ލޯނު އެއްބަސްވުމެއްގެ ދަށުން، ފެލިކްސްއާއި ކަންސޭލޯ ބާސެލޯނާއަށް

އެތުލެޓިކޯ މެޑްރިޑަށް ކުޅެމުން އަންނަ ޕޯޗުގަލްގެ ޔާއޯ ފެލިކްސްއާއި މެންޗެސްޓަރ ސިޓީއަށް ކުޅެމުން އަންނަ ޕޯޗުގަލްގެ ޔާއޯ ކަންސޭލޯ ސްޕެއިންގެ ބާސެލޯނާއަށް ބަދަލުވެއްޖެއެވެ.

ދެ ކުޅުންތެރިން ވެސް ބާސެލޯނާއަށް ބަދަލުވީ ލޯނު އެއްބަސްވުމެއްގެ ދަށުންނެވެ. ދެ ކުޅުންތެރިންގެ އެއްބަސްވުމުގައި ވެސް ދާއިމީ ގޮތެއްގައި ހޯދޭ މާއްދާ ހިމަނާފައެއް ނުވެއެވެ. ސަބަބަކީ ބާސެލޯނާގެ މާލީ މައްސަލަތަކާ ގުޅިގެންނެވެ. މިހާރު ކުރިއަށްދާ ސީޒަން ނިމުމާއެކު، ދެ ކުޅުންތެރިން އެނބުރި އެތުލެޓިކޯ އަދި ސިޓީއަށް ބަދަލުވާނެއެވެ.

ބާސެލޯނާއަށް ބަދަލުވެ ވާހަކަ ދައްކަމުން ކަންސޭލޯ ބުނީ، މިއީ އޭނާގެ ފުޓުބޯޅަ ކެރިއަރުގައިވެސް އެންމެ އުފާވެރި އެއް ދުވަހަށް ވާނެ ކަމަށެވެ. ސަބަބަކީ ބާސެލޯނާއަކީ ކުޑައިރުން ފެށިގެންވެސް އޭނާގެ ހުވަފެނީ ކުލަބެއް ކަމަށާއި، އެ ކުލަބުގެ ޖާޒީގައި ކުޅުމުގެ ފުރުސަތު ލިބުމުން ކަމަށްވެސް ކަންސޭލޯ ވަނީ ބުނެފައެވެ. ކަންސޭލޯގެ އިތުރުން ފެލިކްސްވެސް ބުނީ، ބާސެލޯނާއަކީ އޭނާ އަބަދުވެސް ވަރަށް ގަޔާވާ، އަދި ކުޅޭ ހިތްވާ ކުލަބެއް ކަމަށެވެ. އޭނާ ބުނީ، ބޭނުންވަނީ ބާސެލޯނާގައި މޮޅު ކުޅުމެއް ދައްކައި، ކުލަބާއެކު ގިނަ ކާމިޔާބީތަކެއް ހޯދުމަަށް ކަމަށެވެ.

އައު ސީޒަނަށް ބާސެލޯނާއިން ވަނީ ސިޓީގެ ކެޕްޓަން އިލްކާއީ ގުންޑޮގާންގެ ސޮއިވެސް ހޯދާފައެވެ. ބާސެލޯނާއިން ވަނީ ޓްރާންސްފަރ މާކެޓުގައި ކުލަބު ވަރުގަދަ ކުރުމަށް ގިނަ މަސައްކަތްތަކެއް ކޮށްފައެވެ. އެގޮތުން އައު ކުޅުންތެރިން ގެނައުމަށް، އެ ކުލަބުން ވަނީ ބައެއް ކުޅުންތެރިން ދޫވެސްކޮށްލާފައެވެ.