ޖަރުމަނުގެ ނޫސްތަކުން ބުނަނީ ކުޅެން ފުރުސަތު ނުދޭނަމަ ޑިލިޓް ކުލަބު ބަދަލުކޮށްފާނެ ކަމަށް
ކޯޗު ޓުޗެލް އާއި ޑިލިޓް ވާހަކަ ދައްކަނީ: އޭނާ ލައްވައި މިހާރު ކުޅުވަނީ މެދުތެރެއަށް
ބަޔާން މިއުނިކްގައި މިދިޔަ ސީޒަނުގައި އެންމެ ރަނގަޅަށް ކުޅުނު އެއް ކުޅުންތެރިޔަކީ ނެދަލޭންޑްސްގެ ޑިފެންޑަރު މަތިއަސް ޑިލިޓެވެ. ސީޒަނުގެ މެދުތެރެއިން ޓީމުން ވަކިކުރި ކޯޗު ހޫލިއަން ނާގެލްސްމަންގެ ކޯޗުކަމުގައި އޭނާ އަކީ ޓީމުގެ މައި އެއް ތަނބެވެ. ނަމަވެސް މިހާރުގެ ކޯޗު ތޯމަސް ޓުޗެލްގެ ކޯޗުކަމުގައި މި ސީޒަނުގައި ޑިލިޓަށް ދަނޑޫމަތީގައި ލިބެނީ މަދުވަގުތުކޮޅެކެވެ. އޭނާގެ ރޯލު ވެސް ބަދަލުވެއްޖެ އެވެ.
ސެންޓްރަލް ޑިފެންޑަރަކަށް ކުޅުނު ކުޅުންތެރިޔާ އެންމެ ފަހުން ކުޅުނު ދެ މެޗުގައި ވެސް ފެނުނީ ޑިފެންސިވް މިޑްފީލްޑަރަކެވެ. މިކަންކަމާ ބެހޭ ގޮތުން ޖަރުމަނުގެ ނޫސްވެރިން ސުވާލުކުރުމުން އޭނާ ބުނީ "އަހަރެންގެ ވަޒީފާ އަކީ ކޯޗު ބުނާ ގޮތަކަށް މަސައްކަތްކުރުން،" ކަމަށެވެ.
އޭނާ ބުނީ ފަހަތުން މެދަށް ބަދަލުކުރި ނަމަވެސް މައްސަލައެއް ނެތް ކަމަށެވެ.
ޖަރުމަނުގެ ނޫސްތަކުން ބުނަނީ ގިނަ ވަގުތު ބެންޗުގައި އިންނަން ވެއްޖެނަމަ ޑިލިޓް މާޔޫސްވާނެ ކަމަށާއި ނަތީޖާއަކަށްވާނީ އޭނާ ކުލަބު ދޫކޮށްލުން ކަމަށެވެ.
