އެފްއެސްއެމްއަށް ދެލައްކައަށްވުރެ ގިނަ ރުފިޔާ ދައްކަން އޮއްވާ ޝަހުދީއަށް އެކުންފުނިން ވަޒީފާ ދީފި
ކުންފުނީގެ ޤަވާއިދުތަކާއި އުސޫލުތަކާއި ޚިލާފަށް މިފާއިސާ އެފްއެސްއަށް ދެއްކުމަށް ސެޓްލްމަންޓް އެގްރީމެންޓް އެއް ހަދާފައިވާކަންވެސް އެނގިފައި
އެފްއެސްއެމްގެ މެނޭޖިން ޑިރެކްޓަރ އާޝާން އަދި މުހައްމަދު ޝަހުދީ އަލީ - އެފްއެސްގެ ކޮރަޕްޝަންގެ ގިނަ މައްސަލަތަކެއް ދަނީ ފެންމަތިވަމުން
ފިއުލް ސަޕްލައި މޯލްޑިވްސްއާއި އެކު ވިޔަފާރި ކުރަމުން އަންނަ ފާލްގޯ މޯލްޑިވްސްގެ މެނޭޖިން ޑިރެކްޓަރ މުހައްމަދު ޝަހުދީ އަލީ، އެފްއެސްއެމްއަށް ދެލައްކައަށް ވުރެ ގިނަ ރުފިޔާގެ ފާއިސާ ދައްކަންޖެހިފައިވަނިކޮށް، އެކުންފުނިން އޭނާއަށް ވަޒީފާދިން ކަން ހާމަވެއްޖެ އެވެ.
ރާއްޖެއެމްވީއަށް އިތުބާރު ހުރި މަސްދަރަކުން މައުލޫމާތުދިން ގޮތުގައި ކޯޓް މަރުހަލާގައި މިމައްސަލަ އޮއްވާ ޝަހުދީއަށް ވަޒީފާ ދީފައިވަނީ ފުރަތަމަ އެކުންފުނީގެ އިންޖިނިއަރިންގ ޑިޕާރޓްމަންޓްއިން އޮފިސަރ އެޑްމިނިސްޓްރޭޝަންގެ މަޤާމު އެވެ. އެވަޒީފާ ގައި 15 ދުވަހު ބެހެއްޓުމަށްފަހު މިހާރު އޭނާ ވަނީ އެފްއެސްއެމްގެ ލޮޖިސްޓިކް ޑިޕާރޓްމަންޓަށް ޝެޑިއުލްއިންގ އަށް ބަދަލުކޮށްފަ އެވެ. ލޮޖިސްޓިކް ޑިޕާރޓްމަންޓަށް ބަދަލުކުރި ފަހުންވެސް ތެލުގެ ވަގު ވިޔަފާރި ކުރާ ކަމުގެ ތުހުމަތުވެސް މީނާގެ މައްޗަ ށް ކުރެވޭއިރު، މިއީ ކުންފުނީގެ އިސްވެރިންނަށް ބައި އެޅޭ ގޮތަށް ކުރަމުންދާ ކޮރަޕްޝަނުގެ ބޮޑު އަމަލެއް ކަމަށްވެސް އިތުބާރު ހުރި ފަރާތުން ވަނީ މައުލޫމާތު ހިއްސާކޮށްފަ އެވެ.
އަދި ސާބިތު ދަރަނީގެ މައްސަލައެއް ޝަހުދީގެ މައްޗަށް އޮތް އިރު، ކުންފުނީގެ ޤަވާއިދުތަކާއި އުސޫލުތަކާއި ޚިލާފަށް މިފާއިސާ އެފްއެސްއެމް އަށް ދެއްކުމަށް ސެޓްލްމަންޓް އެގްރީމެންޓް އެއް ހަދާފައިވާކަންވެސް އެނގިފަ އެވެ.
ފެނަކައިގައި ކުރިން މަސައްކަތް ކުރި ޝަހުދީ އެތަނުގެ ވަޒީފާއިން ވަކިކުރިއިރު، ޝަހުދީއަކީ އެފްއެސްއެމްގެ އެމްޑީ އާޝާންއާއި ގާތްގުޅުމެއް އޮންނަ ފަރާތެއް ކަމަށްވަނީ މައުލޫމާތު ލިބިފަ އެވެ.
މިއަހަރުގެ ޖުލައި މަހުގެ ތެރޭގައިވެސް ފިއުލް ސަޕްލައި މޯލްޑިވްސް އިން ޑެލިވަރީ އެޕްއެއް ހަދަން 9 މިލިއަން ރުފިޔާއަށް ބަޔަކާއި ހަވާލުކޮށްފައި ވަނިކޮށް އެސްޓީއޯއިން އެކަން ވަނީ ހުއްޓުވާފަ އެވެ.
އެގޮތުން އެފްއެސްއެމްގެ ޑެލިވަރީ އެޕް ހެދުމަށް ދެ ފަރާތަކުން ޝައުގުވެރިކަން ފާޅުކުރި ކަމަށާއި، އެގޮތުން މި އެޕް ހެދުމަށް އެއް ފަރާތަކުން ހުށަހަޅާފައިވަނީ 2 މިލިއަން ރުފިޔާއަށް ކަމަށްވާއިރު، އަނެއް ފަރާތަކުން ހުށަހަޅާފައިވަނީ 9 މިލިއަން ރުފިޔާ އެވެ.
ރައީސް މުއިއްޒުގެ ސަރުކާރު އައުމަށްފަހު އެފްއެސްއެމްއާއި ގުޅުން ހުރި ތަފާތު ކޮރަޕްޝަންގެ ވާހަކަތަކެއް އަންނަނީ ދެކެވެމުންނެއެވެ. އެގޮތުން މޯލްޑިވްސް ޕޯޓްސް ލިމިޓެޑް (އެމް.ޕީ.އެލް) ގެ އެކިއެކި އޮޕަރޭޝަންތަކަށް ބޭނުންވާ ތެޔޮ، ފިއުލް ސަޕްލައި މޯލްޑިވްސް (އެފް.އެސް.އެމް) މެދުވެރިކޮށް ގަތުމުގައި ހިންގާފައިވާ މުޢާމަލާތްތަކުގައި އެމް.ޕީ.އެލްއާއި އެފް.އެސް.އެމްގެ މުވައްޒަފުންތަކެއް ގުޅިގެން ކޮރަޕްޝަންގެ ޢަމަލުތަކެއް ހިންގައި އެކުންފުނީގެ ފައިސާއަށް ޚިޔާނާތްތެރިވެފައިވާކަމަށް ތުހުމަތުކުރެވޭ މައްސަލައިގައި ދަޢުވާ ކުރުމަށް 27 ފެބްރުއަރީ 2025 ގައި ވަނީ ކްރިމިނަލް ކޯޓަށް ހުށަހަޅާފަ އެވެ.
މީގެ އިތުރުން އެކުންފުނީގެ ކުރީގެ މެނޭޖިންގ ޑިރެކްޓަރ (އެމްޑީ) އިސްމާއިލް ސުހައިލް އާއި ގާތް ގުޅުމެއް އޮންނަ ދެ މީހަކު އެ ކުންފުނީގެ ގުދަނުގައި ހުރި މަސްދަޅުތަކެއް ވަގަށް ނެގި މައްސަލަ އެއް ފެންމަތިވެފައިވާއިރު، ސުހައިލް އަޑީގައި ހުންނަވައިގެން އެކުންފުނީގެ ތެޔޮބޯޓުތަކުން ނުއަގުގައި ތެޔޮ ވިއްކަވައިގެން ކަރަޕްޝަން ހިންގަވާ ކަމުގެ ތުހުމަތު ކުރެވޭ މައްސަލައެއްވެސް ވަނީ ފެންމަތިވެފަ އެވެ.
އެފްއެސްއެމްގެ އެމްޑީގެ މަގާމަށް އާޝާން އައްޔަންކޮށްފައި ވަނީ އެ މަގާމުގައި ހުންނެވި އިސްމާއީލް ސުހައިލް، މިދިޔަ ނޮވެންބަރު 26ގައި އިސްތިއުފާ ދެއްވުމާ ގުޅިގެންނެވެ.
