ސްޕެއިންގެ ކޯޗު ފުއެންޓޭ އެއްބަސްވުން އައު ކޮށްފި

ސްޕެއިންގެ ޤައުމީ ފުޓުބޯޅަ ޓީމަށް އިރުޝާދު ދެމުން އަންނަ ލުއިސް ޑި ލާ ފުއެންޓޭ، އެ ޓީމާ އެކު ސޮއި ކޮށްފައިވާ އެއްބަސްވުން އައު ކޮށްފި އެވެ.

އުމުރުން 63 އަހަރުގެ ފުއެންޓޭ ސްޕެއިންގެ ޤައުމީ ޓީމާ ހަވާލުވީ 2022 ވަނަ އަހަރުގެ ޑިސެމްބަރު މަހުގެ ތެރޭގަ އެވެ. އެ މަގާމަށް ފުއެންޓޭ ހަމަޖެއްސީ އޭނާގެ ކުރިން އެ މަގާމުގައި ހުރި ލުއިސް އެންރީކޭ މަގާމުން ވަކިވުމުންނެވެ. ސްޕެއިންގެ ކޯޗުކަމުން އެންރީކޭ ވަކިވީ އެ އަހަރު ޤަތަރުގައި ކުރިއަށް ދިޔަ ފީފާ ވޯލްޑް ކަޕް ފުޓުބޯޅަ މުބާރާތަށްފަހު އެވެ.

އޭގެ ފަހުން 2024 ވަަނަ އަހަރު ފުއެންޓޭ ވަނީ ސްޕެެއިންގެ އެއްބަސްވުން އައު ކޮށްފަ އެވެ. އެ އެއްބަސްވުމުގެ މުއްދަތު ހަމަވާން އޮތީ 2026 ވަނަ އަހަރު އެމެރިކާ، މެކްސިކޯ އަދި ކެނެޑާގައި އޮންނަ ވޯލްޑް ކަޕްގެ ނިޔަލަށެވެ. ނަމަވެސް ސްޕެއިނުން ވަނީ ފުއެންޓޭގެ އެއްބަަސްވުން ދެ އަހަރަށް އިތުރު ކޮށްފަ އެވެ. އެހެންކަމުން މިހާރު ސްޕެއިން އާއެކު ފުއެންޓޭ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2028 ވަނަ އަހަރު އޮންނަ ޔޫރޯ ފުޓުބޯޅަ މުބާރާތުގެ ނިޔަލަށެވެ.

ފުއެންޓޭގެ އިރުޝާދުގެ ދަށުން ސްޕެއިން އިން ވަނީ މިހާތަނަށް 28 މެޗެއް ކުޅެފަ އެވެ. އޭގެ ތެރެއިން އެ ޓީމު ވަނީ 23 މެޗުން މޮޅުވެފަ އެވެ. ތިން މެޗު އެއްވަރުވެފައިވާއިރު، ބަލިވެފައި ވަނީ އެންމެ ދެ މެޗުންނެވެ. ފުއެންޓޭގެ އިރުޝާދުގެ ދަށުން ސްޕެއިން އިން ވަނީ ގިނަ ކާމިޔާބީތަކެއް ވެސް ހޯދައިފަ އެވެ. އެގޮތުން އޭނާ ހަވާލުވީ ފަހުން މިހާތަނަށް ސްޕެއިން އިން ވަނީ ޔުއެފާ ނޭޝަންސް ލީގު އަދި ޔޫރޯ ފުޓުބޯޅަ މުބާރާތެއް ކާމިޔާބު ކޮށްފަ އެވެ.

ސްޕެއިންގެ ސީނިއާ ޓީމާ ހަވާލުވުމުގެ ކުރިން ފުއެންޓޭ މަސައްކަތް ކޮށްފައި ވަނީ ސްޕެއިންގެ ޒުވާން އުމުރުފުރައިގެ ޤައުމީ ޓީމުގަ އެވެ. އެ ޓީމުގައި ވެސް އޭނާ ވަނީ ކާމިޔާބީތަކެއް ހޯދައިފަ އެވެ.