މި ސަރުކާރު ބަދަލުކުރަންޖެހޭ ސަބަބެއް ނެތް: ޕްރޮފެސަރު އުގައިލް

މި ސަރުކާރު ބަދަލުކުރަންޖެހޭ ސަބަބެއް ނެތްކަމަށް ޕްރޮފެސަރު ހަސަން އުގައިލް ވިދާޅުވެއްޖެއެވެ.

ރައީސުލްޖުމްހުރިއްޔާ އިބްރާހީމް މުހައްމަދު ސާލިހަށް ތާއީދުކުރައްވައި އުގައިލް ވިދާޅުވީ، ސުލްހަވެރިކަމާއި އަމާންކަމާއެކު ތަރައްގީގެ އެތައް މަޝްރޫއުތަކެއް ފަށައި، ކުރިޔަށް ހިނގަމުންދާ މިސަރުކާރު ބަދަލުކުރަންޖެހޭ ސަބަބެއް ނެތް ކަމަށާއި، ދިވެހި ރައްޔިތުންނަށާއި ގައުމަށް އެންމެ ފައިދާހުރި ގޮތަކީ ރައީސް ސާލިހަށް ދެވަނަ ދައުރެއް ދިނުން ކަމަށެވެ.

ސަރުކާރު ބަދަލުވެއްޖެނަމަ ފަށައިގެން ކުރިޔަށްދާ މަޝްރޫއުތައް ހުއްޓޭނެކަން ފާހަގަކުރައްވައި އުގައިލް ވިދާޅުވީ، ފިޔަވަޅުތަކެއް ފަހަތަށް އެޅޭނެ ކަމަށާއި، މިއީ ގަބޫލްކުރަންޖެހޭ ހަގީގަތެއް ކަމަށެވެ. އަދި ގަސްތުގައި ނުކުރެއްވިޔަސް މިއީ ތަބީއީ އާދައެއް ކަމަށް އުގައިލް ވިދާޅުވިއެވެ.

އެހެންކަމުން ނުހުއްޓި ރައީސް ސާލިހާއެކު ކުރިއަށްދިއުމަށް އުގައިލް ގޮވާލެއްވިއެވެ.

ޕްރޮފެސަރު އުގައިލް މިސަރުކާރަށް ތާއީދުކުރައްވާފައި ވާއިރު، ގިނަ އަދަދެއްގެ ދީނީ އިލްމުވެރިން ވެސް ވަނީ ރައީސް ސާލިހު އެންޑޯޒު ކުރައްވާފައެވެ.