ހިރިމަރަދޫގެ ބޮޑެތި މަގުތައް ތަރައްގީކުރައްވައި، ފެންބޮޑުވާ މައްސަލައަށް ހައްލެއް ގެނެސްދެއްވާނެކަމަށް ރައީސް ވިދާޅުވެއްޖެ
ޒުވާނުންނަށް ކުޅިވަރުކުޅެވޭނެ ވަސީލަތްތައް ގާއިމްކުރައްވާނެ ކަމަށް ވިދާޅުވި
ރައީސް ސާލިހް ހިރިމަރަދޫގައި ވާހަކަފުޅުދައްކަވަނީ
ހިރިމަރަދޫގެ ބޮޑެތި މަގުތައް ތަރައްގީކޮށްދެއްވައި، ފެންބޮޑުވާ މައްސަލައަށް ހައްލެއް ގެނެސްދެއްވާނެކަމަށް ރައީސް ވިދާޅުވެއްޖެ
ރައީސް ވިދާޅުވީ، ކުރިއަށް އޮތީ މި ރިޔާސީ އިންތިޚާބުގެ ފަހު 6 ދުވަސް ކަމަށާއި، ރައްޔިތުން މިހާރު ތިބޭނީ ގޮތެއް ނިިންމައިގެން ކަމަށެވެ. އަދި ކުރައްވާ ދަތުރުފުޅުތަކުން އެ މަންޒަރު ރަށްރަށުން ވަރަށް ސާފުކޮށް ފެނިވަޑައިގަންނަވާ ކަމަށެވެ. ރައީސް ވިދާޅުވީ ކޮންމެ ރަށަކުންވެސް ފެނިވަޑައިގަންނަވަނީ ގެންނަން އުޅޭ ބޮޑު ބަދަލާ އެކީގައި ދާން ތައްޔާރަށް ތިބި ތަން ކަމަށާއި، އެނބުރި އަނިޔާވެރިކަމަށް ދާން ބޭނުންވާ މަންޒަރު ފެނިވަޑައިނުގަންނަވާ ކަމަށެވެ.
ރައީސް އެދިވަޑައިގަތީ ވޯޓު އޮންނަ ދުވަހު ވީހާވެސް އަވަހަކަށް ނުކުމެ، ވޯޓު ލުމަށެވެ. ރައީސް ވިދާޅުވީ އިންތިޚާބު ކާމިޔާބުކުރެއްވުމަށް ވަރަށް ގިނަ މަސައްކަތްތައް ކުރައްވަންޖެހޭ ކަމަށެވެ. އިންތިޚާބުގެ ނަތީޖާ ބަދަލުކޮށްލަން ބޭނުންވަނީ އެންމެ ވޯޓެއް ކަމަށާއި، އެއީ ކޮންމެ މީހެއްގެ ވޯޓަކަށްވެސް ވެދާނެކަމަށެވެ.
ރައީސް ވިދާޅުވީ، ތަރައްގީއަށްޓަކައި ހިރިމަރަދޫ ރައްޔިތުން ބޭނުންވާ ކަންތައްތަކެއް އެބަހުރި ކަމަށެވެ. އެގޮތުން ކުރިއަށް އޮތް ދައުރުގައި ބަނދަރު ބޮޑުކޮށްދެއްވައި މަރާމާތު ކޮށްދެއްވައި ރައްޔިތުން އެދޭ ބަދަލު ގެންނަވާނެކަމަށެވެ. އަދި މި މަސައްކަތް ނިމޭއިރު މޫދަށް އެރޭނެ ސަރަހައްދެއް ގާއިމްކުރައްވާނެ ކަމަށާއި، ބޮޑެތި މަގުތައް ޒަމާނީ ފެންވަރަށް ހައްދަވައިދެއްވައި، ތާރު އަޅުއްވައިދެއްވައި، ފެންބޮޑުވުމުގެ މައްސަލައަށް ހައްލެއް ގެނެސްދެއްވާނެ ކަމަށެވެ. ރައީސް ވިދާޅުވީ ޒުވާނުން ކުޅިވަރުކުޅެން ބޭނުންވާ ވަސީލަތްތަކާއެކު ރަނގަޅު ޚިދުމަތްތަކެއް ޒުވާނުންނަށް ފޯރުކޮށްދެއްވާނެ ކަމަށެވެ.
ރައީސް ވިދާޅުވީ އެމަނިކުފާނުގެ ވައުދުފުޅަކީ އެއްވެސް މީހަކު ބާކީނުކުރެއްވުން ކަަމަށެވެ. ކުރިއަށް އޮތް ތަނުގައިވެސް ކަންކުރައްވާނީ އެގޮތަށް ކަމަށާއި، އެދިވަޑައިގަންނަވަނީ ރައްޔިތުން އެމަނިކުފާނާ އެއްކޮށް ތިބުން ކަމަށެވެ.
ރައީސް ވިދާޅުވީ ރައްޔިތުންގެ އެދުންތައް ފުއްދޭނެ މެނިފެސްޓޯއެއް، ވާދަވެރި އެއްވެސް ކެންޑިޑޭޓެއްގެ ނެތް ކަމަށެވެ.
