ކ. މާލެ
|
17 ސެޕްޓެންބަރ 2023 | އާދީއްތަ 07:38
ސްޕެނިޝް ލީގުގައި އެތުލެޓިކޯއާ ދެކޮޅަށް ކުޅުނު މެޗުގައި ލަނޑު ޖެހުމަށްފަހު ވެލެންސިއާގެ ކުޅުންތެރިން އުފާ ފާޅުކުރަނީ
ސްޕެނިޝް ލީގުގައި އެތުލެޓިކޯއާ ދެކޮޅަށް ކުޅުނު މެޗުގައި ލަނޑު ޖެހުމަށްފަހު ވެލެންސިއާގެ ކުޅުންތެރިން އުފާ ފާޅުކުރަނީ
ރޮއިޓާސް
ސްޕެނިޝް ލީގު
ވެލެންސިއާ އިން އެތުލެޓިކޯ ބަލިކޮށްފި
 
މިއީ މި ސީޒަންގެ ލީގުގައި އެތުލެޓިކޯގެ ފުރަތަމަ ބަލި

ސްޕެނިޝް ލީގުގައި އެތުލެޓިކޯ މެޑްރިޑާ ދެކޮޅަށް ކުޅުނު މެޗު ވެެލެންސިއާ އިން ކާމިޔާބު ކޮށްފި އެވެ.

ހޮނިހިރު ދުވަހުގެ ރޭ ވެލެންސިއާގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ވެސް ވެލެންސިއާ އިން ވަނީ ދެ ލަނޑު ޖަހައި، މެޗުގެ ކޮންޓްރޯލް ނަގައިފަ އެވެ. އެ ޓީމުގެ އަނެއް ލަނޑު ޖެހީ ދެ ވަނަ ހާފުގަ އެވެ.

Advertisement

މެޗު ފަށައިގެން ފަސް ވަނަ މިނެޓުގައި ވެލެންސިއާ އަށް ލީޑު ނަގައިދިނީ ހޫގޯ ޑޫރޯ އެވެ. އެއީ ވެލެންސިއާގެ ސާޖީ ކާނޯސް ހުރަސްކޮށްދިން ބޯޅައެއް، އެތުލެޓިކޯގެ ޑިފެންޑަރެއްގެ ފައިގައި ޖެހި އޭނާ އަށް ލިބުނު ގޯލަށް ވައްދާލައިގެން ޑޫރޯ ޖަހައިދިން ލަނޑެކެވެ. އޭގެ ފަހުން މެޗުގެ 34 ވަނަ މިނެޓުގައި ވެލެންސިއާގެ ދެ ވަނަ ލަނޑު ޖެހީ ވެސް ޑޫރޯ އެވެ. އެ ލަނޑު އޭނާ ޖެހީ ފްރަން ޕެރޭޒް ތަނަވަސްކޮށްދިން ފުރުސަތެއްގަ އެވެ. މެޗުގައި ވެލެންސިއާގެ ތިން ވަނަ ލަނޑު ހާވިއާ ގުއެރާ މޮރޭނޯ ޖެހީ 54 ވަނަ މިނެޓުގަ އެވެ. އެ ލަނޑު އޭނާ ޖެހީ ޑިފެންޑަރު ތިއެރީ ކޮރެއާ ތަނަވަސްކޮށްދިން ފުރުސަތެއްގަ އެވެ.

މިއީ މި ސީޒަންގެ ލީގުގައި އެތުލެޓިކޯގެ ފުރަތަމަ ބައްޔެވެ. މިހާތަނަށް އެތުލެޓިކޯ އިން ހަތަރު މެޗު ކުޅެފައިވާއިރު، އެ ޓީމު ވަނީ ދެ މެޗުން މޮޅުވެ، އެއް މެޗުން އެއްވަރުވެފަ އެވެ. އަނެއް މެޗުން ބަލިވީ އެވެ. ހަތް ޕޮއިންޓާއެކު އެތުލެޓިކޯ އޮތީ ހަތް ވަނައިގަ އެވެ. އަނެއްކޮޅުން މިއީ ލީގުގައި ވެލެންސިއާ އިން ކުޅުނު ފަސް ވަނަ މެޗެވެ. ފަސް މެޗުގެ ތެރެއިން އެ ޓީމު މޮޅުވެފައި ވަނީ ތިން މެޗުންނެވެ. ދެ މެޗުން ވަނީ ބަލިވެފަ އެވެ. ނުވަ ޕޮއިންޓާއެކު ވެެލެންސިއާ އޮތީ ފަސް ވަނައިގަ އެވެ.

Advertisement
އެންމެ ފަހުން އަޕްޑޭޓް ކުރީ: 3 މަސް ކުރިން
ރިވިއު ކުރީ: މަރްޔަމް ދާނިޝް ނަޝީދު
0%
0%
0%
0%
0%
0%
ކޮމެންޓް