ރުބިއާލޭސްގެ މައްސަލަ ހައިކޯޓުގައި ފަށައިފި
16 ސެޕްޓެމްބަރު 2023 | ހޮނިހިރު 06:16އޭނާއާ ދެކޮޅަށް އުފުލާފައިވާ ދައުވާއަކީ ޖިންސީ ގޯނާއާއި، މަޖުބޫރުކުރުމުގެ މައްސަލައެއް
ސްޕެއިންގެ މެޑްރިޑުގައި ހުންނަ ހައި ކޯޓުން ރުބިއާލޭސް ނިކުންނަނީ
ސްޕެއިންގެ ފުޓުބޯޅަ ފެޑެރޭޝަންގެ ކުރީގެ ރައީސް ލުއިސް ރުބިއާލޭސްއާ ދެކޮޅަށް އުފުލާފައިވާ ދައުވާގެ އަޑުއެހުންތައް ފަށައިފިއެވެ.
ރުބިއާލޭސްއާ ދެކޮޅަށް އުފުލާފައިވާ ދައުވާގެ އަޑުއެހުންތައް ފަށާފައިވަނީ ހުކުރު ދުވަހުއެވެ. އޭނާއާ ދެކޮޅަށް އުފުލާފައިވާ ދައުވާއަކީ ޖިންސީ ގޯނާއާއި، މަޖުބޫރުކުރުމުގެ މައްސަލައެކެވެ. އެ މައްސަލައިގެ އަޑުއެހުންތައް ފަށާފައިވާއިރު، ހުކުރު ދުވަހު ބޭއްވި އަޑުއެހުމުގައި ރުބިއާލޭސްއާ ދެކޮޅަށް ކުރާ ދައުވާ ވަނީ ސާފުކޮށްދީފައެވެ. އެއަށްފަހު ކުރިއަށް އޮތް ދުވަސްތަކުގެ ތެރޭގައި އިތުރު އަޑުއެހުންތައް ވެސް އޮންނާނެއެވެ. މައްސަލާގައި ރުބިއާލޭސްގެ ވަކީލުން ބުނެފައިވަނީ އެއީ، ގަސްތަކާނުލައި، ޖަޒުބާތީ ވަގުތު ކޮޅެއްގައި ކުރެވުނު ކަމެއް ކަމަށެވެ. ނަމަވެސް ސްޕެއިންގެ ގައުމީ އަންހެން ފުޓުބޯޅަ ޓީމުގައި ހިމެނޭ ފޯވާޑް ޖެނީ ހާމޯސޯގެ ވަކީލުން ބުނަނީ، ރުބިއާލޭސް އެކަން ކޮށްފައިވަނީ ހާމޯސޯގެ ނުރުހުމުގައި، ގަދަކަމުން ކަމަށެވެ.
މިއަހަރު ނިމުނު ފީފާ އަންހެން ވޯލްޑް ކަޕްގެ ފައިނަލަށްފަހު، އިނާމު ދިނުމުގެ ރަސްމިއްޔާތުގައި ރުބިއާލޭސް ވަނީ ހާމޯސޯގެ ތުންފަތަށް ބޮސްދީފައެވެ. އެއާއެކު އެ މައްސަލަ ވަނީ ވަރަށް ބޮޑަށް ހޫނުވެފައެވެ. ސްޕެއިންގެ ވަގުތީ ބޮޑު ވަޒީރު އަދި ސަރުކާރުގެ އިސްވެރިން ވަނީ ރުބިއާލޭސްއާ ދެކޮޅަށް ވާހަކަ ދައްކާފައެވެ. އަދި އެ މައްސަލަ އެންމެ ފުރިހަމައަށް ތަހުގީގު ކުރުމަށްވެސް ގޮވާލާފައެވެ. އެ މައްސަލާގައި މަގާމުން އިސްތިއުފާ ދިނުމަށް އެންމެ ފުރަތަމަ ރުބިއާލޭސް ދެކޮޅުހެދިއެވެ. އެއާއެކު ދުނިޔޭގެ ފުޓުބޯޅައިގެ މައި އިދާރާ (ފީފާ)އިން ވަނީ އޭނާ ސަސްޕެންޑު ކޮށްފައެވެ. އެއަށްފަހު ސްޕެއިންގެ ފުޓުބޯޅަ ފެޑެރޭޝަން ހިންގުން ވަނީ ވަގުތޫ ރައީސަކާ ހަވާލުކޮށްފައެވެ.
ރުބިއާލޭސްއާ ދެކޮޅަށް ސްޕެއިންގައި މުޒާހަރާތައްވެސް ފެށިއެވެ. އެއާއެކު ޕްރެޝަރު ބޮޑުވެ, ފަހުން ރުބިއާލޭސް ވަނީ މަގާމުން އިސްތިއުފާ ދީފައެވެ. ނަމަވެސް، ރުބިއާލޭސް ވަނީ އެންމެ ފުރަތަމަ ދުވަހެކޭ އެއްފަދައިން އޭނާގެ އަމަލު ދިފާއުކޮށްފައެވެ.
