ސެޕްޓެމްބަރު މަހުގެ 9 ވަނަ ދުވަހު އޮންނަ ރިޔާސީ އިންތިޚާބުގައި ވޯޓުލާ މަރުކަޒުތަކަށް ފޮނުވަންޖެހޭ ތަކެތި މާލެ އަތޮޅު ފިޔަވައި ހުރިހާ އަތޮޅަކަށް ފޮނުވާ ނިންމާފައިވާކަމަށް އިލެކްޝަންސް ކޮމިޝަން(އީސީ)ން ބުނެފިއެވެ.

އެކަމާއި ގުޅޭގޮތުން އީސީގެ ނާއިބު ރައީސް އިސްމާއީލު ހަބީބު ވިދާޅުވީ ވޯޓުލާ މަރުކަޒުތަކަށް ފޮނުވަންޖެހޭ ލިޔެކިޔުންތަކާއި، ސެކިޔުރިޓީ ސާމާނު ހިފައިގެން އިލެކްޝަންސް ކޮމިޝަންގެ އޮފިޝަލުން ދިވެހިފުލުހުންގެ އެހީތެރިކަމާއެކު ދެކުނުގެ އަތޮޅުތަކަށް ބުރާސްފަތި ދުވަހުގެ ހެނދުނު ފުރާފައިވާކަމަށެވެ. މިއާއެކު މާލެއަތޮޅު ފިޔަވައި، ރާއްޖޭގެ ހުރިހާ އަތޮޅަކަށް ފޮނުވަންޖެހޭ ތަކެތި ފޮނުވާ ނިމިފައިވާކަމަށް ހަބީބު ވިދާޅުވިއެވެ. އަދި މާލެ އަތޮޅަށް ތަކެތި ފޮނުވަން ހަމަޖެހިފައިވަނީ ސެޕްޓެމްބަރު 4 ވާ ހޯމަ ދުވަހުކަމަށް ހަބީބު ވިދާޅުވިއެވެ.

އީސީން ގެންދަނީ އިންތިޚާބު އޮންނަ ދުވަހު ވޯޓުލާ މަރުކަޒުތަކުގައި ހަރަކާތްތެރިވާނެ އޮފިޝަލުން ތަމްރީން ކުރުމުގެ މަސައްކަތް މިހާރު ކުރަމުންނެވެ.

އިންތިޚާބަށް ބޭނުންވާ ތަކެތި އަތޮޅުތަކަށް ފޮނުވާފައިވާއިރު އިންތިޚާބުގެ ސަލާމަތީ ކަންކަން ބަލަހައްޓަމުންދާ ފުލުހުންވެސް ބުދަ ދުވަހު ވަނީ އަތޮޅުތަކަށް ފުރަންފަށާފައެވެ.

މިފަހަރުގެ އިންތިޚާބުގައި 574 ވޯޓު ފޮށި ބަހައްޓައެވެ. އެގޮތުން މާލެ ސަރަހައްދުގައި 176 ފޮށި ބަހައްޓާނެއެވެ. އެއީ މާލޭގައި 142 ފޮށި، ހުޅުމާލޭގައި 27 އަދި ވިލިމާލޭގައި 7 ވޯޓު ފޮއްޓެވެ. އަތޮޅުތަކާއި ސިޓީތަކުގައި 319 ވޯޓު ފޮށި ބަހައްޓާއިރު, ޖަލުތަކުގައި 5 ވޯޓު ފޮށި ބަހައްޓައެވެ. ސިނާއީ ސަރަހައްދުތަކުގައި 1 ވޯޓު ފޮށި ބަހައްޓާއިރު ރިސޯޓްތަކުގައި 65 ވޯޓު ފޮށި ބަހައްޓާނެއެވެ. އަދި ރާއްޖެއިން ބޭރުގައި 8 ވޯޓު ފޮށި ބަހައްޓާނެއެވެ.

މިއަހަރު ބާއްވާ ރިޔާސީ އިންތިޚާބުގައި 282،755 މީހުންނަށް ވޯޓުލުމުގެ ހައްގު ލިބިފައިވާކަމަށް އީސީން ބުނެއެވެ.

މިއަހަރުގެ އިންތިޚާބުގައި 8 ކެންޑިޑޭޓުން ވާދަކުރައްވައެވެ.