މުއިއްޒުގެ ކެމްޕެއިނަށް ގޭންގުތަކުން ފަންޑުކުރާކަމަށް އިމްރާން ތުހުމަތުކުރައްވައިފި
އިމްރާން ވިދާޅުވީ މުއިއްޒު އިންތިޚާބު ކާމިޔާބުކުރައްވައިފިނަމަ ނައިބު ރައީސް އުޅުއްވާ ހިލާލީގެ ވާނީ ގޭންގުތައް އޮޕަރޭޓްކުރާ ކޮމާންޑު ސެންޓަރަށްކަމަށް
ހޯމް މިނިސްޓަރު އަދި އަދާލަތު ޕާޓީގެ ރައީސް އިމްރާން އަބްދުﷲ
ޕީއެންސީގެ ކެންޑިޑޭޓް ޑރ މުހައްމަދު މުއިއްޒުގެ ކެމްޕެއިނަށް ފަންޑުކުރަނީ ގޭންގުތަކުންކަމަށް ހޯމް މިނިސްޓަރު އަދި އަދާލަތު ޕާޓީގެ ރައީސް އިމްރާން އަބްދުﷲ ތުހުމަތުކުރައްވައިފިއެވެ.
ބުރާސްފަތި ދުވަހުގެ ރޭ އައްޑޫ ސިޓީގެ ހިތަދޫގައި ބޭއްވި "އުފާވެރި އަމާން ރާއްޖެ - އުފާވެރި އައްޑޫ" ކެމްޕެއިން ޖަލްސާގައި ވާހަކަފުޅުދައްކަވަމުން އިމްރާން ވިދާޅުވީ ރަނިންގމޭޓް ކަނޑައެޅުމުގައި ޑރ މުއިއްޒު ވެއްޓިވަޑައިގެންނެވި މަޖުބޫރީ ހާލަތު ސިޔާސީ މައިދާނުގައި މަސައްކަތްކުރައްވާ ބޭފުޅުންނާއި ސަލާމަތީ ޚިދުމަތްތަކުގައި މަސައްކަތްކުރައްވާ އިސްބޭފުޅުންނަށް އެނގިވަޑައިގަންނަވާނެކަމަށެވެ.
މުއިއްޒުގެ ރަނިންގމޭޓް ހުސައިން މުހައްމަދު ލަތީފަށް އަމާޒުކުރައްވާ އިމްރާން ވިދާޅުވީ މުއިއްޒު އިންތިޚާބު ކާމިޔާބުކުރައްވައިފިނަމަ ނާއިބު ރައީސް އުޅުއްވާ ހިލާލީގެ ވާނީ ގޭންގުތައް އޮޕަރޭޓްކުރާ ކޮމާންޑު ސެންޓަރަކަށްކަމަށެވެ. އަދި ކޮމިޝަނަރ އޮޕް ޕޮލިސް އަށް އައްޔަނުކުރާނީ ގޭންގް ލީޑަރެއްކަމަށް އިމްރާން ވިދާޅުވިއެވެ.
ހޯމް މިނިސްޓަރު އިތުރަށް ވިދާޅުވީ އޭނާ މި ދައްކަވަނީ ކިހާ ވަރެއްގެ ނުރައްކާތެރި ވާހަކައެއްކަން އެނގިވަޑައިގަންނަވާކަމަށެވެ. އަދި މިއީ އަމިއްލަ ނަފުސާއި އާއިލާ ނުރައްކަލުގެ ތެރެއަށް ވައްޓާލެވެނީކަން އެނގިވަޑައިގަންނަވާކަމަށް ވެސް އިމްރާން ވިދާޅުވިއެވެ.
ހޯމް މިނިސްޓަރު ތަކުރާރުކޮށް ވިދާޅުވީ މިކަން ވަރަށް ތަފްސީލުކޮށް ވަރަށް ރަނގަޅަށް ސަލާމަތީ ޚިދުމަތްތަކުގެ ބޭފުޅުންނަށް އެނގިވަޑައިގަންނަވާނެކަމަށެވެ.
