ސިޔާސީ ވަކި މަންފާތަކެއް ހާސިލް ކުރުމަށް މިހާރު ދައްކަނީ ކޮރަޕްޝަނުގެ ވާހަކަ:ޓްރާންސްޕޭރެންސީ މޯލްޑިވްސް
ކޮރަޕްޝަނުގެ މައްސަލަތައް ފެންމަތިކުރަނީ ބޭނުން އިރަކުން
ޓްރާންސްޕޭރެންސީ ޕްރެސް ކޮންފަރެންސް
ސިޔާސީ މަސްރަހުގައި ކޮރަޕްޝަނުގެ ވާހަކަ ދެކެވެމުންދަނީ ސިޔާސީ ވަކި މަންފާތަކެއް ހާސިލް ކުރުމަށް ކަމަށާއި ސިޔާސީ ޓޫލްއެއްގެ ގޮތުގައި ކޮރަޕްޝަނުގެ ވާހަކަ ދައްކައިގެން މިކަމަށް ހައްލެއް ނުލިބޭނެ ކަމަށް ޓްރާންސްޕޭރެންސީ މޯލްޑިވްސް އިން ބުނެފި އެވެ.
މޫކައި ސުއިޓްސްގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން، ސީނިއަރ ޕްރޮޖެކްޓް ކޯޑިނޭޓަރ އަހްމަދު ތޮލާލް ވިދާޅުވީ، ސިޔާސީ މަސްރަހުގައި މިއަދު ކަންކަން ވަމުންދާ ގޮތަކީ ދެމެހެއްޓެނިވި ގޮތެއްގައި ކޮރަޕްޝަން ނައްތާލުމަށް އަމާޒުކޮށް މަޝްވަރާކުރުމެއް ނޫން ކަމަށެވެ. ކުރު މުއްދަތެއްގެ ސިޔާސީ މަންފާއެއް ހާސިލްކުރުމަށް ޒިންމާދާރުކަން ކުޑަ ގޮތަކަށް ކޮރަޕްޝަނުގެ މާނަ އޮޅޭ ގޮތަށް ކަންކަން ވަމުންދާތީ ކަން ބޮޑުވާ ކަމަށް އޭނާ ވިދާޅުވި އެވެ. މިއަދު މުޖުތަމައުގައި ކޮރަޕްޝަނަކީ، ވަރަށް އާދައިގެ ކަމެއް ކަަމަށް ދައްކުވާތީ، އެއީ އެހާ ބޮޑު މައްސަލައެއް ކަމަށް ދޭހަވާ ގޮތަށް ވާހަކަދެކެވިގެންދިއުމަކީ ކަންބޮޑުވާ މައްސަލައެއް ކަމަށެވެ.
"ސިޔާސީ މަންފާއެއް ހާސިލް ކުރުމަށްޓަކާއި ކުރުމުއްދަތުގައި ދެކެވޭ ނުވަތަ ވަކި ކަމެއް މިވަގުތު ހާސިލް ކުރުމަށް ބޭނުންވާ ވަކި ކަމެއް އޮތަތީވެ، އެކޮރަޕްޝަން ހުއްޓުވުމަށް އެވާހަކަދައްކާ، ބައެއް ސިޔާސީ ފަރާތްތައް ހައްޔަރުކުރުމުގެ ވާހަކަ ދެކެވޭތަންވެސް އެބަ ފެނޭ." ތޮލާލް ވިދާޅުވި އެވެ.
މިއަދުގެ ޕްރެސް ކޮންޕަރެންސްގައި ވާހަކަދައްކަވަމުން ޓްރާންސްޕޭރެންސީ މޯލްޑިވްސް އެގްޒެކެޓިވް ޑިރެކްޓަރ މަރިޔަމް ޝިއުނާ ވިދާޅުވީ، ރާއްޖޭގެ ކޮރަޕްޝަނުގެ ބޮޑެތި މައްސަލަތައް ބަލާ ތަހުގީގުކޮށް އެކަންކަމުގައި ޝާމިލުވާ ފަރާތްތަކާ މެދު އަޅަންޖެހޭ ފިޔަވަޅުތައް އަޅަންޖެހޭ ކަމަށެވެ. ވެރިކަމަށް އަންނަ ކޮންމެ ސަރުކާރަކުންވެސް، ކޮރަޕްޝަން ނައްތާލުމަށް، ޕްލޭންތައް ހެދިނަމަވެސް، އަމަލީ ގޮތުން ކަންކަން ކުރެވެމުންދާ މަންޒަރު ނުފެންނަ ކަމަށް އޭނާ ވިދާޅުވި އެވެ.
މީގެ އިތުރަށް ދައުލަތުގެ މުއައްސަސާތައް ބަލިކަށިވުމަކީވެސް ކޮރަޕްޝަންގެ އަމަލުތައް ހިންގުމަށް ލިބޭ ހިތްވަރެއް ކަމަށް ޝިއުނާ ވިދާޅުވި އެވެ. ދައުލަތުގެ މުއައްސަސާތައް ބަލިކަށިވެ، އެ މުއައްސަސާތައް، މިނިވަންކަމާ އެކު މަސައްކަތް ނުކުރެވި، އެކަށޭނަ ފިޔަވަޅުއެޅުމުގައި ހަރުދަނާކަން ކުޑަވެފައިވާކަން އޭނާ ފާހަަގަކުރެއްވި އެވެ.
މުއައްސަސާތަކުގެ ކުރަންޖެހޭ މަސައްކަތް ނުކުރެވި، އެކަންކަމާމެދު ފިޔަވަޅުއެޅުމުގައި ހަރުދަނާކަން ކުޑަވެފައިވާކަން ފާހަގަކުރެވޭ ކަމަށާއި އެ މުއައްސަސާތަކުގެ ވެރިންގެ ނަޒާހަތްތެރިކަމާމެދު ސުވާލު އުފެދޭ އެތައް ކަމެއް އާންމުވެފައިވާ ކަމަށް އޭނާ ވިދާޅުވި އެވެ.
" ރައްޔިތުންގެ ކުރިމަތީގައި ކޮރަޕްޝަނުގެ އަމަލިތަކުގެ ވާހަކަދެކެވޭ އިރު މިކަންކަން ހުއްޓުވުމަށް އެޅިފަ ހުރީ ކޮންފިޔަވަޅުތަކެއްތޯ. އަދި ކާކުގެ ފައިސާތޯ ސިޔާސީ ވެރިންގެ ތެރޭގައި ބެހެނީ. މީގެ އިތުރުން ކޮރަޕްޝަން ހުއްޓުވުމަކީ ވަކި މުއައްސަސާއެއްގެ ޒިންމާއެއް ނޫން. ހުރިހާ މުއައްސަސާއަކަށް ކުރެވޭނެ ކަމެއްވެސް ނޫން." ޝިއުނާ ވިދާޅުވި އެވެ.
މި ޕްރެސް ކޮންފަރެންސްގައި ވާހަކަދައްކަވަމުން ޕްރޮގްރާމު މެނޭޖަރ ތޯރިގް ހާމިދު ހަވާލުކުރެވިފައިވާ ޒިންމާ އަދާކުރުމުގައި ކޮރަޕްޝަނާއި ރިޝްވަތުގެ އަމަލަކަށް އަރައިނުގަނެ މަސައްކަތް ކުރާކަން، ކަށަވަރުކުރުމަށްޓަކާއި ދައުލަތުގެ އިސް މަގާމުތަކުގައި ތިބޭ ފަރާތްތަކުގެ މާލީ ބަޔާން އާންމު ކުރުމުގެ ހަރުދަނާ ނިޒާމެއް ގާއިމްވާންޖެހޭ ކަމަށެވެ. ސިޔާސީ ފަރާތްތަކާއި ދައުލަތުގެ ވެރިން މާލީ ބަޔާންތައް ހުށަހަޅާއި އާންމުކުރުމުގެ އެންމެ ބޮޑު ބޭނުމަކީ އެފަރާތްތަކުގެ މަސްލަހަތުތައް ދެނެގަނެ ނުހައްގުން ހޯދޭ މުއްސަނދި ކަމަށް ހުރަސް އަޅަންޖެހޭ ކަމަށް ތޯރިގު ވިދާޅުވި އެވެ.
މީގެ އިތުރުން، ނުހައްގުން ހޯދޭ މުއްސަނދިކަމަކީ މިއަދު ރާއްޖޭގެ ގާނޫނުތަކުން މަނާކުރާ ކަމެއް ކަމުގައިނުވާ އިރު އެކަން ޖިނާއީ ކުށަކަށް ހަދަން ޖެހޭ ކަމަށްވެސް ތޯރިގް ވިދާޅުވި އެވެ.
" ސިޔާސީ ފަރާތްތަކުން، ކެމްޕެއިން ފައިސާ ހޯދަނީ ކިހިނެތްތޯ، އެލިބޭ ފައިސާ ބޭނުންކުރަނީ، ކިހިއްނެއްތޯ ބަލަންޖެހޭ. ސިޔާސީ ނިޒާމުން ކޮރަޕްޝަން ނައްތާލުމަށްޓަކާ މިއީ ކޮންމެހެން އެނގެންޖެހޭނެ މައުލޫމާތުތަކެއް." ތޯރިގް ވިދާޅުވި އެވެ.
ޓްރާންސްޕޭރެންސީ މޯލްޑިވްސް ވަނީ އިން ކޮރަޕްޝަން ހުއްޓުވުމަށް ކުރާ މަސައްކަތަކީ ކުރު މުއްދަތުގެ ސިޔާސީ މަންފާއެއް ހާސިލްކުރުމަށް ދެކެވޭ ބަހަނާއަކަށް ނުހެއްދެވުމަށް ރައީސުލްޖުމްހޫރިއްޔާ އަށާއި ސިޔާސީ ޕާޓީތަކަށާއި ރައްޔިތުންގެ މަޖިލީހުގެ އިތުރަށް ފުލުުހުންގެ މުއައްސަސާއަށާއި މިނިވަން މުއައްސަސާތަކަށް ގޮވާލައްވާފަ އެވެ.
ކޮރަޕްޝަން އިތުރުވުމުގެ ސަބަބުން، ގެއްލިގެންދަނީ ދައުލަތުގެ ރައްޔިތުންގެ ލާބައާ މަންފާއަށް ހޭދަކުރުމަށް ހުރި ފައިސާކަމަށާއި، މިކަމުގެ ސަބަބުން ގައުމުގެ ތަރައްގީއަށް ބޮޑެތި ހުރަސްތަކެއް އެޅިގެންދާކަން ޓްރާންސްޕޭރެންސީ އިން ފާހަގަކުރެއްވި އެވެ.
