ރިޔާސީ އިންތިޚާބާއި ގުޅިގެން އީސީ އަށް ހުށަހެޅީ 51 މައްސަލަ
10 ސެޕްޓެމްބަރު 2023 | އާދީއްތަ 02:08ތަޙުޤީޤު ކޮށްގެން އިތުރަށް ބަލަންޖެހޭ މައްސަލަތައް ތަޙުޤީޤު ކުރުމުގެ މަސައްކަތް ކުރިޔަށް ދާ ކަމަށް ވިދާޅުވި
އީސީގެ އޮފިޝަލުން ވޯޓު ގުނުމުގެ މަސައްކަތް ކުރަނީ
ހޮނިހިރު ދުވަހު ކުރިއަށް ދިޔަ ރިޔާސީ އިންތިޚާބާއި ގުޅިގެން އީސީ އަށް ހުށަހެޅީ 51 މައްސަލަކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަންސް ކޮމިޝަންގެ ނާއިބު ރައީސް އިސްމާއީލް ހަބީބް ވިދާޅުވީ ރިޔާސީ އިންތިޚާބު 2023ގެ ޤައުމީ ކޮމްޕްލެއިންޓްސް ބިއުރޯއަށް 26 މައްސަލަ އަދި ސިޓީ، އަތޮޅު ކޮމްޕްލެއިންޓްސް ބިއުރޯތަކަށް 25 މައްސަލަ އާއެކު ޖުމުލަ 51 މައްސަލަ ހުށަހަޅާފައިވާ ކަމަށެވެ.
ރިޔާސީ އިންތިޚާބާއި ގުޅިގެން ހުށަހަޅާފައިވާ މައްސަލަތަކުގެ ތެރޭގައި ހިމެނެނީ ކެމްޕޭން ކުރުމާގުޅޭ 3 މައްސަލަ އާއި އޮބްޒާވަރުންނާ ގުޅޭ މައްސަލައަކާއި ވޯޓުލުމުގެ ހައްޤާގުޅޭ 10 މައްސަލަ، ރަޖިސްޓްރޭޝަނާ ގުޅޭ 8 މައްސަލަ، އޮފިޝަލުންނާގުޅޭ 11 މައްސަލަ، ވޯޓުގެ ސިއްރުކަމާ ގުޅޭ 14 މައްސަލަ، ރިޝްވަތު ދިނުމާ ގުޅޭ 2 މައްސަލަ އަދި އެހެނިހެން 2 މައްސަލައެވެ.
މީގެ ތެރެއިން ވަގުތުން ހައްލުކުރެވެން ހުރި މައްސަލަތައް ވަނީ ހައްލުކޮށްފައި ކަމަށް ހަބީބް ވިދާޅުވިއެވެ.
މީގެ އިތުރުން ތަޙުޤީޤު ކޮށްގެން އިތުރަށް ބަލަންޖެހޭ މައްސަލަތައް ތަޙުޤީޤު ކުރުމުގެ މަސައްކަތް ކުރިޔަށް ދާ ކަމަށް ވެސް އޭނާ ވިދާޅުވިއެވެ.
