ޔާމީނުގެ ވެރިކަމުގައި ރާއްޖޭގެ ބިން ބޭރުގެ ފަރާތްތަކަށް މިލްކުވާ ގޮތަށް ގާނޫނަށް ގެނެވުނު ބަދަލު އުވާލީ މިސަރުކާރުން: އިމާދު

ކުރީގެ ރައީސް އަދި ޖަލު ހުކުމެއް ތަންފީޒު ކުރައްވަމުން ގެންދަވާ އަބްދުﷲ ޔާމީންގެ ވެރިކަމުގައި ރާއްޖޭގެ ބިން ބޭރުގެ ފަރާތްތަކަށް މިލްކުވާ ގޮތަށް ރާއްޖޭގެ ގާނޫނު އަސާސީއަށް ގެނެވުނު ބަދަލު، ރައްޔިތުން ބޭނުންވާ ގޮތަށް އުވާލީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ސަރުކާރުގައި ކަމަށް އިމާދު ސާލިހު ވިދާޅުވެއްޖެއެވެ.

ބޭރުގެ ފަރާތްތަކަށް ރާއްޖެއިން ބިން މިލްކުކުރެވޭގޮތަށް ގާނޫނު އަސާސީއަށް އިސްލާހުގެނެސް ފާސްކޮށްފައިވަނީ 2015 ވަނަ އަހަރުގެ ޖުލައި 22 ވަނަ ދުވަހުއެވެ. ގާނޫނު އަސާސީގެ 251 ވަނަ މާއްދާއަށް އެ އިސްލާހު ހުށަހެޅުއްވީ ވިލިމާލޭ ދާއިރާގެ މެމްބަރު އަހުމަދު ނިހާން ހުސައިން މަނިކެވެ. އެ އިސްލާހު ފާސްކުރީ 70 މެމްބަރުންގެ އަޣުލަބިއްޔަތުންނެވެ. އެއީ ޕީޕީއެމްގެ 44 މެންބަރުންނާއި، އެމްޑީޕީގެ 10 މެންބަރުންނާއި، ޖުމްހޫރީ ޕާޓީގެ ހަތް މެންބަރުން އަދި އެމްޑީއޭގެ ފަސް މެންބަރުންގެ ވޯޓުންނެވެ. އަދި ބޭރުގެ ފަރާތްތަކަށް ރާއްޖެއިން ބިން މިލްކު ކުރެވޭ ގޮތަށް ގާނޫނު އަސާސީއަށް ގެނެސްފައިވާ އިސްލާހު، މުޅި މަޖިލިސް އިއްތިފާގުވެގެން އުވާލާފައިވަނީ 15 އޭޕްރީލް 2019 ގައެވެ.

މި ގާނޫނާ ބެހޭގޮތުން ރާއްޖެޓީވީގެ ފަލަސުރުޚީ ޕްރޮގްރާމްގައި އިމާދު ވިދާޅުވީ، 2018 ވަނަ އަހަރު ޔާމީންގެ ވެރިކަން ބަދަލުކުރީ ކީއްވެގެންކަމާއެކު ދިވެހި ރައްޔިތުން ވިސްނަންޖެހޭ ކަމަށެވެ. އޭގައި ވަރަށް ގިނަ ސަބަބުތައް ވާކަމަށް އިމާދު ވިދާޅުވިއެވެ. އެހެންކަމުން ރިޔާސީ އިންތިޚާބުގެ ދެވަނަ ބުރުގެ ވޯޓުލާއިރު، އެކަންކަމަށް ބަލަންޖެހޭކަމަށް އިމާދު ވިދާޅުވިއެވެ.

އިމާދު ވިދާޅުވީ މިފާއިތުވި ފަސް އަހަރު އިދިކޮޅު ޕީޕީއެމް-ޕީއެންސީ ކުރަމުންދިޔަ އެއް މަސައްކަތަކީ ރާއްޖޭގެ މިނިވަންކަން ގެއްލޭކަމަށް ބުނެ އެކަން ރައްޔިތުންނަށް ވިސްނައިދިނުމުގެ މަސައްކަތް ކަމަށެވެ. އަދި މިސަރުކާރުން ދިވެހިންގެ މަސްކަނޑު ވިއްކާލި ކަމަށް ތުހުމަތުކޮށްފައި ވާކަމަށެވެ. ނަމަވެސް ގާނޫނަށް ބަދަލު ގެނައުމުން ރާއްޖޭގެ ބިންކޮޅެއްގެ ކުޑަ މިންވަރެއްވެސް ބޭރުގެ ފަރާތްތަކަށް ދޭން ބޭނުންނުވާ ކަމަށާއި، ރައްޔިތުން އެދޭ ގޮތަށް މިސަރުކާރުން ކަންކަން ކުރަމުން ގެންދާނެ ކަމަށް އިމާދު ވިދާޅުވިއެވެ.

ޔާމީން ދައުރުގެ އަނިޔާވެރިކަމަށް އިޝާރާތްކުރައްވައި އިމާދު ވިދާޅުވީ، ފުރާޅު ނަގައިގެން ފަނޑިޔާރުން ހައްޔަރުކުރުމާއި، ސިޔާސީ ލީޑަރުން ހައްޔަރުކުރުމާއި، މިނިވަންކަމާއެކު ބަސްބުނުން އޮތީ ހުއްޓުވާފައި ކަމަށާއި، ޑިމޮކްރަސީ އޮތީ ފަހަތަށް ގޮސްފައި ކަމަށެވެ. 2018ގެ ވެރިކަން ރައްޔިތުން ނުކުމެ ބަދަލުކުރީ އެ އަނިޔާވެރިކަން ބޭނުންނުވާތީ ކަމަށާއި، އެ އަނިޔާވެރިކަމުގައި ރައްޔިތުން ސީލް ޖަހާފައިވާކަމަށް އިމާދު ވިދާޅުވިއެވެ. އެހެންކަމުން ކުރިއަށް އޮތް އިންތިޚާބުގައި ވޯޓުލާއިރު މިކަންކަމަށް ވިސްނަންޖެހޭ ކަމަށް އިމާދު ވިދާޅުވިއެވެ.