ގެޓާފޭ ކައިރިން ފަހު ވަގުތު ރެއާލް މޮޅު ކޮށްދިނީ ބެލިންހަމް

ސްޕެނިޝް ލީގުގައި ގެޓާފޭއާ ދެކޮޅަށް ކުޅުނު މެޗުން ފަހު ވަގުތު ރެއާލް މެޑްރިޑު މޮޅުވެއްޖެ އެވެ.

ހޮނިހިރު ދުވަހުގެ ރޭ ރެއާލްގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ގެޓާފޭ އިންނެވެ. މެޗުގެ 11 ވަނަ މިނެޓުގައި ގެޓާފޭ އަށް ލީޑު ނަގައިދިނީ ބޯހާ މަޔޮރާލް އެވެ. މަޔޮރާލް އަށް ލިބުނު ފުރުސަތުގައި އެނާ ބޯޅަ ގޯލަށް ވައްދާލީ ރެއާލްގެ ގޯލުގައި ހުރި ކެޕާ އަރިއްޒަބަލާގާ ކައިރިން ނައްޓާލުމަށްފަހު އެވެ. ފުރަތަމަ ހާފުގައި ރެއާލުން ނަތީޖާ ހަމަހަމަ ކުރުމަށް މަސައްކަތް ކުރި ނަމަވެސް، އެކަން ކާމިޔާބުވާ ގޮތެއް ނުވި އެވެ. ރެއާލުން މެޗުގެ ނަތީޖާ ހަމަހަމަ ކުރީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން ދެ ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ ހޮސޭލޫ އެވެ. މެޗުން ރެއާލް މޮޅުކޮށްދިން ލަނޑު، ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޖެހީ ޒުވާން ކުޅުންތެރިޔާ ޖޫޑް ބެލިންހަމް އެވެ. މިއީ ރެއާލަސް ބަދަލުވި ފަހުން ބެލިންހަމް އެ ޓީމަށް ޖަހައިދިން ފަސް ވަނަ ލަނޑެވެ. ރެއާލްގައި އޭނާ އަންނަނީ މޮޅު ކުޅުމެއް ދައްކަމުންނެވެ.

މޮޅާއެކު ރެއާލް އެއް ވަނައިގައި އޮތީ ކުޅުނު 12 މެޗުން ހަތަރު ޕޮއިންޓާއެކު އެވެ. ލީގުގައި ދެން އެ ޓީމަށް އޮންނާނީ ސެޕްޓެމްބަރު މަހުގެ 16 ވަނަ ދުވަހު ރެއާލް ސޮސިއެޑާޑާ ދެކޮޅަށް ކުޅޭ މެޗެވެ.