ރިޔާސީ އިންތިޚާބުގައި ޓުއަރިޒަމް އެމްޕްލޯއީސް އެސޯސިއޭޝަން އޮފް މޯލްޑިވްސް (ޓީމް)އިން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ތާއީދުކުރާކަމަށް ބުނެ ބަޔާން ނެރުނީ ޓީމުގެ ސެކެޓްރީ ޖެނެރަލް މައުރޫފް ޒާކިރު 6 މިލިއަން ރުފިޔާ ނަންގަވައިގެން ކަމަށް ދައްކާ ވާހަކަތަކަށް އޭނާ ރައްދުދެއްވައިފިއެވެ.

ރައީސަށް ތާއީދުކުރެއްވުމަށް މައުރޫފް 6 މިލިއަން ރުފިޔާ ނެންގެވިކަމަށް ބުނެ އެ ޚަބަރު ޝާއިއުކޮށްފައިވަނީ ދިޔަރެސް ނޫހުގައެވެ. އެކަމާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ސުވާލެއް ދެންނެވުމުން މައުރޫފް ވިދާޅުވީ އެއީ ދޮގުވާހަކައެއްކަމަށާއި އެފަދަ ޚަބަރެއް ދިޔަރެސް އިން ފެތުރީތީ އެކަމާއި ހިތާމަކުރައްވާކަމަށެވެ. މައުރޫފް ވިދާޅުވީ ޓޫރިޒަމް ދާއިރާގެ މަސައްކަތްތެރިންގެ ހައްގުގައި އެފަދަ އެއްވެސް ކަމެއް ކުރައްވާފައިނުވާނެކަމަށެވެ.

ޕްރޮގްރާމްގެ ވާހަކަފުޅު ދައްކަވަމުން މައުރޫފް ވިދާޅުވީ އެފަދަ ވާހަކަތައް ފެތުރުމުގެ މައިގަނޑު މަގްސަދަކީ މައުރޫފް އާއި މައުރޫފްގެ ލީޑަރޝިޕާއި ޓޫރިޒަމް ދާއިރާގައި ތިބި މަސައްކަތްތެރިންނާ ޖެއްސުންކަމަށެވެ. އެ ނަތީޖާ ނެރުމަށްޓަކައި ބަޔަކު ގަސްތުގައި އެވާހަކަތައް ދައްކާފައިވާކަމަށް މައުރޫފް ވިދާޅުވިއެވެ.

މައުރޫފް ވިދާޅުވީ ޓީމުން ކޮންމެ ކަމެއްވެސް ނިންމާނީ މެންބަރުންނާއި ލީޑަރޝިޕާއި އެގްޒެކެޓިވް ކޮމިޓީއާ މަޝްވަރާކުރެވި އަގްލަބިއްޔަތަށް ފެންނަ ގޮތަށްކަމަށެވެ.

މައުރޫފް ވިދާޅުވީ ޓޫރިޒަމް ދާއިރާގެ ހައްގުގައި އެދާއިރާގައި މަސައްކަތްކުރާ މުވައްޒަފުންގެ ހައްގުގައި މީގެކުރިން ޕީޕީއެމް ސަރުކާރެއްގައި އަކުރެއްވެސް ފިއްޔެއްވެސް އަޅުއްވާފައިނުވާކަމަށެވެ. ނަމަވެސް މި ސަރުކާރުން މިނިމަމް ވޭޖް ތަޢާރަފްކޮށް ސަރވިސް ޗަރޖް 10 އިންސައްތައަށް ބަދަލުކޮށް ގާނޫނުން އެކަން ލާޒިމްކޮށްފައިވާކަމަށް މައުރޫފް ވިދާޅުވިއެވެ.

އެބަދަލު ނުގެނައިނަމަ ޓެކްސް ބޮޑުވެގެން އައިއިރު މުވައްޒަފުންނަށް ލިބޭ ސަރވިސް ޗަރޖު ކުޑަކުރުމުގެ ފުރުސަތު ވަރަށް ބޮޑަށް އޮތްކަމަށް މައުރޫފް ވިދާޅުވިއެވެ. މައުރޫފް ވިދާޅުވީ މި ސަރުކާރުން ރިސޯޓް މުވައްޒަފުންގެ ވަރަށް ގިނަ ކަންކަމަށް ބޭނުންވި ހައްލުތައް ގެނެސްދީފައިވާކަމަށާއި ކުރިޔަށް އޮތް ދައުރުގައި ސިޔާސަތުތައް ބައްޓަންކޮށްފައިވަނީ ވެސް ދާއިރާގެ މުވައްޒަފުންގެ މަޝްވަރާގެ މަތިންކަމަށެވެ.