މާލޭގައި ދިރިއުޅޭ މީހުން ފަތަން ރަސްފަންނު ސަރަހައްދުގައި ނަޖިސް ފެންގަނޑެއް ހެދީ ކާކުތޯ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ރިޔާސީ ކެމްޕޭނުގެ ތަރުޖަމާނު މާރިޔާ އަހުމަދު ދީދީ ވާހަކަދައްކަވަނީ
ޕީއެންސީގެ ރިޔާސީ ކެންޑިޑޭޓު ޑރ.މުހައްމަދު މުއިއްޒަށް ވަރަށް ބޮޑަށް ފާޑުވިދާޅުވެ، ގިނަ ސުވާލުތަކެއް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ރިޔާސީ ކެމްޕޭނުގެ ތަރުޖަމާނު މާރިޔާ އަހުމަދު ދީދީ ޑރ. މުއިއްޒަށް އަމާޒުކުރައްވައިފިއެވެ.
ހުކުރު ދުވަހުގެ ރޭ ކުރިއަށް ދިޔަ އުފާވެރި މާލެ ޖަލްސާގައި މާރިޔާ ވަނީ މުއިއްޒަށް އަމާޒުކުރައްވާ ގިނަ ސުވާލުތަކެއް ކުރައްވާފައެވެ.
އެކަމަނާ ކުރެއްވި ސުވާލުތަކަކީ މާލޭގައި ދިރިއުޅޭ މީހުން ފަތަން ރަސްފަންނު ސަރަހައްދުގައި ނަޖިސް ފެންގަނޑެއް ހެދީ ކާކުތޯއާއި، އެތައް ވަރަކަށް މީހުން ކިޔަކިޔާ ތިއްބާ މޮޅު އިންޖިނޭރެކޭ ބުނެ މާލޭގެ ދެކުނު ފަރާތުގައި ނެރެއް ކަނޑާ މަތިމައްޗަށް އެ ހިންގި އެކްސިޑެންޓްތަކާއި ރައްޔިތުންނަށާއި، އެމީހުންގެ އަގުބޮޑު މުދަލަށް ވީ ގެއްލުމަށް ޒިންމާވާންޖެހޭނީ ކާކުތޯއާއި، ގުޅިފަޅުގައި އެޅި ފްލެޓްތަކުގެ އަހުލުވެރިން ކޯޓު އަމުރަކާ ނުލައި އެސްއޯ ފުލުހުން ލައްވާ ގަދަކަމުން ބޭލީ ކާކުތޯއާއި، ބޮޑުއަގު ދީފައި ގެނައީ ބޭނުންނުކުރެވޭ މަހާޖައްރާފަށް ޒިންމާނަގަންޖެހޭނީ ކާކުތޯއާއި، މާލޭގެ ޕާކިންއަށް ހައްލެކޭ ބުނެ، ބޮޑު އަގުގައި ގެނައި ބާ ދަގަނޑުގެ ގޮތުގައި ވެސް ބޭނުންނުކުރެވޭ އަގުބޮޑު ލިފްޓުތަކަށް ޒިންމާވާންޖެހޭނީ ކާކުތޯއާއި، އެންމެ ޒަމާނީ ހައުސިން ކަމަށް ބުނެ، ރައްޔިތުންނަށް ހުވަފެން ދައްކާ 600 އަކަފޫޓު ހަމަނުވާ ފްލެޓް ނުއަގުގައި އަޅައި، އެއިން ކޮންމެ ޓަވަރެއްގައި ދިރިއުޅޭ އެތައް ހާސް ބަޔަކަށް އެންމެ ތިން ހަތަރު ފްލެޓް ދިނީ ކާކުތޯ އަދި އިސްލާމީ މަރުކަޒުގައި ޖެހި މާބުލް ކަމަށް ބުނެ، ޖެހި ޓައިލްތަކުން އެތައް ބަޔަކަށް ހާނިއްކަވަމުން އަޅާނުލާ ދުވަސްކޮޅެއްފަހުން އެތަނުގައި ރެދުލައި ހަލާކުވުމުން އެއީ ފެންވަރު ދަށް ޓައިލްކަމަށް ބުނެ ދެވަނަ ފަހަރަށް ބޮޑު އަގުގައި ޓައިލްޖެހީ ކާކުތޯ ކަމަށް އައްސަވާފައިވެއެވެ.
މިސަރުކާރަށް އަމާޒުކުރައްވައި މާރިޔާ ވިދާޅުވީ ތާހިރު ދިރިއުޅުން ޖަޒީރާ ރާއްޖެ، އުފާވެރި އާމާން ރާއްޖެ މިއީ ރައީސް އިބްރާހިމް މުހައްމަދު ސާލިހު ވޯޓު ހޯއްދަވަން ބޭނުންފުޅު ކުރައްވާ ހަމައެކަނި ސްލޯގަންތަކެއް ނޫން ކަމަށެވެ.
މާރިޔާ ވިދާޅުވީ 9 ސެޕްޓެންބަރުގައި ވޯޓުލާއިރު ރައްޔިތުންނަށް ދެގޮތެއް އިހުތިޔާރު ކުރެވިދާނެ ކަމަށެވެ.
ރައްޔިތުން ބޭނުންވަނީ ހުދުމުހުތާރުކަމާއި، އަނިޔާވެރިކަމާއި، މިނިވަން މުއައްސަސާތަކުގެ ބާރު ކަނޑުވާލައި ހިޔާލުފާޅުކުރުމާއި، ނޫސްވެރިކަމުގެ މިނިވަންކަން ގެއްލުވާލައި މަޖިލިސް ބަންދުކޮށް، މަޖިލިސް މެންބަރުކަން ގެއްލުވާލައި، އެތައް ހާސް ރަައްޔިތެއްގެ އަޑު ކަނޑުވާލައި އުއްތަމަފަނޑިޔާރާއި، ސުޕްރިކޯޓުގެ ފަނޑިޔާރުން ހައްޔަރުކޮށް ރައްޔިތުންގެ މައްޗަށް ވެރިވެގަންނާނެ ވެރިއެއްތޯ މާރިޔާ ސުވާލުކުރެއްވިއެވެ. ނުވަތަ ހުލުގުހެޔޮ އޯގާތެރި ރައްޔިތުންގެ އަޑުއަހާ ރައްޔިތުންގެ އިހުސާސްތައް ދެނެގަނެ، ރައްޔިތުންގެ ތަކުލީފުތަކަށް ތަސައްލީއެއް ގެނެސްދޭނެ ވެރިއެއްތޯ ވެސް ސުވާލު އުފައްދާފައިވެއެވެ.
މާރިޔާ ވިދާޅުވީ ރާއްޖެއިން ފެންނަމުންދާ މަންޒަރުތަކުން މިއަދު ރައްޔިތުން ބޭނުންވާނީ އޯގާތެރި ހެޔޮވެރިކަމެއް ކަމެއްކަން ސާފުވާ ކަމަށެވެ. އިދިކޮޅު ފަރާތްތަކަށް އަމާޒުކުރައްވައި މާރިޔާ ވިދާޅުވީ މުސްތަގުބަލަށް ވިސްނުމަށްފަހު ވޯޓުލާން ޖެހޭ ކަމަށެވެ. އަދި ރިޝްވަތުގެ ފައިސާފޮއްޗަކަށް ވޯޓު ވިއްކާނުލުމަށް ވެސް މާރިޔާ ވަނީ އިލްތިމާސްކުރައްވާފައެވެ.
