އަމީނީ މަގުގެ އިތުރު ތިން ސެގްމެންޓުގައި ތާރުއަޅާ ނިމިފައިވާކަމަށް ރޯޑް ޑިވޮލޮޕްމަންޓް ކޯޕަރޭޝަން (އާރްޑީސީ) އިން ބުނެފިއެވެ.

އާރްޑީސީން ބުނީ، އަމީނީމަގު ސެގްމެންޓް 11،10،9 ގައި ތާރު އެޅުމުގެ މަސައްކަތްވަނީ ނިމިފައިވާ ކަމަށާއި، ޓްރެފިކް ނިޝާންތައް ކުރަހާ ނިމުމުން އާއްމުންނަށް ހުޅުވާލާނެ ކަމަށެވެ.

އާރްޑީސީން ބުނީ، އަމީނީ މަގުގެ މަސައްކަތަކީ އުންމީދުކުރިވަރަށްވުރެ އުނދަގޫ މަޝްރޫއެއް ކަމަށެވެ. އެމަގުގެ އަޑީގައި އުރީދޫ، ދިރާގު، އަދި ސްޓެލްކޯގެ ކޭބަލްތައް ވަޅުލާފައިވާއިރު، މަސައްކަތް ކުރިއަށްގެންދަނީ ވަރަށް ވިސްނުންތެރިކަމާއެކު ކަމަށާއި، ކޭބަލަކަށް މައްސަލައެއް ދިމާވެއްޖެނަމަ ރާއްޖޭގެ މުހިންމު އިދާރާތަކުގެ ނެޓްވޯރކްތަކަށް ބުރޫއަރާނެކަމަށް އެ ކުންފުނިން ބުނެއެވެ.

އަމީނީ މަގު ޒަމާނީ ފެންވަރަށް ތަރައްގީކުރަމުންދަނީ އެންމެންނަށް ބޭނުންކުރެވޭހެން ރައްކާތެރިކޮށްކަމަށް އެ ކުންފުނިން މައުލޫމާތު ދެއެވެ. އެގޮތުން ލޯފަން މީހުންނާއި، އެހެނިހެންވެސް ނުކުޅެދުންތެރިކަން ހުންނަ މީހުންނަށް ފަސޭހަކަމާއެކު އަމީނީ މަގު ބޭނުންކުރެވޭނެއެވެ.

އަމީނީ މަގުގެ މަސައްކަތް ކުރިއަށް ގެންދަނީ 13 ސެގްމަންޓަކަށް ބަހާލައިގެންނެވެ. މަގު އެއްކޮށް ނިންމާލުމަށް ބާކީ އޮތީ ދެ ސެގްމެންޓްގެ މަސައްކަތެވެ. ދާދި އަވަހަށް މި ދެ ސެގްމެންޓްގެ އަމަލީ މަސައްކަތް ފެށޭނެ ކަމަށް އާރްޑީސީން ބުނެއެވެ.

އެންމެ ޒަމާނީ ފެންވަރަށް އަމީނީމަގު ޑިޒައިންކުރެވިގެންދާއިރު، މަގުގެ ފެންހިންދާ ނިޒާމް ޑިޒައިން ކުރެވިގެންދާނީ އަމީނީމަގުގެ ދެފަރާތުންވެސް، މަގު ނިމެންދެން އެއްކޮޅުން އަނެއް ކޮޅަށް ކާނު އަޅާގޮތަށެވެ. އަދި ޑިޒައިނަށް ބިނާކޮށް، އެ މަގުގައި ފެންބޮޑުވުމަށް ދާއިމީ ހައްލެއް ގެނައުމަށްޓަކައި އިތުރު ޕަމްޕް ސްޓޭޝަންތައް ބަހައްޓާނެއެވެ.

ވިއްސާރަ މޫސުންތަކުގައި މާލޭގައި އެންމެ ބޮޑަށް ފެންބޮޑުވެ، ރައްޔިތުންނަށް ގިނަ ތަކުލީފުތަކެއް ކުރިމަތިވާ އެއް މަގުކަމަށްވާ އަމީނީމަގު ތަރައްގީކުރުމަށް ޕްލޭނިންގ މިނިސްޓްރީން އާރްޑީސީއެކު ސޮއިކުރީ، އެ މަގުގައި ތާރު އަޅައިގެން ހެދުމަށެވެ. 1.7 ކިލޯމީޓަރުގެ މި މަގު ހެދުމަށް ޚަރަދުވަނީ ޖުމްލަ އަށްޑިހަ ހަތަރު މިލިއަން ހަތަރު ލައްކަ ސާދަ ހާސް ފަސް ސަތޭކަ ސާޅީސް ހަ ރުފިޔާ، އަށްޑިހަ ތިން ލާރިއެވެ.

މި މަޝްރޫއުގެ މަސައްކަތް ނިންމުމަށް ހަމަޖެހިފައިވަނީ 210 ދުވަސް ނުވަތަ ހަތް މަސް ދުވަހުގެ ތެރޭގައެވެ.