ހުވަފެނަކީ ބިލާހެއް ނޫންކަން މިދިޔަ ފަސް އަހަރު ފެނިގެންގޮސްފި: ޖެންޑަރ މިނިސްޓަރު
މި ސަރުކާރުން ކަންކަން ކުރީ ވޯޓު ހޯދާކަށްނޫން
ޖެންޑަރ މިނިސްޓަރު ކޮލަމްބޯގައި ބޭއްވި ޖަލްސާގައި ވާހަކަފުޅުދައްކަވަނީ
ހުވަފެނަކީ ބިލާހެއް ނޫންކަން މިދިޔަ ފަސް އަހަރު ފެނިގެންގޮސްފައިވާ ކަމަށާއި ނުވާނެކަމަށް ބުނި އެތައް ކަމެއް މި ސަރުކާރުން ކޮށްފައިވާ ކަމަށް މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް، އާއިޝަތު މުޙައްމަދު ދީދީ ވިދާޅުވެއްޖެއެވެ.
ލަންކާގެ ކޮލަމްބޯގައި ބުރާސްފަތި ދުވަހުގެ ރޭ ބޭއްވި "އުފާވެރި އަމާން ރާއްޖެ" ޖަލްސާގައި ވާހަކަފުޅުދައްކަވަމުން ޖެންޑަރ މިނިސްޓަރު ވިދާޅުވީ 17 ނޮވެމްބަރު 2018 ވަނަ ދުވަހު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ހުވާކުރެއްވުމުގެ ރަސްމިއްޔާތުގައި، އެމަނިކުފާނަށް ވޯޓު ނުދެއްވާ ރައްޔިތުންނަށް ވެސް ތަފާތު ކުރެއްވުމެއް ނެތި ޚިދުމަތް ކުރައްވާނެ ކަމަށް ވިދާޅުވި ކަމަށާއި އެކަން ފާއިތުވި ފަސް އަހަރު ތެރޭ ޚިދުމަތް ދިނުމުގައި އާއި ބަދަލުތަކުން ފެނިގެންގޮސްފައިވާ ކަމަށެވެ. އެގޮތުން، 2020 ވަނަ އަހަރު މިނިސްޓަރުކަމާ ހަވާލުވެވަޑައިގެންނެވިއިރު ރާއްޖޭގެ ރަށްތަކުގައި ދިރިއުޅޭ ފަރާތްތަކަށް ޚިދުމަތް ދޭން ޖެހޭނީ މާލޭގައި ތިބެގެން ކަމަށާއި މި ސަރުކާރުން ކުރި މަސައްކަތުގެ ސަބަބުން މިއަދު ރާއްޖޭގެ 100 އަށްވުރެ ގިނަ ރަށްތަކުގައި އިބަމަ (އިޖުތިމާއީ ބަދަހި މަދަދުވެރިން) ގާއިމް ކުރެވިފައިވާ ކަމަށް ވިދާޅުވިއެވެ.
އާސަންދައާއި އެންސްޕާގެ މަސައްކަތްތައް ހަލުވިކަމާއެކު ކުރިއަށްދާކަން ފާހަގަކުރައްވައި މިނިސްޓަރު ވިދާޅުވީ އެއީ 2020 ވަނަ އަހަރު ރާއްޖޭގެ ރަށްތަކުގައި ދިރިއުޅެމުން އަންނަ ފަރާތްތަކުގެ ހާލަތު ދެނެގަތުމަށް ކުރެވުނު މަސައްކަތުގެ ނަތީޖާ ކަމަށާއި އެ ޚިދުމަތްތައް ދިނުމުގައި ވެސް ރައީސް ވިދާޅުވި ފަދައިން އެއްވެސް ރައްޔިތަކު ތަފާތު ކޮށްފައިނުވާނެ ކަމަށެވެ.
މިނިސްޓަރު ވިދާޅުވީ ޖެންޑަރ މިނިސްޓަރީންކޮށްފައިވާ ކަންކަމުގެ އަގުވަޒަންކުރާނީ އެ ޚިދުމަތް ލިބުނު ފަރާތްތައް ކަމަށެވެ. އެގޮތުން، ނުކުޅެދުންތެރިކަން ހުންނަ ފަރާތްތަކުގެ ޤާނޫނުގައި ގިންތި ކުރުމުގެ ގަވާއިދު ހެދީ މި ސަރުކާރުން ކަމަށާއި އެއާއެކު މިއަހަރު އިނާޔަތްތައް ބޮޑު ކުރި ނަމަވެސް އެއީ ވަރަށް ގިނަ ދުވަހުގެ މަސައްކަތްކަން އޭނާ ފާހަގަކުރެއްވިއެވެ.
މިނިސްޓަރު ވިދާޅުވީ ނުކުޅެދުންތެރިކަން ހުންނަ މީހުންގެ ލިސްޓުގައި މި ސަރުކާރު އައިއިރު ތިބީ 8000 މީހުން ކަމަށާއި ނަމަވެސް މިހާރު ލިސްޓުގައި 12،000 ގާތްކުރާ އަދަދަކަށް މީހުން އެބަތިބި ކަމަށެވެ. އަދި ކުރިން 23 މިލިއަން ބަޖެޓުގައި އެ ފަރާތްތަކަށް ހާއްސަކޮށްފައި އޮތްއިރު މިހާރު 200 މިލިއަނާ ގާތް ކުރާކަމަށް ވިދާޅުވިއެވެ.
ކުރިއަށް އޮތް ފަސް އަހަރަށް ރައީސް ޞާލިހުގެ މެނިފެސްޓޯގައި ގިނަ ސިޔާސަތުތަކެއް ހުރިކަން ފާހަގަކުރައްވައި މިނިސްޓަރު ވިދާޅުވީ އެ ސިޔާސަތުތަކުން އެކި އުމުރުފުރާތަކުގެ މީހުންނަށް ބޭނުންވާނެ ދިރިއުޅުން ތަފްސީލުކޮށް ހާމަވާ ކަމަށެވެ. އަދި އެމަނިކުފާނު ދެވަނަ ދައުރަކަށް ހޮވިވަޑައިގެން މި ސިޔާސަތުތައް ހަގީގަތަކަށް ވެގެންދިއުމުން ރާއްޖޭގެ ކޮންމެ ރައްޔިތެއްގެ ހަޔާތަށް ހެޔޮ ބަދަލު އަންނާނެ ކަމަށް ވެސް ވިދާޅުވިއެވެ. އެހެންކަމުން ވަރަށް ބޮޑަށް ވިސްނުމަށްފަހު ވޯޓުލުމަށް މިނިސްޓަރު އިލްތިމާސްކުރެއްވިއެވެ.
