ކޮމަންވެލްތުގެ ސްކޮލަރޝިޕަށް ކުރިމަތިލުމުގެ ފުރުސަތު ހުޅުވާލައިފި
ކޯހުގެ ދާއިރާތަކުގެ މަޢުލޫމާތު މިނިސްޓްރީން ވަނީ ގެޒެޓުގައި ކުރި އިއުލާނުގައި ހިމަނާފައި
ގައުމީ ޔުނިވަރސިޓީގެ ދަސްވެނިވުން ރަސްމިއްޔާތުގެ ތެރެއިން
ކޮމަންވެލްތުގެ ސްކޮލަރޝިޕަށް ކުރިމަތިލުމުގެ ފުރުސަތު މިނިސްޓްރީ އޮފް ހަޔަރ އެޑިއުކޭޝަނުން ހުޅުވާލައިފިއެވެ.
ހަޔަރ އެޑިއުކޭޝަން މިނިސްޓްރީން ކުރި އިއުލާނެއްގައި ބުނީ، މާސްޓަރސް ޑިގްރީ ހެދުމަށް 2 ޖާގައަށް ހުޅުވާލެވިފައިވާ ކަމަށެވެ.
ކޯހުގެ ދާއިރާތަކުގެ މަޢުލޫމާތު މިނިސްޓްރީން ވަނީ ގެޒެޓުގައި ކުރި އިއުލާނުގައި ހިމަނާފައެވެ.
އެގޮތުން މި ސްކޮލަރޝިޕަށް ކުރިމަތިލުމުގެ ޝަރުތުތަކުގެ ތެރޭގައި ހުށަހަޅާ ކޯހަކާއި ގުޅޭ ދާއިރާއަކުން ބެޗްލަރސް ޑިގްރީ ޙާޞިލްކޮށްފައިވުމާއި، ކޮމަންވެލްތް ސްކޮލަރޝިޕް ކޮމިޝަން (ސީ.އެސް.ސީ) ގެ ވެބްސައިޓްގައި ކޯހާއި ގުޅިގެން އިތުރު ޝަރުތެއްވާނަމަ އެ ޝަރުތު ފުރިހަމަވެފައިވުން ހިމެނެއެވެ.
އޭގެ އިތުރުންވެސް އެ މިނިސްޓްރީއިން ނުވަތަ ކުރިން ޑިޕާޓްމަންޓް އޮފް ހަޔަރ އެޑިޔުކޭޝަން މެދުވެރިވެގެން ކިޔެވުމަށް ލޯނެއް ނަގާފައިވާނަމަ ޑީފޯލްޓެއް ނެތި އެލޯނެއް ގަވާއިދުން ދައްކަމުންދާ ފަރާތެއް ކަމުގައިވުމާއި، އެދޭ ކޯހަކީ މިހާރު ފުރިހަމަކޮށްފައިވާ ކޯހަކަށްވުރެ މަތީ ފެންވަރުގެ ކޯހަކަށްވުން އިތުރު ޝަރުތުތަކުގެ ތެރޭގައި ހިމެނެއެވެ.
މިނިސްޓްރީން މައުލޫމާތު ދޭ ގޮތުގައި އެ މިނިސްޓްރީއަށް އެޕްލައިކުރާ ކެންޑިޑޭޓުންގެ ތެރެއިން 2 ކެންޑިޑޭޓުން މި ސްކޮލަރޝިޕަށް ނޮމިނޭޓް ކުރެވޭނެއެވެ.
އަދި އެ ކެންޑިޑޭޓުންގެ އެޕްލިކޭޝަންތައް ކަމާބެހޭ ފަރާތަށް ހުށަހެޅޭނެއެވެ. ނަމަވެސް މިސްކޮލަރޝިޕްގެ ފައިނަލް ސިލެކްޝަން ހައްދަވާނީ ސްކޮލަރޝިޕް އިންތިޒާމްކުރައްވާ ފަރާތުންނެވެ.
އެ މިނިސްޓްރީއަށް އެޕްލިކޭޝަން ހުށަހަޅާ ކެންޑިޑޭޓުންގެ ތެރެއިން ނޮމިނޭޓްވާ ކެންޑިޑޭޓުން ސީއެސްސީގެ އިލެކްޓްރޯނިކް އެޕްލިކޭޝަން ފުރިހަމަކުރުމަށްފަހު، 17 އޮކްޓޯބަރ 2023ގެ 16:00 (ޔުނައިޓެޑް ކިންގްޑަމްގެ ގަޑިން) ކުރިން އޮންލައިން އެޕްލިކޭޝަން ހުށަހަޅަން ޖެހޭނެއެވެ.
އަދި އިލެކްޓްރޯނިކް އެޕްލިކޭޝަން ފޯމާއި، އެހެނިހެން ސަޕޯރޓިންގ ޑޮކިއުމެންޓްގެ ކޮޕީ 18 އޮކްޓޯބަރ 2023 ގެ ކުރިން މިނިސްޓްރީއަށް ހުށަހަޅަން ޖެހެއެވެ.
ދިވެހިރާއްޖެ ކޮމަންވެލްތުގެ މެންބަރު ޤައުމަކަށް އަލުން ވުމާއި ގުޅިގެން ކޮމަންވެލްތު ސްކޮލަރޝިޕްތަކަށް ދިވެހިންނަށް ކުރިމަތިލެވޭ ގޮތް ވަނީ ހަމަޖައްސާފައެވެ.
