އައްޑޫ ސިޓީ އަށް އައި ބަދަލު ރޮޒައިނާ ކިޔާދެއްވީ މާޒީ ހަނދާންކޮށްދެއްވަމުން
ކުރީ ސަރުކާރުގައި ކޮރަޕްޝަން އިންތިހާ އަށް އޮތް ކަމަށް ފާހަގަކުރައްވާ އެކަމަށް ރޮޒައިނާ ވަނީ ވަރަށް ބޮޑަށް ފާޑު ވިދާޅުވެފައި
އުފާވެރި އަމާން ރާއްޖެ - އުފާވެރި އައްޑޫ ޖަލްސާގައި ރޮޒައިނާ ވާހަކަފުޅުދައްކަވަނީ
މާޒީގެ ކަންކަމާއި މިހާރާއި އަަޅާ ކިޔާލުމުން އައްޑޫ ސިޓީ އަށް އައި ތަރައްްޤީ އެނގޭ ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.
އައްޑޫ ސިޓީގައި ބޭއްވި އުފާވެރި އަމާން ރާއްޖެ - އުފާވެރި އައްޑޫ ޖަލްސާގައި ރޮޒައިނާ ވަނީ ކުރީގެ ރައީސް އަބްދުﷲ ޔާމީންގެ ސަރުކާރާއި މިހާރުގެ ސަރުކާރުގެ މަސައްކަތްތައް އަޅާކިޔުއްވާފައެވެ. އެގޮތުން ކުރީގެ ސަރުކާރުން ވެރިކަމުގައި ތިބި އިރު އައްޑޫ އިން ކަރަންޓު ކެނޑޭތީ މުޒާހަރާ ކުރި ހަނދާން އޭނާ ވަނީ އައުކޮށްދެއްވާފައެވެ. އެެހެންނަމަވެސް އައްޑޫގެ ކަރަންޓުގެ މައްސަލަ އަށް މިހާރު އެކަށީގެންވާ ހައްލެއް ލިބިފައިވާ ކަމަށް ރޮޒައިނާ ވިދާޅުވިއެވެ.
މީގެއިތުރުން ރޮޒައިނާ ވަނީ ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު ޕީޕީއެމްގެ ސަރުކާރުގެ ވަޒީރުކަމުގައި ހުންނެވިއިރު، އައްޑޫގެ ކަންކަމާމެދު އަޅާނުލައްވާ ކަމަށް ވިދާޅުވެފައެވެ. އެގޮތުން އޭރު މީދޫ ބަނދަރު ހަލާކުވާތީ ޓިނު ޖަހަން ޖެހުނު ކަމަށާއި ފޭދޫގައި ބަނދަރު ހަލާކުވެ ގިރަމުން ދިޔަ މައްސަލަ ރޮޒައިނާ ފާހަގަކުރެއްވިއެވެ. ރައްޔިތުން އެކަންކަން މުއިއްޒުގެ ސަމާލުކަމަށް ގެނައި ނަމަވެސް އެކަންކަމާއި އޭނާ އަޅާނުލެއްވި ކަމަށް ރޮޒައިނާ ވިދާޅުވިއެވެ. އެހެންކަމުން މިހާރު އައްޑޫގެ ތަރައްްޤީ އަށް މުއިއްޒު ކަންކަން ކޮށްދެއްވާނެތޯ ރޮޒައިނާ ވަނީ ސުވާލު އުފައްދަވާފައެވެ.
ރޮޒައިނާގެ ވާހަކަފުޅުގައި އޭނާ ވަނީ އައްޑޫގެ ކުރިމަގާއި އައްޑޫގައި އެމްޑީޕީން ކުރަމުންދާ މަސައްކަތަށް އަލިއަޅުވާލައްވާފައެވެ. އެގޮތުން އައްޑޫ އަކީ ތިލަފަތުގެ ހަމަހަމަކަން އެންމެ ރަނގަޅަށް ފެންނަތަން ކަމަށް އޭނާ ވިދާޅުވިއެވެ.
މިހާރުގެ ރައީސުލްޖުމްހޫރިއްޔާ އިބްރާޙީމް މުހައްމަދު ޞާލިހު މަސައްކަތްކުރައްވަމުން ގެންދަވަނީ އައްޑޫ ސިޓީ އަށް އިންޤިލާބީ ބޮޑު ބަދަލެއް ގެންނަވަން ކަމަށް ރޮޒައިނާ ވިދާޅުވިއެވެ. މީގެ އިތުރުން ސަރުކާރުން ލޯނު ނަގައިގެން ކަންކަން ކުރާތީ އެކަމަށް އިދިކޮޅު ފަރާތްތަކުން ކިޔަމުންދާ ފާޑުކިޔުންތަކަށް ރޮޒައިނާ ވަނީ ރައްދު ދެއްވާފައެވެ. އޭނާ ވިދާޅުވީ ލޯނު ނަގައިގެން ސަރުކާރުން ކޮށްދިނީ ރައްޔިތުންނަށް ބޭނުންވާ ކަންކަން ކަމަށެވެ. އެކަންކަން ކުރަމުން ދަނީ ފުރިހަމަ ޕްލޭނަކާއެކު ކަމަށް ވުމުން ލޯނު ނުދެއްކިދާނެތީ އެއްވެސް ރައްޔިތަކު ހާސްވާން ނުޖެހޭނެ ކަމަށް އޭނާ ވިދާޅުވިއެވެ.
އެ ޖަލްސާގައި ވާހަކަފުޅު ދައްކަވަމުން ރޮޒައިނާ ވަނީ ކުރީގެ ސަރުކާރަށް ވަރަށް ބޮޑަށް ފާޑު ވިދާޅުވެފައެވެ. އެގޮތުން ކުރީގެ ސަރުކާރުން އައްޑޫ އިކުޓޯރިއަލް ހޮސްޕިޓަލް އަޅަން ކަމަށް ބުނެ އައްޑޫ ކޮންވެންޝަން ސެންޓަރު ހަލާކުކޮށްލާފައިވާ ކަމަށާއި އެކަމަށް ކުރީގެ ރައީސް ޔާމީނަށް މާފުނުކުރައްވާނެ ކަމަށް ވިދާޅުވިއެވެ. އެއީ ރައްޔިތުންނަށް އޮޅުވާލައިގެން ކުރެއްވި ކަމެއް ކަމަށް ރޮޒައިނާ ސިފަކުރެއްވިއެވެ. މީގެ އިތުުރުން ކުރީގެ ސަރުކާރުގައި ކޮރަޕްޝަން އިންތިހާ އަށް އޮތް ކަމަށް ފާހަގަކުރައްވާ އެކަމަށް ވެސް ރޮޒައިނާ ވަނީ ވަރަށް ބޮޑަށް ފާޑު ވިދާޅުވެފައެވެ.
