ފައިނަލުން ބަލިވެ، ކުޑަ ކާއްޓޭއާއި އެޑަމްއަށް ރިހި މެޑަލް
ފައިނަލްގައި ވާދަކުރި އިންޑިއާގެ ޕެއާގެ މައްޗަށް، ގްރޫޕް ސްޓޭޖުގައި ކުޑަ ކާއްޓޭއާއި އެޑަމް ކުރި ހޯދި
ރިހި މެޑަލާއެކު ކުޑަ ކާއްޓޭއާއި އެޑަމް
ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ބީޗު ވޮލީ ބޯޅަ ޓުއާގައި ރާއްޖޭގެ އިސްމާއީލް ސާޖިދު (ކުޑަކާއްޓޭ) އާއި އާދަމް ނަސީމް (އެޑަމް) ފައިނަލުން ބަލިވެއްޖެއެވެ.
ބަންގްލަދޭޝްގައި ކުރިއަށްދާ މުބާރާތުގެ ފައިނަލުގައި ކުޑަ ކާއްޓޭއާއި އެޑަމް ނިކުތީ އިންޑިއާގެ ނިތިންއާއި ރާމާގެ ޕެއާއާ ދެކޮޅަށެވެ. އިންޑިއާގެ ޕެއާއިން ފައިނަލް މެޗު ކާމިޔާބުކުރީ ސީދާ ދެ ސެޓުންނެވެ. މެޗުގެ ސެޓުތައް ދިޔައީ 21-19 އަދި 21-14އިންނެވެ. މިއީ މި މުބާރާތުގައި ކުޑަ ކާއްޓޭއާއި އެޑަމް ބަލިވި ފުރަތަމަ މެޗެވެ. މިއަހަރުގެ މުބާރާތުގެ ގްރޫޕް ސްޓޭޖުގައި ކުޅުނު ތިން މެޗުގެ އިތުރުން، ކުއާޓާ ފައިނަލް އަދި ސެމީ ފައިނަލް މެޗުވެސް ކުޑަ ކާއްޓޭއާއި އެޑަމް ވަނީ ކާމިޔާބުކޮށްފައެވެ. އަނެއްކޮޅުން، ފައިނަލްގައި ވާދަކުރި އިންޑިއާގެ ޕެއާގެ މައްޗަށް ގްރޫޕް ސްޓޭޖުގައި ކުޑަ ކާއްޓޭއާއި އެޑަމް ކުރި ހޯދިއެވެ.
ކުޑަ ކާއްޓޭއާއި އެޑަމްއަކީ މިދިޔަ އަހަރުގެ މުބާރާތް ކާމިޔާބުކުރި ޕެއާއެވެ. އެހެން ނަމަވެސް، ފައިނަލުން ބަލިވެ މިއަހަރުގެ މުބާރާތުން ވަނީ ރިހި މެޑަލް ލިބިފައެވެ. މިދިޔަ އަހަރުގެ މުބާރާތް ކުޑަ ކާއްޓޭއާއި އެޑަމް ކާމިޔާބ ކުރީ ހުރިހާ މެޗަކުން މޮޅުވެގެންނެވެ.
