ނިޒާމީ ވޯޓާގުޅޭ ޤަރާރާމެދު އީސީން ޤާނޫނީ ލަފާ ހޯދަނީ
އީސީން ބުނީ، އެ ގަރާރު، އިލެކްޝަންސް ކޮމިޝަނަށް ބުރާސްފަތި ދުވަހު ލިބިފައިވާ ކަމަށް
އީސީން ބުނީ އެ ގަރާރު، އިލެކްޝަންސް ކޮމިޝަނަށް ބުރާސްފަތި ދުވަހު ލިބިފައިވާ ކަމަށް
ދިވެހިރާއްޖޭގައި މިހާރު އޮތް ވެރިކަމުގެ ނިޒާމު ބަދަލުކުރުމާ ގުޅޭގޮތުން، ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމަށް، ރައްޔިތުންގެ މަޖިލީހުން ފާސްކޮށްފައިވާ ގަރާރު އިލެކްޝަންސް ކޮމިޝަނަށް ލިބިފައިވާކަމަށް އެ ކޮމިޝަނުން ބުނެފިއެވެ.
އީސީން ބުނީ، އެ ގަރާރު، އިލެކްޝަންސް ކޮމިޝަނަށް ލިބިފައިވަނީ ބުރާސްފަތި ދުވަހު ކަމަށެވެ.
އަދި އެކަމާމެދު، އިލެކްޝަންސް ކޮމިޝަނުން ޢަމަލު ކުރާނޭގޮތުގެ ގާނޫނީ ލަފާ މިހާރު ކޮމިޝަނުން ހޯދަމުންދާކަމަށްވެސް އީސީން މައުލޫމާތުދެއެވެ.
ވެރިކަމުގެ ނިޒާމު ބަދަލު ކުރުމަށް ފެންނަ ނުފެންނަ ވޯޓެއް ނެގުމާއި ގުޅޭ ޤަރާރަށް މުޅި މަޖިލީހުގެ ކޮމިޓީން ގެނައި އިސްލާޙުތަކާއެކު ބުދަ ދުވަހުގެ ޖަލްސާގައި ވަނީ ފާސްކޮށްފައެވެ. އެގޮތުން އެ ޤަރާރުގައި ވަނީ އޮކްޓޫބަރު މަހުގެ 30 ގެ ކުރިން ވެރިކަމުގެ ނިޒާމު ބަދަލުކުރުމަށް ފެންނަ ނުފެންނަ ވޯޓު ނެގުމަށެވެ.
ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބު ހުށައެޅުއްވި މި ޤަރާރުގައި ޑިމޮކްރެޓްސް އިން ވަކާލާތު ކުރަމުން އަންނަނީ ރާއްޖޭގެ ވެރިކަމުގެ ނިޒާމު ބަރުލަމާނީއަށް ބަދަލުކުރަން ޖެހޭ ކަމަށެވެ.
އެއީ ފެހި ގާނޫނުއަސާސީގެ ދަށުން ރާއްޖޭގައި ބޭއްވި އެއްވެސް ރިޔާސީ އިންތިޚާބެއްގެ ފުރަތަމަ ބުރުން ރައީސަކު އިންތިހާބު ނުވެ، ޕާޓީތަކުން ކޯލިޝަން ހަދަން ޖެހިފައިވާއިރު ކޯލިޝަން ހެދުމަކީ ބަރުލަމާނީ ސިފަޔަކަށް ވުމެވެ.
އަދި 30 އޮކްޓޯބަރުގެ ކުރިން އެކަމާއި ގުޅޭ ވޯޓު ނެގުމަކީ އާއްމުންނަށް އެންމެ ރަނގަޅު ގޮތް ކަމަށް ވެސް އިލްޔާސް ވަނީ ވިދާޅުވެފައެވެ.
