ޝީ އާއި އަސަދު ޗައިނާގައި ބައްދަލު ކުރައްވައިފި

ޗައިނާގެ ރައީސް ޝީ ޖިންޕިން އާއި ސޫރިއާގެ ރައީސް ބައްޝާރުލް އަސަދު ހުކުރު ދުވަހު ޗައިނާގައި ބައްދަލު ކުރައްވައިފިއެވެ.

މިބައްދަލު ކުރެއްވުމަށްފަހު ދެ ގައުމުގެ ދެމެދުގައި އެކުލަވާލާ އާ "ސްޓްރެޓެޖިކް ޕާޓްނަރޝިޕެއް" ހާމަކުރައްވާނެ ކަމަށް ބައިނަލް އަގުވާމީ މީޑިއާތަކުން ވަނީ ރިޕޯޓްކޮށްފައެވެ.

އަސަދު ޗައިނާއަށް ކުރައްވާ ރަސްމީ ދަތުރުފުޅަކީ ގާތްގަނޑަކަށް ފާއިތުވީ ދެ އަހަރު ތެރޭގައި ޗައިނާއަށް އޭނާ ކުރައްވާ ފުރަތަމަ ރަސްމީ ދަތުރުފުޅެވެ.

ޗައިނާގެ ދައުލަތުގެ މީޑިއާއިން ހާމަކޮށްފައިވާ ގޮތުގައި ހޮނިހިރު ދުވަހު ޗައިނާގެ ހަންގްޒޫގައި ބާއްވާ 19 ވަނަ އޭޝިއަން ގޭމްސް ފެށުމުގެ ރަސްމިއްޔާތުގައި އަސަދު ބައިވެރިވެވަޑައިގަންނަވާނެ އެވެ.

ޝީ އާއި އަސަދު ބައްދަލުކުރެއްވީ ހުކުރު ދުވަހުގެ މެންދުރު ފަހު ޗައިނާގެ އިރުމަތީ ސިޓީގައި ކަމަށް ޗައިނާގެ ދައުލަތުގެ މީޑިއާއިން ބުނެއެވެ.

ޗައިނާގެ ދައުލަތުގެ ބްރޯޑްކާސްޓަރު ސީސީޓީވީން ނެރުނު ރީޑްއައުޓެއްގައި ވާގޮތުން ޗައިނާ-ސީރިއާ ސްޓްރެޓެޖިކް ޕާޓްނާޝިޕް އުފައްދަން ދެ ލީޑަރުން މަޝްވަރާ ކުރައްވާފައިވާއިރު، މިއީ ދެ ގައުމުގެ ގުޅުމުގެ ތާރީހުގައި ވެސް ވަރަށް މުހިންމު ކާމިޔާބީއަކަށް ވެގެންދާނެއެވެ. ޗައިނާގެ ދައުލަތުގެ ބްރޯޑްކާސްޓަރު ސީސީޓީވީއަށް ދެއްވި އިންޓަވިއުއެއްގައި ޝީ ވިދާޅުވި އެވެ.

އަދި ޒަމާނުއްސުރެ ދެ ގައުމުގެ އެކުވެރިކަން އިތުރަށް ބަދަހިވެފައިވާ ކަމަށް ވެސް އޭނާ ވިދާޅުވި އެވެ.

ސީސީޓީވީ ވީޑިއޯ ކްލިޕުން ފެންނަ ގޮތުގައި ދެލީޑަރުން ބައްދަލު ކުރެއްވި އިރު، ކޮންމެ ގައުމެއްގެ ދިދައެއް މީޓިން ރޫމްގައި ޗައިނާގެ ކުރެހުމެއްގެ ކުރިމަތީގައި ބަހައްޓާފައި ވެއެވެ.  އެ ދެ ބޭފުޅުންގެ ފަހަތްޕުޅުގައި ނުވަ އެހީތެރިން ތިއްބެވީ ބޮޑު އާސާރީ ލަކުޑި މޭޒެއް ކައިރީގަ އެވެ.