ވައިނަލްޑަމް އަލް އިއްތިފާގަށް ސޮއިކޮށްފި

ރޯމާ އަށް ކުޅެމުން އައި ނެދަލެންޑްސްގެ މިޑްފީލްޑަރު ޖިއޮޖީނިއޯ ވައިނަލްޑަމް ސައުދީ ޕްރޯ ލީގުގެ އަލް އިއްތިފާގަށް ސޮއި ކޮށްފި އެވެ.

އުމުރުން 32 އަހަރުގެ ކުޅުންތެރިޔާ ރޯމާ އަށް ކުޅެމުން އައީ ލޯނު އެއްބަސްވުމެއްގެ ދަށުންނެވެ. ފްރާންސްގެ ޕެރިސް ސެއިންޓް ޖާމަން (ޕީއެސްޖީ)ގައި ހުރުމަށްފަހު ލޯނު އެއްބަސްވުމެއްގެ ދަށުން އޭނާ ރޯމާ އަށް ބަދަލުވީ މިދިޔަ އަހަރުގެ އޯގަސްޓު މަހުގެ ތެރޭގަ އެވެ. ޕީއެސްޖީ އާއެކު ވައިނަލްޑަމް ހަދާފައިވާ ދާއިމީ އެއްބަސްވުމުގެ މުއްދަތު ހަމަވާނީ 2024 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް ޕީއެސްޖީގެ އައު ކޯޗު ލުއިސް އެންރީކޭގެ ޕްލޭންގައި ވައިނަލްޑަމް އަކީ މުހިންމު ކުޅުންތެެރިޔެއް ނޫނެެވެ. އެހެންކަމުން ޕީއެސްޖީން ބޭނުންވީ ވެސް އޭނާ ދޫކޮށްލުމަށެވެ.

މީޑިއާ ތަކުގައި ބުނެފައިވާ ގޮތުން އަލް އިއްތިހާދާއެކު ވައިނަލްޑަމް ސޮއި ކޮށްފައި ވަނީ ތިން އަހަރު ދުވަހުގެ އެއްބަސްވުމެއްގަ އެވެ. އޭނާ ހޯދުމަށް އަލް އިއްތިފާހުން 10 މިލިއަން އެމެރިކާ ޑޮލަރު ހޭދަކޮށްފައިވާ ކަމަށް ވެސް ވަނީ ބުނެފަ އެވެ. މީގެ އިތުރުން ވައިނަލްޑަމް އަލް އިއްތިފާގަށް ސޮއި ކުރީ އޭނާ ހޯދުމުގެ ޝައުޤުވެރިކަން ޕީއެސްވީ އަދި އަޔެކްސް އިން ވެސް ފާޅުކޮށްފައި ވަނިކޮށެވެ. ވައިނަލްޑަމް ހޯދުމަށް އެންމެ ބޮޑަށް ބާރު އެޅީ އަލް އިއްތިފާގުގެ ކޯޗު ސްޓީވެން ޖެރާޑް އެވެ. ޖެރާޑާއި ވައިނަލްޑަމް ވަނީ އެކުގައި ލިވަޕޫލަށް ކުޅެފަ އެވެ. އޭގެ އިތުރުން ލިވަޕޫލްގެ ކުރީގެ ކެޕްޓަން ޖޯޑަން ހެންޑަސަން ވެސް އަންނަނީ އަލް އިއްތިފާގަށް ކުޅެމުންނެވެ.

ފެޔެނޫޑް އިން ސީނިއާ ކެރިއަރު ފެށި ވައިނަލްޑަމް ވަނީ، ޕީއެސްވީ، ނިއުކާސަލް ޔުނައިޓެޑު، ލިވަޕޫލް އަދި ޕީއެސްޖީ އަށް ވެސް ކުޅެފަ އެވެ. ލިވަޕޫލުން 2016 ވަނަ އަަހަރު އޭނާ ހޯދީ ނިއުކާސަލްގައި ދެއްކި ކުޅުމުގެ ސަބަބުންނެވެ. އޭގެ ފަހުން ވައިނަލްޑަމް ވަނީ ލިވަޕޫލަށް 237 މެޗު ކުޅެދީ 22 ލަނޑު ޖަހައިފަ އެވެ. އެއަށްފަހު އޭނާ ޕީއެސްޖީ އަށް ބަދަލުވީ 2021 ވަނަ އަހަރު އެވެ. ޕީއެސްޖީގައި އޭނާ ވަނީ 38 މެޗުން ތިން ލަނޑު ޖަހައިފަ އެވެ. ރޯމާ އަށް އޭނާ ވަނީ 23 މެޗުން ދެ ލަނޑު ޖަހައިދީފަ އެވެ.

ވައިނަލްޑަމް އަންނަނީ 2011 ވަނަ އަހަރުން ފެށިގެން ނެދަލެންޑްސް ޤައުމީ ޓީމަށް ވެސް ކުޅެމުންނެވެ. މިހާތަނަށް އޭނާ ވަނީ ޤައުމީ ޓީމަށް 90 މެޗު ކުޅެދީ 27 ލަނޑު ޖަހައިފަ އެވެ. އަނިޔާގެ ސަބަބުން ވައިނަލްޑަމް އަށް ވަނީ މިދިޔަ އަހަރު ޤަތަރުގައި ކުރިއަށް ދިޔަ ފީފާ ވޯލްޑް ކަޕް ކުޅެވޭ ގޮތް ނުވެފަ އެވެ.