އެންމެ ފަހުން ރުބިއާލޭސް އިސްތިއުފާ ދެއްވައިފި
އައު ރައީސަކު އިންތިޚާބު ކުރުމާ ހަމައަށް، އެ ޤައުމުގެ ފުޓުބޯޅަ ފެޑެރޭޝަން ހިންގާނީ ވަގުތީ ރައީސްގެ ބެލުމުގެ ދަށުން
ސްޕެއިން ފުޓުބޯޅަ ފެޑެރޭޝަންގެ ރައީސަކަށް ހުންނެވި ލުއިސް ރުބިއާލޭސް
ސްޕެއިން ފުޓުބޯޅަ ފެޑެރޭޝަންގެ ރައީސް ލުއިސް ރުބިއާލޭސް އިސްތިއުފާ ދެއްވައިފި އެވެ.
އޭނާ އިސްތިއުފާ ދެއްވާފައި ވަނީ ގިނަ ބަޔަކު އޭނާގެ އިސްތިއުފާ އަށް ގޮވާލަމުން ދިޔަ ވަގުތެއްގަ އެވެ. އެއީ ފީފާ އަންހެން ވޯލްޑް ކަޕްގެ އިނާމް ދިނުމުގެ ރަސްމިއްޔާތުގައި މުބާރާތް ކާމިޔާބު ކުރި ސްޕެއިން ޤައުމީ އަންހެން ޓީމުގެ ކުޅުންތެރިއަކަށް ބޮސްދިން މައްސަލައިގަ އެވެ. އެކަމާ ގުޅިގެން ދުނިޔޭގެ ފުޓުބޯޅައިގެ މައި އިދާރާ (ފީފާ) އިން އޭނާ ސަސްޕެންޑު ވެސް ކުރި އެވެ. ރުބިއާލޭސް އިސްތިއުފާ ދެއްވާފައި ވަނީ ގިނަ ބަޔަކު އޭނާއާ ދެކޮޅަށް އަޑު އުފުލައި، ވާހަކަ ދައްކަމުންދާތާ ތިން ހަފްތާވީ ފަހުންނެވެ.
އިސްތިއުފާ ދެއްވިކަން އިއުލާން ކުރައްވަމުން ރުބިއާލޭސް ވިދާޅުވީ، އޭނާގެ އިސްތިއުފާ އެ ޤައުމުގެ ފުޓުބޯޅަ ފެޑެރޭޝަންގެ ވަގުތީ ރައީސް ޕެޑްރޯ ރޯޗާ އަށް ފޮނުއްވާފައިވާނެ ކަމަށެވެ. އެހެންކަމުން އައު ރައީސަކު އިންތިޚާބު ކުރުމާ ހަމައަށް، އެ ޤައުމުގެ ފުޓުބޯޅަ ފެޑެރޭޝަން ހިންގާނީ ވަގުތޫ ރައީސްގެ ބެލުމުގެ ދަށުންނެވެ. އިސްތިއުފާ ދެއްވުމުގެ ކުރިން ރުބިއާލޭސް ވަނީ އޭނާގެ އަމަލު ދިފާއުކުރައްވާ، ވަރަށް ބޮޑަށް ވާހަކަ ވެސް ދައްކަވައިފަ އެވެ. އަދި އިސްތިއުފާ ނުދެއްވާނެ ކަމަށް ވެސް ކުރިން އޭނާ ވިދާޅުވި އެވެ.
ސްޕެއިންގެ ޕްރޮސެކިއުޓަރަކު މިދިޔަ ހުކުރު ދުވަހު ވަނީ ރުބިއާލޭސްއާ ދެކޮޅަށް ޖިންސީ ގޯނާ އާއި މަޖުބޫރު ކުރުމުގެ މައްސަލައެއް އެ ޤައުމުގެ ހައިކޯޓަށް ހުށަހަޅައިފަ އެވެ.
