މިހާތަނަށް 133 އައު އެމްބިއުލާންސް އަތޮޅުތެރޭގެ ރަށްތަކަށް ފޮނުވާފައިވޭ: ހެލްތު މިނިސްޓްރީ
މީހުން ދިރިއުޅޭ ކޮންމެ ރަށަކަށް އެމްބިއުލާންސް ވަރަށް މުހިންމު
ހެލްތު މިނިސްޓްރީގެ ސްޓޭޓް މިނިސްޓަރު އަހުމަދު އާދިލް ވާހަކަފުޅުދައްކަވަނީ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ސަރުކާރުގައި މިހާތަނަށް 133 އައު އެމްބިއުލާންސް އަތޮޅުތެރޭގެ ރަށްތަކަށް ފޮނުވާފައިވާ ކަމަށް ހެލްތު މިނިސްޓްރީން ބުނެފިއެވެ.
ބުދަ ދުވަހު އިތުރު 11 އެމްބިއުލާންސް ފޮނުވުމުގެ މަސައްކަތްވެސް ވަނީ ކޮށްފައެވެ. އެސަރަހައްދުގައި ހުންނަވައިގެން މީޑީއާތަކަށް މައުލޫމާތު ދެއްވަމުން، ހެލްތު މިނިސްޓްރީގެ ސްޓޭޓް މިނިސްޓަރު އަހުމަދު އާދިލް ވިދާޅުވީ ސިއްހީ ނިޒާމު ހަރުދަނާ ކުރުމަށް މިސަރުކާރުން ޚާއްސަ އިސްކަމެއް ދީގެން މަސައްކަތްކުރަމުން ދާކަމަށެވެ. އެމްބިއުލާންސްގެ އިތުރުން ބޭނުންވާ އެކިއެކި އާލާތްތައް ފޯރުކޮށްދެމުން ދާކަން އާދިލް ފާހަގަކުރެއްވިއެވެ. އަދި ވިދާޅުވީ މިހާތަނަށް އައިރު 133 އައު އެމްބިއުލާންސް ފޯރުކޮށްދީފައި ވާކަމަށެވެ.
އާދިލް ވިދާޅުވީ ކުދި އާބާދީތަކުގައި މަދު ހާލަތެއްގައި އެމްބިއުލާންސްގެ ޚިދުމަތް ބޭނުންވިނަމަވެސް މީހުން ދިރިއުޅޭ ކޮންމެ ރަށަކަށް އެމްބިއުލާންސް ވަރަށް މުހިންމު ކަމަށެވެ. މިއީ ސިއްހީ ދާއިރާއަށް ލިބޭ ވަރަށް ބޮޑު ކުރިއެރުމެއް ކަމަށް އޭނާ ވިދާޅުވިއެވެ.
ރާއްޖޭގެ ސިއްހީ ނިޒާމު ހަރުދަނާކުރުމުގެ ގޮތުން މިސަރުކާރުން އަންނަނީ 30 އެނދުގެ ހޮސްޕިޓަލްތަކާއި 50 އެނދުގެ ހޮސްޕިޓަލްތަކުގެ އިތުރުން 100 އެނދުގެ ޓާޝަރީ ހޮސްޕިޓަލްތައް ތަރައްގީކުރުމުގެ މަސައްކަތްކުރަމުންނެވެ. އެގޮތުން ހެލްތު މިނިސްޓްރީން އާއްމުކޮށްފައިވާ ތަފާސްހިސާބުތައް ދައްކާގޮތުން، ފާއިތުވި 4 އަހަރުގެ ތެރޭގައި ސިއްހީ ދާއިރާގައި ހިމެނޭ ޕީއެސްއައިޕީ މަޝްރޫއުތަކުގެ ތެރެއިން 21 މަޝްރޫއެއް ވަނީ ނިމިފައެވެ.
