ދެވަނަ ބުރުގައި ރީ ރަޖިސްޓްރީވާން ދޭނީ ދެ ދުވަހުގެ މުއްދަތެއް
ލަފާ ކުރަނީ މި މަހުގެ 16 އަދި 17ގައި ރީ ރަޖިސްޓްރޭޝަނަށް ހުޅުވާލާނެ ކަމަށް
2023 ރިޔާސީ އިންތިހާބުގެ ފުރަތަމަ ބުރުގެ ތެރެއިން
މި މަހުގެ ފަހުކޮޅު ބާއްވާ ރިޔާސީ އިންތިޚާބުގެ ދެވަނަ ބުރުގައި ވޯޓުލާ ފަރާތްތަކަށް ރީ ރަޖިސްޓްރީވުމަށް ދޭނީ ދުވަހުގެ މުއްދަތެއް ކަމަށް އިލެކްޝަންސް ކޮމިޝަނުން ބުނެފިއެވެ.
އެ ކޮމިޝަނުގެ ރައީސް ފުވާދު ތައުފީގު އާދީއްތަ ދުވަހު ކުރެއްވި ޓްވީޓެއްގައި ވިދާޅުވީ ދެވަނަ ބުރުގައި ވޯޓުލާން ރަޖިސްޓްރީވެފައިވާ ތަން ނޫން އެހެން ތަނަކަށް ވޯޓުލާން ބޭނުންވާ މީހުންނަށް ރީ ރަޖިސްޓްރޭޝަނަށް ދެ ދުވަހުގެ މުއްދަތެއް ދެވޭނެ ކަމަށެވެ. އަދި ލަފާ ކުރެވޭ ގޮތުގައި އެ ފުރުސަތު ދޭން ނިންމާފައިވަނީ މި މަހުގެ 16 އަދި 17 ވަނަ ދުވަހު ކަމަށާއި އެކަމާމެދު ގޮތެއް ނިންމައި ރަސްމީކޮށް އިއުލާން ކުރައްވާނެ ކަމަށް ވެސް އޭނާ ވިދާޅުވިއެވެ.
ވޯޓުލުމުގެ ޙައްގު ލިބިފައިވާ ފަރާތްތައް ދެވަނަ ބުރުގައި ވޯޓުލާން ރަޖިސްޓްރީވެފައި އޮންނާނީ ފުރަތަމަ ބުރުގައި ވޯޓުލި ފޮށިތަކުގައެވެ.
އީސީގެ ނާއިބުރައީސް އިސްމާއީލް ހަބީބު ވިދާޅުވި ގޮތުގައި ރިޔާސީ އިންތިޚާބުގެ ދެވަނަ ބުރުގެ ވޯޓުލުން ކުރިއަށްދާނީ މި މަހުގެ 30 ވާ ހޮނިހިރު ދުވަހުއެވެ. ފުރަތަމަ ބުރުގައި ވޯޓުލީތަން ނޫން އެހެންތަނެއްގައި، ދެވަނަބުރުގައި ވޯޓުލާން ބޭނުންވާ މީހުންނަށް، އެ ފުރުސަތު އީސީން ވަރަށް އަވަހަށް ހުޅުވާލާނެ ކަމަށް ވެސް އޭނާ ވިދާޅުވިއެވެ.
މިއަހަރުގެ ރިޔާސީ އިންތިޚާބުގެ ފުރަތަމަ ބުރުގައި ވޯޓުލުމުގެ ޙައްގު 282،395 މީހަކަށް ލިބިފައިވާއިރު ވޯޓުލާފައިވަނީ 80 އިންސައްތައެއްހާ މީހުންނެވެ. މިއީ މިހާތަނަށް ރިޔާސީ އިންތިޚާބެއްގައި އެންމެ މަދުން މީހުން ވޯޓުލި ފަހަރެވެ.
ފުރަތަމަ ބުރުގައި އަށް ކެންޑިޑޭޓުން ވާދަކުރެއްވިއިރު ދެވަނަ ބުރުގައި ވާދަކުރައްވާނީ ރައީސުލްޖުމްހޫރިއްޔާ އަދި އެމްޑީޕީގެ ކެންޑިޑޭޓް އިބްރާހީމް މުޙައްމަދު ޞާލިހު އާއި ޕީއެންސީގެ ކެންޑިޑޭޓް ޑރ. މުޙައްމަދު މުއިއްޒުއެވެ. އެގޮތުން، މުއިއްޒުއަށް 101،180 ވޯޓު ލިބިވަޑައިގެންފައިވާއިރު ރައީސް ޞާލިހަށް ލިބިވަޑައިގެންފައިވަނީ 85،935 ވޯޓެވެ.
