ވިޔަފާރިވެރިންނަށް މާލެއިން ބިން ދޫކުރަމުންދަނީ ވެސް ބޮޑު އަގުގައި، ރިޝްވަތަށް ފައިސާ ނެގުމަށްފަހު
ޑރ. މުހައްމަދު މުއިއްޒު އަދި ކުރީގެ ރައީސް ޔާމީން
އިދިކޮޅު ރިޔާސީ ކެންޑިޑޭޓު ޑރ. މުހައްމަދު މުއިއްޒު, މާލެ ސިޓީ ކައުންސިލްގެ ތެރޭގައި ކޮރަޕްޝަންގެ ގިނަ އަމަލުތައް ހިންގަވާފައި ވާކަމަށާއި، އެކަން ސާބިތުކޮށްދެއްވޭ ވަރަށް ހެކި އެބަހުރި ކަމަށް، ކެނދިކުޅުދޫ ދާއިރާގެ މެންބަރު އަހުމަދު އީސާ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި މެންބަރު ވިދާޅުވީ، އިދިކޮޅު ކެންޑިޑޭޓު ޑރ. މުއިއްޒުގެ ލީޑަރޝިޕެއް ނުހުންނާނެ ކަމަށާއި، ރައްޔިތުން އެދޭފަދަ ލީޑަރޝިޕެއް ހުރީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ކަމަށެވެ. ފާއިތުވި އަހަރުތަކުން، ދެބޭފުޅުންގެ މަސައްކަތްޕުޅުތައް މިނެކިރާލެވޭނެ ކަމަށް މެންބަރު ވިދާޅުވިއެވެ.
ޑރ. މުއިއްޒުއަށް އިޝާރާތްކުރައްވައި މެންބަރު އަހުމަދު އީސާ ވިދާޅުވީ، މާލޭގެ މަގުތަކުން ގޮޅިތައް އާއްމު ރައްޔިތުންނަށް ވިއްކަމުން ދަނީ އެއްލައްކަ ނުވަތަ ދެލައްކައިން ރުފިޔާ ނެގުމަށްފަހު ކަމަށާއި، އެފައިސާއަށް ވާނުވާ ނޭނގޭ ކަމަށެވެ. އަދި ވިޔަފާރިވެރިންނަށް މާލެއިން ބިން ދޫކުރަމުން ދަނީވެސް ބޮޑު އަގުގައި ރިޝްވަތަށް ފައިސާ ނެގުމަށްފަހު ކަމަށް މެންބަރު ވިދާޅުވިއެވެ. އަދި ވިދާޅުވީ މިކަންކަން ސާބިތުކޮށްދެވޭވަރަށް ހެކި އެބަހުރި ކަމަށާއި، ވިޔަފާރިވެރިންގެ އޯޑިއޯތައް އެބަހުރި ކަމަށެވެ.
މެންބަރު ވިދާޅުވީ ސިޓީ ކައުންސިލްގައި މަސައްކަތްކުރާ ބައެއް މެންބަރުން ޑރ. މުއިއްޒުގެ ކޮރަޕްޝަންގެ މައުލޫމާތު ހިއްސާކުރާ ކަމަށާއި، މޭޔަރުކަމުގެ މަގާމުގައި ހުންނަވައިގެން ކުރެއްވިހާވެސް މަސައްކަތަކީ ރިޝްވަތުގެ ފައިސާ ބެހުމާއި، ބައި އެޅުން ކަމަށް މެންބަރު ވިދާޅުވިއެވެ.
މެންބަރު އަހުމަދު އީސާ ވިދާޅުވީ މާލެސިޓީ ކައުންސިލާ ގުޅުންހުރި ގިނަ މައްސަލަތަކެއް އެންޓި ކޮރަޕްޝަން ކޮމިޝަނަށް ހުށަހަޅާފައި ވާކަމަށެވެ. އަދި މި މައްސަލަތަކުގެ ތަހުގީގުގައި ސުވާލުކޮށްފިނަމަ ހެކި ދައްކަވާނެކަމަށް މެންބަރު ވިދާޅުވިއެވެ.
