އައިއޯއައިޖީގެ ކާމިޔާބީ ފާހަގަކުރުމުގައި ރައީސް ޞާލިޙު ބައިވެރިވެ ވަޑައިގަންނަވަނީ

މަޑަގަސްކަރާގައި ކުރިއަށްދިޔަ އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގައި ދިވެހިރާއްޖެއިން ހޯދި ތާރީޚީ ކާމިޔާބާ ގުޅިގެން, އުފާ ފާޅުކުރުމަށް ބާއްވާ އިވެންޓުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ބައިވެރިވެ ވަޑައިގަންނަވާ ގޮތަށް ހަމަޖެހިއްޖެއެވެ.

މިއަހަރުގެ ގޭމްސްގައި ރާއްޖެއިން ވަނީ ނުވަ ކުޅިވަރެއްގައި ވާދަކޮށްފައެވެ. އެއީ ޓޭބަލް ޓެނިސް (ޓީޓީ)، ވޮލީބޯޅަ، އެތުލެޓިކްސް، ޓެނިސް، ހޭންޑްބޯޅަ، ބާސްކެޓުބޯޅަ، ސްވިމިން، ބެޑްމިންޓަން އަދި ޓައެކްވަންޑޯއެވެ. ގޭމްސްގައި ބައިވެރިވި ރާއްޖޭގެ އެތުލީޓުންގެ އަދަދަކީ 176ވެ. ގޭމްސްގައި ރާއްޖޭގެ ޓީޓީ، ބެޑްމިންޓަން، ޓައެކްވަންޑޯ، ޕެރަ އެތުލެޓިކްސް، އެތުލެޓިކްސް އަދި ބާސްކެޓު ބޯޅައިން ވަނީ މެޑަލް ހާސިލްކޮށްފައެވެ. ރާއްޖެއިން ވަނީ ޖުމުލަ 28 މެޑަލް ހާސިލްކޮށްފައެވެ. އެއީ ފަސް ރަން މެޑަލް، ނުވަ ރިހި މެޑަލް އަދި 14 ބްރޯންޒް މެޑަލްއެވެ.

ދިވެހި އެތުލީޓުން ހޯދި ކާމިޔާބީ ފާހަގަކުރުމަށް އަންގާރަ ދުވަހުގެ ރޭ (މިރޭ) 20:45ގައި ޖުމްހޫރީ މައިދާނުގައި ޚާއްސަ އިވެންޓެއް ބޭއްވުމަށް ވަނީ ނިންމާފައެވެ. އެތުލީޓުންނާއި އޮފިޝަލުންނަށް މަރުހަބާ ކިޔުމަށް މިފަދަ ކުލަގަދަ ރަސްމިއްޔާތެއް ބޭއްވުމުގެ މައިގަނޑު މަގުސަދަކީ، އެތުލީޓުންނާއި އޮފިޝަލުން ދައްކައިދިން ގައުމިއްޔަތުގެ ރިވެތި ނަމޫނާއާއި، ހިތްވަރާއި، އަޒުމާއި، ހޯދާފައިވާ ފަޚުރުވެރި ކާމިޔާބީ ވީހާވެސް ކުލަގަދަކޮށް ފާހަގަކުރުމެވެ. އަދި، އެތުލީޓުންނާއި އޮފިޝަލުން ހޯދާފައިވާ ކާމިޔާބީގައި ބައިވެރިވުމުގެ ފުރުސަތު ވީހާވެސް ގިނަ ބަޔަކަށް ހޯދައިދިނުމެވެ. މި ރަސްމިއްޔާތުގައި މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)ގެ ފަރާތުން ބަޑި ބޭހުގެ ކުޅިވަރުތައް ދައްކާލުންވެސް އޮންނާނެއެވެ.

މީގެ ކުރިން 2019 ވަނަ އަހަރު މޮރިޝަސްގައި އޮތް އައިއޯއައިޖީގައި ރާއްޖެއިން ވަނީ 15 މެޑަލް ހާސިލްކޮށްފައެވެ. އޭގެ ފަހުން މިއަހަރުގެ ގޭމްސްގައި އެ އަދަދު އިތުރު ކުރުމަށް ރާއްޖެއިން ޚާއްސަ ސަމާލުކަމެއް ދިނެވެ. އެގޮތުން އެ ކާމިޔާބީ ހޯދުމަށް އަމާޒު ކަނޑައަޅައިގެން ރާއްޖެއިން ވަނީ ދުރާލައި ގިނަ މަސައްްކަތްތަކެއް ކޮށްފައެވެ. އޭގެތެރޭގައި ރާއްޖޭގެ އެތުލީޓުންނަށް ރާއްޖެއިން ބޭރުގެ ގައުމުތަކާއި، ރާއްޖޭގައި ތަމްރީނުތައް ކުރިއަށް ގެންދިޔުން ހިމެނެއެވެ.

މިއަހަރުގެ ގޭމްސް އެންމެ ފުރަތަމަ ބާއްވަން ހަމަޖެހުނީ ރާއްޖޭގައެވެ. ނަމަވެސް ކޯވިޑް-19ގެ ބަލިމަޑުކަމުގެ ސަބަބުން ރާއްޖެއަށް ގޭމްސްއަށް ތައްޔާރު ނުވެވުމުގެ ސަބަބުން، އެ ފުރުސަތު ޖެހުނީ ދޫކޮށްލާށެވެ. ދާދި ފަހުން ރާއްޖެ ޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން ރައީސް ވިދާޅުވީ، ރާއްޖޭގައި އައިއޯއައިޖީ ބޭއްވުމަކީ މި ދައުރުގެ ތެރޭގައި ކުރަން ބޭނުންފުޅުވި ކަމެއް ކަމަށެވެެ. ނަމަވެސް ދިމާވި ހާލަތުގެ ސަބަބުން އެކަން ހާސިލްނުކުރެވުނު ކަމަށާއި، ކުރިއަށް އޮތް ރިޔާސީ ދައުރަށް އިންތިޚާބުވެ ވަޑައިގެންފިނަމަ، އަލުން ރާއްޖޭގައި އައިއޯއައިޖީ ބޭއްވުމަށް މަސައްކަތް ކުރައްވާނެ ކަމަށް ވިދާޅުވިއެވެ.