ޅ. އަތޮޅު ކުރެންދުއާއި އޮޅުވެލިފުށީ ބަނދަރު އަޕްގްރޭޑް ކުރުމުގެ މަސައްކަތާއި ހއ. އުތީމު ނެރުފައިކަށި އަޕްގްރޭޑް ކުރުމުގެ މަސައްކަތް ސަރުކާރުން، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އާ ހަވާލުކޮށްފިއެވެ.

މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގައި އަންގާރަ ދުވަހު ބޭއްވި ރަސްމިއްޔާތެއްގައި އެ މިނިސްޓްރީގެ ފަރާތުން މި އެއްބަސްވުންތަކުގައި ސޮއިކުރެއްވީ ޑިރެކްޓަރ ޖެނެރަލް ފާތިމަތު ޝާނާ ފާރޫގެވެ. އަދި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ޗީފް އޮޕަރޭޓިންގ އޮފިސަރ ޝާހިދު ހުސައިން މޫސާއެވެ.

ކުރެންދޫ ބަނދަރު އަޕްގްރޭޑް ކުރުމުގެ މަސައްކަތް ޕްލޭނިންގ މިނިސްޓްރީން އެމްޓީސީސީއާ ހަވާލުކޮށްފައިވަނީ 450 ދުވަހުގެ ތެރޭގައި ނިންމާ ގޮތަށް 53،367،570.36 (ފަންސާސް ތިން މިލިއަން ތިން ލައްކަ ފަސްދޮޅަސް ހަތްހާސް ފަސްސަތޭކަ ހަތްދިހަ ރުފިޔާ، ތިރީސް ހަ ލާރި) އަށެވެ. މި މަޝްރޫއާއެކު އެ ރަށުގެ ބަނދަރުގެ ދަތިކަމަށް ހައްލު ލިބިގެންދާނެ ކަމަށް ޕްލޭނިންގ މިނިސްޓްރީން ބުނެއެވެ.

މި މަޝްރޫއުގެ ދަށުން 3.5 މީޓަރުގެ ފުންމިނަށް ބަނދަރުތެރެ ކޮނުމާއި، 405 މީޓަރުގެ ބޮޑުހިލައިގެ ބްރޭކްވޯޓަރ ޖެހުމާއި، 10 މީޓަރުގެ ސަބްމާޖްޑް ބޮޑުހިލައިގެ ބްރޭކްވޯޓަރ ޖެހުމާއި، 63 މީޓަރުގެ ބޮޑުހިލައިގެ ރިވެޓްމަންޓް ޖެހުމާއި އަދި ކޮންކްރީޓް ދެ ޖެޓީ ގާއިމުކުރުމުގެ މަސައްކަތް ކުރާނެއެވެ.

އޮޅުވެލިފުށި ބަނދަރު އަޕްގްރޭޑް ކުރުމުގެ މަސައްކަތުގެ ދަށުން އެ ރަށުގެ ބަނދަރު 3 މީޓަރަށް ފުންކޮށް، ނެރު 4 މީޓަރަށް ފުން ކުރާނެއެވެ. އަދި 164 މީޓަރުގެ ބޮޑުހިލައިގެ ރިވެޓްމަންޓް ޖެހުމާއި، 157 މީޓަރުގެ ބޮޑުހިލައިގެ ބްރޭކްވޯޓަރ ޖެހުމާއި، 156 މީޓަރުގެ ސޭންޑްފިލްޑް ބޮޑުހިލައިގެ ބްރޭކްވޯޓަރ ޖެހުމާއި، 24 މީޓަރުގެ ބޮޑުހިލަ ސަބްމާޖްޑް ބްރޭކްވޯޓާ ޖެހުމާއި، 246 މީޓަރުގެ އެލް ބްލޮކް ވާޓަރު ހެދުމާއި، ބަނދަރު ބައްތިއާއި ނެރު ބައްތި ހަރުކުރުމާއި، ކޮންކްރީޓް ޕޭވްމަންޓެއް ހެދުމާއި، އެކްސެސް ރޭމްޕަކާއި ބްރިޖް އަދި ޖެޓީއެއް ގާއިމުކުރުމުގެ މަސައްކަތްވެސް ކުރާނެއެވެ.

މި މަޝްރޫއުގެ މަސައްކަތް އެމްޓީސީސީއާ ހަވާލުކޮށްފައިވަނީ 450 ދުވަހުގެ ތެރޭގައި ނިންމާ ގޮތަށް، 66،402،902.96 (ފަސްދޮޅަސް ހަ މިލިއަން ހަތަރު ލައްކަ ދެހާސް ނުވަސަތޭކަ ދެ ރުފިޔާ، ނުވަދިހަ ހަ ލާރި)އަށެވެ.

ހއ. އުތީމު ނެރުފައިކަށި އަޕްގްރޭޑް ކުރުމުގެ މަސައްކަތުގެ ދަށުން 8400 ކިއުބިކް މީޓަރުގެ ސަރަހައްދެއްގެ ނެރު ފުންކުރާނެއެވެ. އަދި 50 މީޓަރުގެ ބޭރުތޮށި ޖެހުމާއި ދެ ނެރު ބައްތި ޖެހުމުގެ މަސައްކަތް ވެސް ކުރާނެއެވެ.

މި މަޝްރޫއުގެ މަސައްކަތް ސަރުކާރުން އެމްޓީސީސީއާ ހަވާލުކުރީ 6،199،871.76 (ހަ މިލިއަން އެއްލައްކަ ނުވަދިހަ ނުވަ ހާސް އަށްސަތޭކަ ހަތްދިހަ އެއް ރުފިޔާ، ހަތްދިހަ ހަ ލާރި) އަށެވެ.