އުލިގަމު ބަނދަރު ތަރައްގީ ކުރުމާއި ގޮނޑުދޮށް ހިމާޔަތް ކުރުމުގެ އަމަލީ މަސައްކަތް ފަށައިފި
މިއީ 73.88 މިލިއަން ރުފިޔާގެ މަޝްރޫއެއް
އުލަގަމު ބަނދަރުގެ މަސައްކަތް ފެށުމުގެ ރަސްމިއްޔާތުގެ ތެރެއިން
ހއ. އުލިގަމު ބަނދަރު ތަރައްގީ ކުރުމާއި ގޮނޑުދޮށް ހިމާޔަތް ކުރުމުގެ މަޝްރޫއުގެ އަމަލީ މަސައްކަތް ފަށައިފިއެވެ.
އަންގާރަ ދުވަހު އުލިގަމުގައި މިކަމައްޓަކައި ބޭއްވި ހާއްސަ ރަސްމިއްޔާތުގައި ރައްޔިތުންގެ މަޖިލީހުގެ ހޯރަފުށީ ދާއިރާގެ މެންބަރު އަޙުމަދު ސަލީމާއި، އެމްޓީސީސީގެ ސީއީއޯ އާދަމް އާޒިމް ބައިވެރިވެ ވަޑައިގެންނެވިއެވެ.
ދޯނި ފަހަރު އަޅާފައި ބާއްވާނެ ޖާގަ ތަނަވަސް ބަނދަރެއް ނެތުމާއި، ހުޅަނގު މޫސުމުގައި ފަޅުތެރެ ގަދަވުމުގެ ސަބަބުން ދޯނި ފަހަރު ޖާގައިގެ ގޮތުން ކުޑަ ބަނދަރެއްގައި އަޅާފައި ބޭއްވުން ދަތިކަމަކަށް ވުމުގެ އިތުރުން، ރަށް ގިރުމުގެ މައްސަލަ ދިމާވެ ރަށުގެ ގޮނޑުދޮށުގެ ރީތިކަން ގެއްލޭކަމުގެ ޝަކުވާއަކީ އުލިގަމު ރައްޔިތުންގެ ދުވަސްވީ ޝަކުވާތަކެވެ. އަންގާރަ ދުވަހު ފެށުނު އުލިގަމު ބަނދަރު ތަރައްޤީ ކުރުމާއި، ގޮނޑުދޮށް ހިމާޔަތް ކުރުމުގެ މަޝްރޫއުގެ މަސައްކަތް ނިމުމާއިއެކު، ރައްޔިތުންނަށް ދިމާވެފައިވާ މި މައްސަލަތަކަށް ނިމުމެއް އަންނާނެކަމަށް އެމްޓީސީސީ އިން ގަބޫލުކުރެއެވެ.
މި ރަސްމިއްޔާތުގައި ވާހަކަފުޅު ދައްކަވަމުން އެމްޓީސީސީގެ ސީއީއޯ އާދަމް އާޒިމް އެ ކުންފުންޏާ ހަވާލުކޮށްފައިވާ ކޮންސެޕްޓަށް ބަދަލެއް ނާންނަނަމަ ހަވާލުކޮށްފައިވާ ތާރީހަށް ބަނދަރުގެ މަސައްކަތް ނިންމާ ހަވާލު ކުރައްވާނެ ކަމަށެވެ. އެގޮތުން އާއްމުކޮށް އެމްޓީސީސީން ބަނދަރެއްގެ މަސައްކަތް 18 މަސް ދުވަހުގެ ތެރޭގައި ނިންމާ ކަމަށް އެ ކުންފުނިން ބުނެއެވެ.
އުލިގަމު ބަނދަރު ތަރައްގީ ކުރުމާއި ގޮނޑުދޮށް ހިމާޔަތް ކުރުމުގެ މަޝްރޫއުގެ ދަށުން، 10,400 ކިއުބިކް މީޓަރުގެ ސަރަހައްދެއްގެ ކުރިން ފުންކޮށްފައިވާ ފަޅު އަލުން ފުންކުރުމާއި، 46،181 ކިއުބިކް މީޓަރުގެ ސަރަހައްދެއްގެ އައު ހާބަރ ބޭސިން ފުންކުރުމުގެ މަސައްކަތް ކުރާނެއެވެ. އަދި 21،708 ކިއުބިކް މީޓަރުގެ ސަރަހައްދެއްގެ ނެރު ފުންކުރުމާއި، 238 މީޓަރުގެ ސަރަހައްދެއްގައި އެއްގަމުތޮށި ލުމާއި، 238 މީޓަރުގެ ސަރަހައްދެއްގައި ބޭރުތޮށި ލުމާއި، 183 މީޓަރުގެ ސޭންޑްފިލްޑް ބޭރުތޮށި އައުޓަރ ރިވެޓްމެންޓެއް ޖެހުމުގެ މަސައްކަތް ކުރާނެއެވެ.
މީގެ އިތުރުން، 162 މީޓަރުގެ ސޭންޑްފިލްޑް ބޭރުތޮށި އިނަރ ރިވެޓްމެންޓެއް ޖެހުމާއި، 180 މީޓަރުގެ ރިވެޓްމަންޓެއް ޖެހުމާއި، 300 މީޓަރުގެ ގްރޮއިން ޖެހުމާއި، 11 މީޓަރު ފުޅާ ބްރިޖެއް ހެދުމުގެ އިތުރުން، 2200 އަކަ މީޓަރުގެ ޕޭވްމަންޓް ހެދުމާއި، ބަނދަރު ބައްތި ހަރުކުރުމުގެ މަސައްކަތް ވެސް މި މަޝްރޫއުގެ ތެރޭގައި ހިމެނެއެވެ.
މިއީ 73.88 މިލިއަން ރުފިޔާގެ މަޝްރޫއެކެވެ.
