ދިވެހި ސިފައިންގެ ބާރު ނުހިނގާ އެއްވެސް އަސްކަރީ މަރުކަޒެއް ރާއްޖޭގައި ނުހުންނާނެ - ޝަމާލް

ދިވެހި ސިފައިންގެ ބާރު ނުހިނގާ އެއްވެސް އަސްކަރީ މަރުކަޒެއް ރާއްޖޭގައި ނުހުންނާނެ ކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ވިދާޅުވެއްޖެއެވެ.

ޝަމާލް ވިދާޅުވީ ދިވެހި ސިފައިންގެ ބާރު ނުހިނގާ އެއްވެސް އަސްކަރީ މަރުކަޒެއް ރާއްޖޭގައި ނުހުންނާނެ އަދި ކުރިމަގުގައި ވެސް އެ ފުރުސަތެއް އެއްވެސް ބަޔަކު ނުދެއްވާނެ ކަަމަށެވެ. ޝަމާލް ވިދާޅުވީ ބޭރު އެއްވެސް ގައުމެއްގެ މަރުކަޒެއް، ފެސިލިޓީއެއް ނުވަތަ ބޭސްއެއް ސިފައިންގެ ކޮންޓްރޯލް ނެތި އޮޕަރޭޓް ކުރާ ފެސިލިޓީއެއް ރާއްޖޭގައި ނެތް ކަމަށެވެ.

އުތުރު ތިލަފަޅުގައި ހެދިގެންދާ އެފަދަ ހާބަރާއި ގުޅޭގޮތުން ޝަމާލް ވިދާޅުވީ އެއީ އެމްއެންޑީއެފްގެ އުޅަނދުތައް އަޅަން ހަދާ ތަނެއް ކަމަށާއި، ރިޕެއަރ ފެސިލިޓީއަކީ ދިވެހި ދައުލަތުގެ ފެސިލިޓީއެއް ކަމަށާއި، އަދި އެތަނުގެ ހުރިހާ ސާމާނަކީ ވެސް ދިވެހި ދައުލަތުގެ އެއްޗެއްހި ކަމަށެވެ.

ޝަމާލް ވިދާޅުވީ ދިވެހި ސިފައިންނަކީ ރާއްޖޭގެ މިނިވަންކަމާއި އިސްތިގުލާލާއި ސިޔާދަތާއި މިނިވަންކަން ނެގެހެއްޓުމުގައި ސާބިތުކަމާއެކު މަސައްކަތް ކުރާ ބައެއް ކަމަށެވެ. އެއީ މައިގަނޑު މިޝަން ކަމަށާއި، ދިވެހި ސިފައިން އެގޮތުގައި ތިބޭނެ ކަމަށެވެ. އަދި މިނިވަންކަމާއި އިސްތިގުލާލާއި ސިޔާސަދަތަށް ބުރޫއަރާނެ އެއްވެސް ކަމެއް ހިނގާނަމަ އެކަމާއި ދެކޮޅަށް ސިފައިން ތެދުވާނެ ކަމަށެވެ.

އިންޑިއާގެ އަސްކަރިއްޔާއާއި، ދިވެހި އަސްކަރިއްޔާއާއި ދެމެދު އޮންނަ ގުޅުމާއި ގުޅޭގޮތުން ޝަމާލް ވިދާޅުވީ، މީހުން ތަމްރީންކުރުމާއި އަސްކަރީ އެކި ހަރަކާތްތަކުގައި އިންޑިއާއަކީ ޒަމާނުއްސުރެ ދިވެހި ސިފައިންނަށް އެހީތެރިކަން ފޯރުކޮށްދޭ ބައެއްކަމަށެވެ. އެގޮތުން 2011 ވަނަ އަހަރު އިންޑިއާގެ ކޯސްޓްގާޑުގެ ހެލިކޮޕްޓަރަކާއި، 2016 ވަނަ އަހަރު އިންޑީއާ ނޭވީގެ ހެލިކޮޕްޓަރެއް އަދި 2019 ވަނަ އަހަރު ޑޯނިއާ މަތިންދާ ބޯޓެއް އަދި އެނޫންވެސް ކަނޑުގެ ވަސީލަތްތަކާއި ޕެޓްރޯލް އުޅަނދުފަހަރު ހަދިޔާކޮށްދީފައިވާކަމަށެވެ.

ޝަމާލް ވިދާޅުވީ ސިފައިންގެ ރިކުއެސްޓަށް ސިފައިންނާއި ގުޅިގެން ހަރަކާތްތައް ހިިންގަނީ ސިފައިންގެ ކޮމާންޑް އެންޑް ކޮންޓްރޯލުގެ ދަށުން ކަމަށެވެ. އަދި ވަރަށް ގިނަ ޢަދަދެއްގެ ބަލި މީހުން މިހާތަނަށް އުފުލާއިރު އެ ހަރަކާތްތަކަކީ ސިފައިންގެ ބެލުމުގެ ދަށުން ސިފައިންގެ ކޮންޓްރޯލް އޮވެގެން ހިންގާ ހަރަކާތްތަކެއް ކަމަށެވެ.