ސްޕެއިންގެ ކުރީގެ ތަރި، ހުއާން މަޓާ ޖަޕާނުގެ ވިސެލް ކޯބޭއަށް ސޮއިކޮށްފިއެވެ.

އުމުރުން 35 އަހަރުގެ މިޑްފީލްޑަރު ވަނީ ޗެލްސީއާއި މެންޗެސްޓަރ ޔުނައިޓެޑަށް ކުޅެފައެވެ. އެއަށްފަހު އޭނާ ބަދަލުވެފައިވަނީ ގަލަތަސަރާއީއަށެވެ. އެ ކުލަބުގައި ދުވަސްތަކެއް ހޭދަކުރުމަށްފަހު، އޭނާ އެ ކްލަބު ދޫކޮށްލާފައިވަނީ ޖުލައި މަހުގެ ފުރަތަމަ ދުވަހުއެވެ.

މަޓާ ވަނީ މިދިޔަ ސީޒަނުގެ ތުރުކީ ލީގު ގަލަތަސަރާއީއަށް ކާމިޔާބުކޮށްދިނުމަށް އެހީތެރިވެދީފައެވެ. ނަމަވެސް، ފުރަތަމަ 11އިން ޖާގަ ހޯދުމަށް އޭނާއަށް ވަނީ ދަތިވެފައެވެ. މިދިޔަ ސީޒަނުގައި އޭނާ ވަނީ ތުރުކީ ލީގުގެ 16 މެޗު ކުޅެ، ތިން ލަނޑު ޖަހައި، އެއް ލަނޑު ޖެހުމަށް އެހީތެރިވެދީފައެވެ.

މަޓާއަކީ 2010 ވަނަ އަހަރުގެ ވޯލްޑް ކަޕް ސްޕެއިނުން ކާމިޔާބުކުރިއިރު، އެ ޓީމުގައި ހިމެނުނު ކުޅުންތެރިއެކެވެ. މީގެއިތުރުން އޭނާ ވަނީ ޗެލްސީއާއެކު ޗެމްޕިއަންސް ލީގު، ޔުރޮޕާ ލީގު އަދި އެފްއޭ ކަޕް ކާމިޔާބުކޮށްފައެވެ. އޭނާ ވަނީ ޔުނައިޓެޑާއެކު ވެސް ޔުރޮޕާ ލީގާއި އެފްއޭ ކަޕް ކާމިޔާބުކޮށްފައެވެ.

ވިސެލް ކޯބޭއަކީ އިނިއެސްޓާވެސް އެންމެ ފަހުން ކުޅުނު ޓީމެވެ. މިވަގުތު އެ ޓީމު އޮތީ 52 ޕޮއިންޓާއެކު ޖޭ ލީގުގެ އެއްވަނާގައެވެ.