ދިއްގަރު ބިން ހިއްކުމުގެ މަޝްރޫއުގެ ދަށުން ނުނިމި އޮތްބައި ހިއްކަން ފަށައިފި
10 ސެޕްޓެމްބަރު 2023 | އާދީއްތަ 13:36މި މަސައްކަތް ކުރަމުންދަނީ އެމްޓީސީސީން
ދިއްގަރުގެ ބިން ހިއްކުމުގެ މަސައްކަތް--
މ. ދިއްގަރު ބިން ހިއްކުމުގެ މަޝްރޫއުގެ ދަށުން ނުނިމި އޮތް ބައިގެ ބިން ހިއްކުމުގެ މަސައްކަތް ފަށައިފިއެވެ.
މި މަސައްކަތް ސަރުކާރުން ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އާއެވެ. އެ ކުންފުނީގެ ސީއީއޯ އާދަމް އާޒިމް ވިދާޅުވި ގޮތުގައި މި މަޝްރޫއުގެ ދަށުން ބާކީ ހިއްކަން އޮތް ބައިގެ މަސައްކަތް އެ ކުންފުނިން ފެށީ މިދިޔަ ހުކުރު ދުވަހުއެވެ.
ދިއްގަރު ބިން ހިއްކުމުގެ މަޝްރޫއުގެ ދަށުން އެ ރަށަށް 25 ހެކްޓަރުގެ ބިން އިތުރު ކުރުމަށް ވަނީ ހަމަޖެހިފައެވެ. ބިން ހިއްކުމަށްފަހު އެ ސަރަހައްދު ހިމާޔަތް ކުރުމަށް ރިވެޓްމަންޓް ޖެހުމާއި ބޭރުތޮށިލުމުގެ މަސައްކަތް ވެސް އެމްޓީސީސީއާ ސަރުކާރުން ވަނީ ހަވާލުކޮށްފައެވެ.
މި މަޝްރޫއުގެ މަސައްކަތް ސަރުކާރުން 2020 ވަނަ އަހަރު ހަވާލު ކުރިއިރު މަސައްކަތް ފެށީ މިދިޔަ އަހަރުއެވެ. ނަމަވެސް މަޝްރޫއުގެ މަސައްކަތް ވަކި ހިސާބަކުން އޮތީ މަޑުޖެހިފައެވެ. އެހެންކަމުން ވީހާވެސް އަވަހަށް އެ މަސައްކަތް ފަށައި ބިން ހިއްކުމަށް އެ ރަށުގެ ރައްޔިތުން ވަނީ އެދިފައެވެ.
ދިއްގަރަކީ 9.9 ހެކްޓަރުގެ ބިމެއް އޮންނަ ރަށެކެވެ. މި އިތުރުކުރާ ބަޔާއެކު 34.9 ހެކްޓަރުގެ ރަށަކަށް އެ ރަށް ވެގެންދާނެއެވެ. މިއާއެކު ރަށަށް ދިމާވެފައިވާ ތަފާތު މައްސަލަތަކަށް ހައްލު ލިބިގެންދާނެ ކަމަށް އެ ރަށުގެ ރައްޔިތުން ބުނެއެވެ. އެގޮތުން ދިރިއުޅުމަށް ބޭނުންވާ ގޯތި ދޫކުރުމަށް ޖާގަ އިތުރުވެގެންދިއުމާއި އިގްތިސާދީ މަސައްކަތްތަކަށް ވެސް އިތުރު ފުރުސަތުތައް އެ ރަށުގައި ހުޅުވިގެންދާނެއެވެ.
