގަ މާގަދައަށް ފެވުން، އެގޮތަށް ފާހަގަ ފަވާނަމަ އެއީ ސައްހަ ވޯޓެއްގެ ގޮތުގައި ނުބަލާނެ: އީސީ
23 ސެޕްޓެމްބަރު 2023 | ހޮނިހިރު 07:41ވޯޓު ކަރުދާހުގައި ޖަހާނީ އެންމެ ފާހަގައެއް، އިތުރަށް ފަވާގެން ނުވާނެ
ރިޔާސީ އިންތިޚާބު 2023 ގެ ފުރަތަމަ ބުރުގެ ވޯޓު ގުނުމުގެ މަސައްކަތުގެ ތެރެއިން
މިހާރުގެ ޓްރެންޑަކީ ފާހަގަ މާގަދައަށް ފެވުން ކަމަށާއި، އެގޮތަށް ފާހަގަ ފަވާނަމަ އެއީ ސައްހަ ވޯޓެއްގެ ގޮތުގައި ނުބަލާނެ ކަމަށް އިލެކްޝަން ކޮމިޝަން (އީސީ) އިން ބުނެފިއެވެ.
ހޮނިހިރު ދުވަހު އީސީގައި ބޭއްވި ނޫސްވެރިންގެ ބައްދަލުވުމުގައި އީސީގެ ނައިބުރައީސް އިސްމާއީލް ހަބީބް ވިދާޅުވީ ރިޔާސީ އިންތިޚާބުގެ ފުރަތަމަ ބުރުގެ ބާތިލް ވޯޓާއި ސައްހަ ވޯޓު ކަނޑައެޅުމުގައި ބައެއް އޮފިޝަލުން އަމަލުކޮށްފައިވަނީ އެކި ގޮތަށް ކަން ފާހަގަކުރެވިފައިވާ ކަމަށެވެ. ހަބީބު ވިދާޅުވީ މޮނިޓަރުންނާއި އޮބްޒާވަރުންގެ ނުފޫޒާ ހެދި ސައްހަ ވޯޓު ބާތިލް ވޯޓަކަށް ބަދަލުކުރުމުގެ ކަންކަން ހިނގާފައިވާ ކަމަށެވެ. އަދި މި މައުލޫމާތުގެ މައްޗަށް ބިނާކޮށް ވޯޓު މަރުކަޒުތަކުގައި މަސައްކަތް ކުރާ އޮފިޝަލުންނަށް ޚާއްސަކޮށްގެން ރިފްރެޝަރ ޓްރެއިނިންގ ޕްރޮގްރާމްގައި ބާތިލް އަދި ސައްހަ ވޯޓު ކަނޑައެޅުމުގައި އަމަލުކުރާނެ ގޮތް ވަރަށް ތަފްސީލުކޮށް ކިޔައިދެމުންދާ ކަމަށާއި، ވަރަށް ރަނގަޅަށް ތަމްރީން ކުރަމުންދާ ކަމަށް ހަބީބު ވިދާޅުވިއެވެ.
މީގެ ކުރީގެ އިންތިޚާބުތަކުގައި ހިނގާފައިވާ ކަންތައްތަކަށް އިޝާރާތް ކުރައްވައި ހަބީބު ވިދާޅުވީ ވޯޓު ކަރުދާހުގައި ކުރީގައި ދެ ފާހަގަ ޖެހުމާއި، އެކި ކުލަކުލައިގެ ފާހަގަ ޖެހުން ވަރަށް ބޮޑަށް އާއްމުވި ކަމަށެވެ. އެއީ ބާތިލް ވޯޓުގެ ގޮތުގައި ގާނޫނުން ވެސް ކަނޑައަޅާފައިވާ ކަމަށް ހަބީބު ވިދާޅުވިއެވެ. އަދި ވިދާޅުވީ މިހާރުގެ ޓްރެންޑަކީ މާގަދައަށް ފާހަގަ ފެވުން ކަމަށާއި، އެގޮތަށް ފާހަގަ ފަވާނަމަ އެއީ ސައްހަ ވޯޓެއްގެ ގޮތުގައި ނުބަލާނެ ކަމަށެވެ.
ހަބީބު ވިދާޅުވީ ވޯޓު ކަރުދާހުގައި ޖަހާނީ އެންމެ ފާހަގައެއް ކަމަށާއި، އިތުރަށް ފާހަގަ ފަވައިގެން ނުވާނެ ކަމަށެވެ.
ރިޔާސީ އިންތިޚާބުގެ 2023 ގެ ފުރަތަމަ ބުރުގެ ރަސްމީ ނަތީޖާއަށް ބަލާލާއިރު އިންތިޚާބުގައި ވޯޓުލާފައިވަނީ ވޯޓުލުމުގެ ހައްގު ލިބިފައިވާ 282،395 މީހުންގެ ތެރެއިން 225،486 މީހުންނެވެ. އެއީ 79.85 އިންސައްތައެވެ. އިންތިޚާބުގެ ނަތީޖާ ދައްކާގޮތުން 4،835 ވޯޓަކީ ބާތިލު ވޯޓެވެ. އަދި ޞައްހަ ވޯޓުގެ އަދަދަކީ 220،651 އެވެ.
އިންތިޚާބުގެ ނަތީޖާދައްކާގޮތުން އެއްވެސް ކެންޑިޑޭޓަކަށް ވޯޓުގެ 50 އިންސައްތަ ލިބިވަޑައިގެންފައިނުވާތީ މިމަހުގެ 30 ވަނަ ދުވަހު ވޯޓުގެ ދެވަނަ ބުރެއް ބޭއްވުމަށް ވަނީ ހަމަޖެހިފައެވެ. ދެވަނަ ބުރުގައި ވާދަކުރައްވާނީ އެންމެ ގިނައިން ވޯޓު ލިބިވަޑައިގެންނެވި ޕީއެންސީގެ ކެންޑިޑޭޓް ޑރ މުހައްމަދު މުއިއްޒު އާއި އެމްޑީޕީގެ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހެވެ.
އީސީން ބުނީ އިންތިޚާބަށް ވަރަށް ބޮޑަށް ތައްޔާރުވެފައިވާ ކަމަށެވެ. ސުލްހަވެރިކަމާއެކު އިންތިޚާބުގެ އެންމެހައި ކަންކަން ކުރިއަށް ގެންދިއުމުގައި އާއްމު ރައްޔިތުންގެ ފުރިހަމަ އެއްބާރުލުން ބޭނުންވާ ކަމަށް ކޮމިޝަނުން ބުނެއެވެ.
