ބުދަ ދުވަހުގެ ރޭގެ ވަގުތެއްގައި ހުޅުމާލެ ފޭސް 2 ގައި ހުންނަ ހިޔާ ފްލެޓުގެ ބެލްކަންޏެއްގައި ކުޑަކުއްޖަކު އެކަހެރިކޮށް ތަޅުލާފައި ބެހެއްޓި މައްސަލަ އެއް ކަމާއި ބެހޭ އިދާރާތަކުން ބަަލަމުންދާ ކަމަށް އެޗްއާރްސީއެމްއިން ބުނެފިއެވެ.
އެޗްއާރްސީއެމުން ވަނީ ބުދަ ދުވަހުގެ ރޭގެ ވަގުތެއްގައި ހުޅުމާލެ ފޭސް 2 ގައި ހުންނަ ހިޔާ ފްލެޓުގެ ބެލްކަންޏެއްގައި ކުޑަކުއްޖަކު އެކަހެރިކޮށް ތަޅުލާފަ ހުރި ވީޑިއޯއެއް މީސްމީޑިއާގައި ދައުރުވަމުންދާތީ އެކަން އެ އިދާރާގެ ސަމާލުކަމަށް އައިސްފައިވާކަމަށް ބުނެފައެވެ. އަދި މި މަައްސަލަ ކަމާ ބެހޭ އިދާރާތަކުން ދަނީ ބަލަމުންކަމަށް އެޗްއާރްސީއެމުން ބުނެއެވެ. އެހެންނަމަވެސް މި މައްސަލަ އާއި ގުޅުން ހުރި އިތުރު ތަފްސީލް އެޗްއާރްސީއެމުން ވެސް އަދި ކަމާއި ގުޅުން ހުރި އިތުރު އިދާރާއަކުން ހާމަކޮށްފައެއް ނުވެއެވެ.
އެ އިދާރާއިން ބުނެފައި ވަނީ ކުޑަކުދިންނާ ގުޅުން ހުރި މިފަދަ ވީޑިއޯތައް މީސް މީޑިއާގައި ދައުރުކުރުމަކީ ކުޑަކުދިންގެ ކަރާމާތަށް ނުސީދާ ގޮތަކަށް އަސަރު ކޮށްފާނެ ކަމެއް ކަމަށެވެ. އެހެންކަމުން ކުޑަކުދިންނާ ގުޅުންހުރި މިފަދަ ވީޑިއޯ މީސްމީޑިއާގައި ހިއްސާ ނުކުރުމަށް އެ އިދާރާއިން ވަނީ އިލްތިމާސްކޮށްފައެވެ. އަދި އެފަދަ ކަމެއް ފާހަގަ ކުރެވިއްޖެނަމަ، ކަމާ ގުޅޭ އިދާރާތަކަށް ރިޕޯޓުކުރުމަށް އެޗްއާރްސީއެމުން ވަނީ އެދިފައެވެ.
މިފަދަ މައްސަލަތައް ފުލުހުންނާއި ޖެންޑަރ މިނިސްޓްރީގެ ފަރާތުން ވަރަށް ސީރިއަސް ކަމެއް ދީގެން ބަލައެވެ.
