ހަރުކަށި ފިކުރާއެކު ހަނގުރާމައަށްދިޔަ މީހުން މުޖުތަމައުއަށް ނެރުމަށް ރިހިބިލިޓޭޓް ކުރުމުގެ މަސައްކަތް ފުޅާދާއިރާއެއްގައި ކުރެވޭ: މިނިސްޓަރު އިމްރާން
4 ސެޕްޓެމްބަރު 2023 | ހޯމަ 07:37ދ.ކުޑަހުވަދޫގައި ގާއިމްކުރި ސެންޓަރު މިމަހުގެ ތެރޭގައި ހުޅުވޭނެ
ހޯމް މިނިސްޓަރު އަދި އަދާލަތް ޕާޓީގެ ރައީސް ޝެއިހް އިމްރާން އަބްދުﷲ ވާހަކަދައްކަވަނީ
ހަރުކަށި ފިކުރުގެ ސަބަބުން، ރާއްޖެ ދޫކޮށް، ހަނގުރާމަވެރި ސަރަހައްދުތަކަށް ދަތުރުކުރި ފަރާތްތަކާއި އާއިލާތައް، އަނބުރާ ގެނެސް، މުޖުތަމައުއަށް ނެރުމަށް ރިހިބިލިޓޭޓް ކުރުމުގެ މަސައްކަތް ފުޅާދާއިރާއެއްގައި ކުރާ ކަމަށް ހޯމް މިނިސްޓަރު އަދި އަދާލަތް ޕާޓީގެ ރައީސް ޝެއިހް އިމްރާން އަބްދުﷲ ވިދާޅުވެއްޖެއެވެ.
އާދިއްތަ ދުވަހުގެ ރޭ ހދ.މަކުނުދޫގައި ބޭއްވި ބަނދަރު ބައްދަލުއްވުމުގައި މިނިސްޓަރު އިމްރާން ވިދާޅުވީ، ރާއްޖެގެ އިގްތިސާދު ދެ ގުނަ ކުރަން މަސައްކަތް ކުރާއިރު، އެންމެ މުހިއްމު އެއް ކަމަކީ، 'އުފާވެރި އަމާން ރާއްޖެ'' ސްލޯގަންގައިވާ އަމާންކަންކަމަށެވެ.
ރާއްޖޭގެ އަމާންކަމަށް ހުރި ގޮންޖެހުންތައް ރައީސް އިބްރާހިމް މުހައްމަދު ސާލިހަށް އެނގިވަޑައިގަންނަވާކަން ފާހަގަކުރައްވައި މިނިސްޓަރު އިމްރާން ވިދާޅުވީ އެމަނިކުފާނު އަމިއްލަފުޅަށް ޗެއަރ ކުރައްވާ ވަރަށް މުހިއްމު ދެ ކައުންސިލްއަކާއިއެކު، ވަރަށް ބޮޑެތި މަސައްކަތްތަކެއް ކުރައްވާ ކަމަށެވެ. އެ ދެ ކައުންސިލްއަކީ، ރައީސް ސާލިހު ހައްދަވާފައިވާ، ޑްރަގް ޓާސްކް ފޯސްއަކާއި، ގޭންގް ޓާސްކް ފޯސްކަމަށް މިނިސްޓަރު ފާހަގަކުރެއްވިއެވެ. މި ކަންކަމުގެ ސަބަބުން ބޮޑުވަމުން އަންނަ ޖީލުގެ ތެރެއިން، ޖުވެނަލް ޖަސްޓިސްގެ ދާއިރާގައި މަސައްކަތް ކުރަންވީ ގޮތާއި، ކުދިންނާއި ޒުވާނުން ކުށްތަކުން އެއްފަރާތްކޮށް، އަމާން މުޖުތަމައަކާއި ދިމާއަށް ދަތުރު ކުރާނީ ކިހިނެއްކަން އެނގިވަޑައިގަންނަވާ ކަމަށް މިނިސްޓަރު އިމްރާން ވިދާޅުވިއެވެ.
މިނިސްޓަރު އިމްރާން ވިދާޅުވީ މިމަސައްކަތް ފެށީ ސުމަކުން ކަމަށާއި، މީގެ 20 އަހަރު ކުރިން ކ.މާފުށީގައި ހުރި އިސްލާހިއްޔާ އުވާލި ނަމަވެސް މިހާރު އެމަސައްކަތް ވަރަށް ފުޅާކޮށް ކުރިއަށްދާ ކަމަށެވެ. އެގޮތުން ގާނޫނަށް ބަދަލުގެނެސްފައިވާ ކަމަށާއި، ސެންޓަރުތައް ގާއިމްކުރަމުންދާ ކަމަށެވެ. އަދި ދ.ކުޑަހުވަދޫގައި ގާއިމްކުރި ސެންޓަރު މިމަހުގެ ތެރޭގައި ހުޅުވޭނެ ކަމަށް މިނިސްޓަރު އިމްރާން ވިދާޅުވިއެވެ.
ހަރުކަށި ފިކުރަށް އިޝާރަތް ކުރައްވައި މިނިސްޓަރު އިމްރާން ވިދާޅުވީ، މި ފިކުރުގެ ސަބަބުން ރާއްޖެ ދޫކޮށް، ހަނގުރާމަވެރި ސަރަހައްދުތަކަށް ދަތުރުކުރި ފަރާތްތަކާއި އާއިލާތައް، އަނބުރާގެނެސް މުޖުތަމައުއަށް ނެރުމުގެ މަސައްކަތްތައް ކުރާ ކަމަށެވެ. އަދި މިއަދު ދުނިޔޭގެ ގައުމުތަކުން އައިސް ރާއްޖޭގައި މީހުން ރިހިބިލިޓޭޓް ކުރާ ގޮތް ބަލައި، ޕްރޮގްރާމްތައް ކުރިއަށް ގެންދާ ގޮތް ދަސްކުރަން ބޭނުންވާ ހިސާބަށް މި ޕްރޮގްރާމްތައް ކުރިއަށް ގެންދެވިފައިވާކަން މިނިސްޓަރު އިމްރާން ފާހަގަކުރެއްވިއެވެ.
އިސްލާމް ދީނާއި ދުރުވެ، ދެކޮޅުވެ، ދީނަށް ފުރައްސާރަކުރާ ބައެއް މީހުން އުޅޭކަން ފާހަގަކުރަައްވައި މިނިސްޓަރު އިމްރާން ވިދާޅުވީ އެކަން ހައްލު ކުރުމުގެ މަސައްކަތް އިސްލާމިކް މިނިސްޓްރީއާ ގުޅިގެން ކުރަމުންދާ ކަމަށާއި، އެކަން ކުރާނެ ޚާއްސަ، ދާއިންނާއި، ޚާއްސަ މުރައްބީން ތަމްރީންކޮށް، އެކަމަށް ފަރުވާދޭނެ ރަނގަޅު ނިޒާމެއް އެކަށައަޅަމުންދާ ކަމަށެވެ.
މީގެ އިތުރުން މިނިސްޓަރު އިމްރާން ވަނީ މިސަރުކާރުގެ ވައުދުތަކާއި، ތަރައްގީއާ ބެހޭ ގޮތުން ވެސް ވާހަކަދައްކަވާފައެވެ.
މިނިސްޓަރު އިމްރާން ވިދާޅުވީ ރައީސް އިބްރާހިމް މުހައްމަދު ސާލިހު 2018 ގައި ފުރަތަމަ ވެރިކަމަށް ވަޑައިގެންނެވުމަށްވި ވައުދުފުޅުތައް ފުރިހަމަ ކުރުމަށް 44 ނުވަތަ 45 ބިލިއަން ރުފިޔާއަރާ ކަމަށެވެ. މި އަހަރު ރައީސް ވެ ވަޑައިގަންނަވާ ވައުދުފުޅުތަކަށް އަދި އަރަނީ ގާތްގަނޑަކަށް، 34 ނުވަތަ 35 ބިލިއަން ރުފިޔާކަމަަށް މިނިސްޓަރު އިމްރާން ވިދާޅުވިއެވެ. އަދި ވިދާޅުވީ މި ފުރަތަމަ ދައުރުގެ ވައުތަކަށްވުރެން، މާ ބާރަށް، މާ ފަސޭހައިން، މާ އަވަހަށް މި ވައުދުތައް ފުއްދާ ނިންމަވާނެ ކަމަށެވެ.
