އުންމީދަކީ މެންޗެސްޓާ ޔުނައިޓެޑަށް ޅެމުން އަންނަ ސްޕެއިންގެ މިޑްފިލްޑަރ ހުއާން މަޓާ އެއްބަސްވުން އާކޮށް، ކްލަބުގައި މަޑުކުރުން ކަމަށް އެ ކްލަބުގެ ކޯޗު ސޯލްޝެއާ ބުނެފިއެވެ.

ސްކައި ސްޕޯޓްސްއަށް މައުލޫމާތު ދެމުން ސޯލްޝެއާ ބުނީ، މަޓާއަކީ ވަރަށް ހުނަރުވެރި ކުޅުންތެރިޔެއް ކަމަށާއި، އޭނާ އެއްބަސްވުން އާކޮށް ކްލަބުގައި މަޑުކުރާނެ ކަމަށް އުންމީދުކުރާ ކަމަށެވެ.

ސޯލްޝެއާ ބުނީ، މަޓާއާ ވާހަކަދެކެވިފައިވާ ކަމަށާއި، އޭނާ ކްލަބަށް މުހިންމުވާވަރު ކިޔާދީފައިވާނެ ކަމަށެވެ. އަދި ކްލަބުގައި މަޑުކުރުމާ މެދު ގޮތެއް ނިންމާނީ ވެސް މަޓާ ކަމަށް ސޯލްޝެއާ ވަނީ ބުނެފައެވެ.

ދާދި ފަހުން ޑެއިލީމެއިލް އިން ބުނީ، މަޓާގެ އެއްބަސްވުން މި އަހަރު ހަމަވާއިރު، އޭނާއަށް އާ އެއްބަސްވުމެއް ހުށަހަޅާތޯ އިންތިޒާރުކުރަމުންދާ ކަމަށެވެ. އެގޮތުން ޔުނައިޓެޑުން އާ އެއްބަސްވުމެއް ހުށަ ނާޅައިފިނަމަ ޓްރާންސްފަރގައި އޭނާ ކްލަބް ބަދަލުކުރާނެ ކަމަށްވެސް ރިޕޯޓްތައް ބުނެއެވެ.

އުމުރުން 30 އަހަރުގެ މަޓާ ހޯދުމަށް ބައެއް ކްލަބްތަކުން އަންނަނީ މަސައްކަތް ކުރަމުންނެވެ. އޭގެ ތެރޭގައި ޕްރިމިއާ ލީގުގެ ބައެއް ކްލަބްތައްވެސް ހިމެނެއެވެ.

ރެއާލް މެޑްރިޑްގެ ޒުވާން ޓީމުން 2006 ވަނަ އަހަރު ކެރިއަރު ފެށި މަޓާ ވަނީ ވެލެންސިއާ އަދި ޗެލްސީ އަށް ވެސް ކުޅެފައެވެ.

މަޓާ ވަނީ ވެލެންސިއާ އަށް ކުޅުނު 174 މެޗުގައި 46 ލަނޑު ކާމިޔާބުކޮށްފައެވެ. އަދި އޭނާ ވަނީ ވެލެންސިއާއާ އެކު ކޮޕާޑެލްރޭ ވެސް އެއް ފަހަރު ކާމިޔާބު ކޮށްފައެވެ.

ޗެލްސީއަށް ކުޅުނު 135 މެޗުގައި 33 ލަނޑު ކާމިޔާބު ކޮށްފައިވާ މަޓާ ވަނީ އެ ކްލަބާއެކު އެފްއޭ ކަޕް، ޔުއެފާ ޗެމްޕިއަންސް ލީގު އަދި ޔުއެފާ ޔޫރޮޕާ ލީގު ވެސް ކާމިޔާބުކޮށްފައެވެ.

ޗެލްސީ ދޫކޮށް މަޓާ ޔުނައިޓެޑަށް ބަދަލުވީ 2013 ވަނަ އަހަރެވެ. މިހާތަނަށް ޔުނައިޓެޑަށް ކުޅުނު 217 މެޗުގައި 45 ލަނޑު ކާމިޔާބުކޮށްފައިވާ މަޓާ ވަނީ ޔުނައިޓެޑާއެކު އެފްއޭ ކަޕް، ލީގު ކަޕް، އެފްއޭ ކޮމިއުނިޓީ ޝީލްޑް އަދި ޔުއެފާ ޔޫރޮޕާ ލީގު ކާމިޔާބުކޮށްފައެވެ.

ސްޕެއިން ގައުމީ ޓީމަށް 41 މެޗުގައި 10 ލަނޑު ކާމިޔާބުކޮށްފައިވާ މަޓާ ވަނީ ސްޕެއިންގެ 19 އަދި 21 އަހަރުން ދަށުގެ ޓީމާއެކު ޔޫރޯ ކާމިޔާބުކޮށްފައެވެ.