ދީނާ ޚިލާފު ކްލާސްތަކެއް އިޝްތިހާރުކުރި މައްސަލާގައި 2 މީހުން ހައްޔަރުކޮށްފި
31 އޯގަސްޓު 2023 | ބުރާސްފަތި 13:51ހައްޔަރުކުރި އެކަކީ ޓުއަރިސްޓް ވިސާގައި ރާއްޖެ އައިސް ހުރި އިންޑިއާ މީހެއް
ފުލުހުންގެ މައި އިދާރާ
ދިރިއުޅުމުގައި ދިމާވާ މައްސަލަތަކަށް, އިސްލާމް ދީނާ ޚިލާފު ރޫހާނީ ހައްލެއް ހޯދަން ދަސްކޮށްދޭ ކްލާސްތަކެއް ހިންގާކަމަށް ބުނެ ސޯޝަލް މީޑިއާގައި ކޮށްފައިވާ ޕޯސްޓްތަކުގެ މައްސަލާގައި ދެ މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.
ފުލުހުން ބުނީ ޓުއަރިސްޓް ވިސާގައި ރާއްޖެ އައިސް ހުރި އިންޑިއާ މީހަކު، ދިމާވާ ގޮންޖެހުންތަކަށް ރޫހާނީ ހައްލު ހޯދަން ދަސްކޮށްދޭ ކްލާސްތަކެއް ހިންގާކަމަށް ބުނެ ސޯޝަލް މީޑިއާގައި ޕޯސްޓްތަކެއް ކޮށްފައިވާކަން، އެ އިދާރާގެ ސަމާލުކަމަށް އައިސްފައިވާކަމަށެވެ. އަދި ފުލުހުންގެ ސަމާލުކަމަށް އެކަން އައުމާއެކު، އެމީހާއާއި އެކަމުގައި ބައިވެރިވާކަމަށް ބެލެވޭ އިތުރު މީހަކު ފުލުހުންގެ ބެލުމުގެ ދަށަށް ގެންގޮސްފައިވާކަމަށް ފުލުހުން ވަނީ ބުނެފައެވެ.
އަދި އެކަމާ ގުޅޭގޮތުން މައުލޫމާތު ސާފުކުރުމުގެ މަސައްކަތް ކުރަމުންދާކަަމަށް ފުލުހުން ވަނީ ބުނެފައެވެ.
ފުލުހުން ބުނީ މި މައްސަލައަކީ ދިވެހިރާއްޖޭގެ ދީނީ އެއްބައިވަންތަކަން ހިމާޔަތްކުރުމާބެހޭ ގާނޫނާއި އިމިގްރޭޝަން ގާނޫނާއި ޚިލާފު ކަމަކަށް ވާތީ، ކަމާގުޅޭ އިދާރާތަކާ ގުޅިގެން އަޅަންޖެހޭ ފިޔަވަޅުތައް ފުލުހުން އަޅާނެ ކަަމަށެވެ.
