އެއްވެސް މަޤުޞަދެއްގައި ސިފައިންގެ ޤަދަރާއި ކަރާމާތަށް އުނިކަން ލިބޭގޮތަށް ހަގީގަތާއި ޚިލާފު ޚަބަރު ނުފެތުރުމަށް އިލްތިމާސްކޮށްފި

ސިފައިންގެ ލީޑަރޝިޕްގެ ބޭފުޅުންނާއި ބެހޭގޮތުން "ދިޔަރެސް ނޫހު" ގައި ޝާއިޢުކޮށްފައިވާ ޚަބަރަކީ އެއްވެސް ޙަޤީޤަތެއްނެތް ދޮގު ޚަބަރެއްކަމުގައި އެމްއެންޑީއެފުން ބުނެފިއެވެ.

ދިޔަރެސް ނޫހުގައި "ސަރުކާރު ދިފާއުކޮށް ނޫސްވެރިންގެ ބައްދަލުވުމެއް ބާއްވަން ސިފައިންގެ އިސްވެރިން ދެކޮޅު ހަދަނީ" މިސުރުޚީގެ ދަށުން ލިޔެފައިވާ ޚަބަރާއި ގުޅޭގޮތުން އެމްއެންޑީއެފުން ބުނީ ސިފައިން އަބަދުވެސް ތިބޭނީ ޤާނޫނާއި ޤަވާއިދުތަކަށް ފުރިހަމައަށް ބޯލަނބާ އަދި ސިފައިންގެ ކޯޑް އޮފް އެތިކްސްއާއި އެއްގޮތަށް ޢަމަލުކުރާ ބައެއްގެ ގޮތުގައިކަމަށެވެ.

އަދި މިޤައުމުގެ މިނިވަންކަމާއި ސިޔާދަތާއި އިސްތިޤްލާލް ދިފާޢުކޮށް ރައްކާތެރިކުރުމުގައި ސިފައިން އަބަދުވެސް ސާބިތުވެ ތިބޭނެކަމުގެ ޔަޤީންކަން އަރުވާކަމަށާއި މިޤައުމުގެ މިނިވަންކަމާއި ސިޔާދަތާއި އިސްތިޤްލާލަށް ބުރޫއަރާފަދަ އެއްވެސްކަމެއް ކުުރުމުގެ ފުރުޞަތު ސިފައިން ނުދޭނެކަމުގެ ޔަޤީންކަންވެސް އެންމެހާ ރައްޔިތުންނަށް އަރުވާކަމަށް އެމްއެންޑީއެފުން ބުނެއެވެ.

ވީމާ، އެއްވެސް މަޤުޞަދެއްގައި ސިފައިންގެ ޤަދަރާއި ކަރާމާތަށް އުނިކަން ލިބޭގޮތަށް ނުވަތަ ސިފައިންގެ އެއްބައިވަންތަކަމާއި ސަފުތަކުގެ ބަދަހިކަމަށް ކިލަނބުކަން ލިބޭ ގޮތަށް ޙަޤީޤަތާއި ޚިލާފު ވާހަކަތައް ނުފެތުރުމަށް ވަނީ އިލްތިމާސްކޮށްފައެވެ.

ދިޔަރެސް ނޫހުން ހޯމަ ދުވަހު އެމްއެންޑީއެފްގެ މީޑިޔާ ގްރޫޕްގައި ވަނީ އެމްއެންޑީއެފުން ރައީސް އިބްރާހީމް މުހައްމަދު ޞާލިހުގެ ކެމްޕެއިން އިވެންޓެއް ބާއްވަންއުޅޭކަމުގެ މައުލޫމާތު ލިބޭކަމަށާއި އިވެންޓް އޮތީ ކޮންއިރަކުތޯ ސުވާލުކޮށްފައެވެ . އެސުވާލުގެ ޖަވާބުގައި އެމްއެންޑީއެފްގެ މީޑިޔާއިން ބުނެފައިވަނީ އެއީ ކަނޑައެޅިގެން ދޮގެއްކަމަށާއި އެމްއެންޑީއެފުން އެފަދަ އެއްވެސް އިވެންޓެއް ނުބާއްވާނެކަމަށެވެ. ފަހުން ނޫސްވެރިންގެ ބައްދަލުވުމެއް ބާއްވާނެތޯ ދިޔަރެސް ނޫހުން ސުވާލުކުރުމުން އެމްއެންޑީއެފުގެ މީޑިޔާ އޮފިޝަލު ވަނީ އެފަދަ ނޫސްވެރިންގެ ބައްދަލުވުމެއްވެސް ނުބާއްވާނެކަމަށް ވިދާޅުވެފައެވެ. އެފަދަ ބައްދަލުވުމެއް ބާއްވަން އުޅުނުތޯ ކުރެވުނު ސުވާލަށް މީޑިޔާ އޮފިޝަލު ވަނީ އެފަދަ ނޫސްވެރިންގެ ބައްދަލުވުމެއް ބާއްވަން ނޫޅޭކަމަށް ވިދާޅުވެފައެވެ.

ނަމަވެސް ދިޔަރެސް ނޫހުގައި އެކި ފަހަރު މަތިން ވަނީ ސަރުކާރު ދިފާއުކޮށް ނޫސްވެރިންގެ ބައްދަލުވުމެއް ހޯމަ ދުވަހު އެމްއެންޑީއެފުން ބާއްވަން އުޅޭކަމަށާއި އެކަމާއި ބައެއް އޮފިސަރުން ދެކޮޅު ހައްދަވާކަމަށް ބުނެ ޚަބަރުތައް ޝާއިއުކޮށްފައެވެ.

ބޭރުގެ ސިފައިންނާއި ގުޅުވައިގެން އިދިކޮޅު ފަރާތްތަކުން ދައްކަމުންދަނީ ހަގީގަތެއް ނެތް ވާހަކަތަކެއް ކަމަށާއި، ރިޔާސީ އިންތިޚާބުގެ ދެވަނަ ބުރަށް ނުކުންނަވާއިރު މިކަންކަން ރައްޔިތުންނަށް ސާފުކޮށްދެއްވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވަނީ ހޯމަ ދުވަހުގެ "ފަށާއިރު" ޕްރޮގްރާމްގައި ވިދާޅުވެފައެވެ.

ރާއްޖެޓީވީގެ ފަށާއިރު ޕްރޮގްރާމަށް ދެއްވި ޚާއްސަ ފޯނު އިންޓަވިޔުއެއްގައި ރައީސް ސާލިހު ވިދާޅުވީ ރިޔާސީ އިންތިޚާބުގެ ކެންޕޭންގެ ތެރޭގައި ސާރުކާރާއި ދެކޮޅަށް ވަރަށް ގިނަ ދޮގު ވާހަކަތައް ދައްކާފައިވާ ކަމަށެވެ. އޭގެ ތެރޭގައި ބޭރުގެ ސިފައިންނާއި ގުޅުވައި ދައްކާ ވާހަކަތަކާއި، ގައުމުގެ މިނިވަންކަމާއި، އިސްތިގުލާލު ގެއްލުވާލުމަށް މަސައްކަތްކޮށްފައިވާކަމަށް ބުނެ ފަތުރާފައިހުރި ވާހަކަތައް ދައްކާފައިވަނީ ރައްޔިތުންނަށް ވަރަށް ބޮޑަށް ގަބޫލުކުރެވޭ ގޮތަށް ރައީސް ސާލިހު ވިދާޅުވިއެވެ. އަދި ވިދާޅުވީ އެއީ ހަގީގަތެއް ނޫން ކަމަށާއި، އެކަންކަން ރައްޔިތުންނަށް މިފަހަރުގެ ކެންޕޭން ތެރޭގައި އޮޅުންފިލުއްވައިދެއްވާނެ ކަމަށެވެ.

ރައީސް ޞާލިހު ވިދާޅުވީ ހަގީގަތެއް ނެތް ވާހަކަތަކާއެކު ރައްޔިތުން ތިބީ ވަރަށް ބޮޑު އޮޅުވާލުމެއްގެ ތެރޭގައި ކަމަށެވެ. ރައީސް ޞާލިހު ވިދާޅުވީ ރާއްޖޭގެ މިނިވަންކަމާއި، ރާއްޖޭގެ ސަރަހައްދުން ބައެއް ގެއްލޭ ގޮތަށް އެއްވެސް ކަމެއް ކޮށްފައި ނުވާނެ ކަމަށެވެ. އެކަންކަން ރައްޔިތުންނަށް އޮޅުންފިލާވަރަށް ހާމަކޮށްދެއްވާނެ ކަމަށާއި، އެކަންކަން ކިޔާދިނުމުން ރައްޔިތުންނަށް ވިސްނޭނެ ކަމަށް އެމަނިކުފާނު ވިދާޅުވިއެވެ.