އެމްއެންޑީއެފްގެ ލީޑަރޝިޕުން ދެއްވީ ބޭރު ސިފައިން ނެތްކަމުގެ ފުރިހަމަ ޔަގީންކަން

ރާއްޖޭގައި ބޭރުގެ ސިފައިން ގާއިމްވެފައި ނެތްކަމަށާއި، މިނިވަންކަމާއި އިސްތިގުލާލަށް ބުރޫ އަރާފަދަ އެއްވެސް ކަމެއް ނުހިނގާކަމުގެ ޔަގީންކަން އެމްއެންޑީއެފްގެ ލީޑަރޝިޕުން ދެއްވައިފިއެވެ.

މިކަމާއި ގުޅިގެން ޗީފް އޮފް ޑިފެންސް ފޯސް ލެފްޓިނެންޓް ޖެނަރަލް ޢަބްދުﷲ ޝަމާލް ވިދާޅުވީ އެއިރެއްގައި އޮންނަ ސަރުކާރުގެ ހާރިޖީ އަދި ދިފާއި ސިޔާސަތުގެ ދަށުން ރާއްޖޭގެ ސިފައިން ތަފާތު އެކި އަސްކަރީ ހަރަކާތްތައް ހިންގާ ކަމަށެވެ.

ޝަމާލް ވިދާޅުވީ ދިވެހި ސިފައިންނަކީ ރާއްޖޭގެ މިނިވަންކަމާއި އިސްތިގުލާލާއި ސިޔާދަތާއި މިނިވަންކަން ނެގެހެއްޓުމުގައި ސާބިތުކަމާއެކު މަސައްކަތް ކުރާ ބައެއް ކަމަށެވެ. އެއީ މައިގަނޑު މިޝަން ކަމަށާއި، ދިވެހި ސިފައިން އެގޮތުގައި ތިބޭނެ ކަމަށެވެ. އަދި މިނިވަންކަމާއި އިސްތިގުލާލާއި ސިޔާސަދަތަށް ބުރޫއަރާނެ އެއްވެސް ކަމެއް ހިނގާނަމަ އެކަމާއި ދެކޮޅަށް ސިފައިން ތެދުވާނެ ކަމަށެވެ.

ވައިސް ޗީފް އޮފް ޑިފެންސް ފޯރސް މޭޖަރ ޖެނެރަލް އަބްދުއްރަޙީމް ޢަބްދުއްލަތީފް ވިދާޅުވީ، ބޭރުގެ އަސްކަރިއްޔާތަކާއެކު ރާއްޖޭގެ އަސްކަރިއްޔާއިން އަބަދުވެސް އެކިއެކި އޮޕަރޭޝަންތަކާއި ޓްރެއިނިންތައް ކުރިއަށް ގެންދަވާކަމަށެވެ. އަދި މިވަގުތުވެސް ރައްޖޭގައި އަސްކަރީ ދައުރެއް އަދާކުރުމަށް ބޭރުގެ އެއްވެސް މީހަކު ނެތްކަމުގެ ޔަގީންކަން އަބްދުއްރަހީމް ވަނީ ދެއްވާފައެވެ.

އަސްކަރިއްޔާގެ ސިފައިން ތަމްރީން ކުރުމުގެ އެންމެ އިސް ވެރިއެއްގެ ގޮތުގައި ހުންނެވި މޭޖަރ ޖެނެރަލް ވައިސް ވަހީދު ވިދާޅުވީ، ރާއްޖޭގައި ދިވެހި އަސްކަރިއްޔާއަށް ތަމްރީން ދިނުމަށް ގިނަ މަރުކަޒުތަކެއް އެބަހުރިކަމަށެވެ. އަދި ސިފައިން ތަމްރީންކުރުމަށްޓަކައި އެއްވެސް މަރުކަޒެއްގައި ބޭރު އެއްވެސް އަސްކަރިއްޔާގެ ސިފައިންގެ މީހަކު ގާއިމްވެ ނެތްކަމަށެވެ. ދިވެހި ސިފައިން ތަމްރީން ކުރަނީ ގާބިލް ދިވެހި އިންސްޓްރަކްޓަރުން ކަމަށް ވިދާޅުވިއެވެ.

އެމްއެންޑީއެފް ކޮމަޑާންޓް ސާރވިސްކޯރ މޭޖަރ ޖެނެރަލް ޙާމިދު ޝަފީގް ވިދާޅުވީ ލޮޖިސްޓިކް ދާއިރާއިންވެސް ބޭރުގެ އަސްކަރިއްޔާތަކާއެކު ވަރަށް ގިނަ ތަމްރީންތައް ކުރިއަށް ގެންދަވާކަމަށެވެ. އަދި އެއްވެސް އަސްކަރީ އުޅަނދެއްގަ ބޭރުގެ އެއްވެސް ސިފައިންގެ މީހަކު ނުތިބޭނެ ކަމުގެ ޔަގީންކަން ވަނީ ދެއްވާފައެވެ.

ކޯސްޓްގާޑުގެ ކޮމަޑާންޓް އިބްރާހީމް ހިލްމީ ވިދާޅުވީ، ރާއްޖޭގެ މިނިވަންކަމާ، ސިޔާދަތާ އިސްތިގުލާލަށް ނުރައްކާވާ އެއްވެސް ކަމެއް ކުރުމުގެ ފުރުސަތު ދިވެހި އަސްކަރިއްޔާއިން ނުދެއްވާނެކަމަށެވެ. ރާއްޖޭގައި ހުރި އިންޑިއާގެ އެހީގައި ދީފައިވާ އުޅަނދުތަކާއި ގުޅޭގޮތުން ހިލްމީ ވިދާޅުވީ ވައިގެ އުޅަނދުފަހަރުގެ މައިގަނޑު ދައުރަކީ ކަނޑުމަތީގައި ހިނގާ ހާދިސާތަކުގަ އުޅަނދުފަހަރު ހޯދައި މީހުން ސަލާމަތްކުރުމަށްޓަކައި މަސައްކަތްކުރުން ކަމަށެވެ. އެ ހުރިހާ އުޅަނދުތަކުގެ ފުރިހަމަ ކޮމާންޑް އެންޑް ކޮންޓްރޯލް ދިވެހި އަސްކަރިއްޔާގައި އޮތްކަމުގެ ޔަޤީންކަންވެސް ޙިލްމީ ދެއްވިއެވެ.

ސިފައިންގެ މެޑިކަލްކޯގެ އެންމެ އިސްވެރިޔާ، ބްރިގޭޑިއަރ ޖެނެރަލް ޑރ. އަލީ ޝާހިދު މުހައްމަދު ވިދާޅުވީ، ސެޕްޓެމްބަރ 2012ން ފެށިގެން ސެނެހިޔާ މިލިޓަރީ ހޮސްޕިޓަލުގައި ދިވެހި އަސްކަރިއްޔާގެ ބެލުމުގެމަތިން އިންޑިއާގެ ސިފައިންގެ ސިއްޙީ ދާއިރާގެ ބޭފުޅުން މަސައްކަތްކުރަމުން ގެންދާކަމަށާއި، އެމީހުންގެ ހަމައެކަނި މަސައްކަތަކީ މެޑިކަލް ޑޮކްޓަރެއްގެ ހައިސިއްޔަތުން ބަލިމީހުން ބެލުން ކަމަށެވެ. އަދި މިމީހުން މަސައްކަތްކުރަމުން ގެންދަނީ ދިވެހިރާއްޖޭގެ ގާނޫނާ ގަވާއިދުގެ މަތިން ރަޖިސްޓްރީކުރަންޖެހޭ ތަންތަނުގަ ރަޖިސްޓްރީވެގެން ކަމަށެވެ.

މާލެ އޭރިއާގެ ކޮމާންޑުގެ ކޮމާންޑަރ ބްރިގޭޑިއަރ ޖެނެރަލް އަޙްމަދު ޤިޔާސް ވިދާޅުވީ، މާލެ އޭރިއާގެ ކޮމާންޑުގައި ބޭރުގެ އެއްވެސް އަސްކަރިއްޔާގެ އެއްވެސް ސިފައިގެ މީހަކު އަސްކަރީ މަސައްކަތް ނުކުރާނެ ކަމަށެވެ.

ފަޔަރ އެންޑް ރެސްކިއު ސާރވިސްގެ ކޮމަޑާންޓް ބްރިގޭޑިއަރ ޖެނެރަލް އިބްރާހިމް ރަޝީދު ވިދާޅުވީ ރާއްޖޭގެ އެއްވެސް ސަރަހައްދެއްގައި ބޭރުގެ އެއްވެސް ސިފައިންގެ މީހަކު އޮޕަރޭޝަނަލް އެއްވެސް ހަރަކާތެއް ނުހިންގާ ކަމަށެވެ. އަދި މިނިވަންކަމާ އިސްތިޤްލާލާ ސިޔާދަތަށް ބުރޫއަރާފަދަ އެއްވެސް ކަމެއް ހިނގާނަމަ ދިވެހި ސިފައިން އެކަމަށް ފުރުސަތު ނުދެއްވާނެކަމަށް ވިދާޅުވިއެވެ.

ޑައިރެކްޓަރ ޖެނެރަލް ޑިފެންސް އިންޓެލިޖަންސް ސާރވިސްގެ ވެރިޔާ ޢަބްދުﷲ ޒުހުރީ ވިދާޅުވީ ރާއްޖޭގެ ފަސްގަނޑުގައި އަސްކަރީ ބޭނުމެއްގައި ސިފައިން ނެތްކަމާއި އެފަދަ މަސައްކަތެއް ނުކުރާކަމަށެވެ.

ބްރިގޭޑިއަރ ޖެނެރަލް ޢަބްދުﷲ އިބްރާހީމް ވިދާޅުވީ ރާއްޖޭގައި ބޭރުގެ ސިފައިން ގާއިމްވެ ނެތް ކަމަށެވެ. އަދި ބޭރުގެ އަސްކަރިއްޔާތަކާއި ގުޅިގެން އެކިއެކި ހަރަކާތްތައް ހިންގަމުންދާ ކަމަށެވެ. އަދި ދިވެހި ފަސްގަނޑުގައި ބޭރުގެ އަސްކަރީ އެއްވެސް ބަޔަކު ނެތް ކަމަށެވެ.