ގެބޯންގެ ރައީސް އަލީ ބޮންގޯ ގޭ ބަންދުކޮށް، އެގައުމުގެ އަސްކަރިއްޔާއިން ވެރިކަމާ ހަވާލުވެއްޖެއެވެ.

ގެބޯންގެ ވެރިކަން އަތުލައި ރައީސް ބޮންގޯ ގޭބަންދުކޮށްފައި ވާކަން އެގައުމުގެ އަސްކަރިއްޔާއިން އިއުލާނުކޮށްފައިވަނީ އަންގާރަ ދުވަހުގެ ދަންވަރު، ޓީވީ މެދުވެރިކޮށެވެ.

ގެބޯންގެ އަސްކަރިއްޔާއިން އެގައުމުގެ ވެރިކަން އަތުލާފައި މިވަނީ އެގައުމުގެ ރިޔާސީ އިންތިޚާބު ބޮންގޯ ކާމިޔާބުކޮށް ތިންވަނަ ފަހަރަށް ބޮންގޯއަށް ވެރިކަން ލިބިފައިވާކަން އެގައުމުގެ އިންތިޚާބީ މަރުކަޒުން އިއުލާނުކޮށްފައި ވަނިކޮށެވެ.

އެގައުމުގެ ރައީސްގެ ގެކޮޅުގައި ތިބެ، ޓީވީ މެދުވެރިކޮށް ދިން ބަޔާނުގައި އަސްކަރިއްޔާގެ އޮފިޝަލުން ވަނީ އިންތިޚާބުގެ ނަތީޖާ ކެންސަލްކޮށްފައި ވާކަމަށް ބުނެފައެވެ. އަދި އެ އިންތިޚާބަކީ ދެފުށް ފެންނަ، އިތުބާރު ހިފޭ އިންތިޚާބެއް ނޫންކަމަށްވެސް ވަނީ ބުނެފައެވެ. ގައުމުގެ ބޯޑަރުތައް ބަންދުކޮށް، ސަރުކާރުގެ އިދާރާތައް ވެސް އުވާލާފައި ވާކަމަށާއި، ގައުމުގެ ހުރިހާ ކަމެއްވެސް ދެން ބަލަހައްޓާނީ އަސްކަރިއްޔާއިން ކަމަށް ވަނީ ބުނެފައެވެ.

މިއޮފިސަރުން މިހާރު ވަނީ އެމީހުންނަކީ ގެބޯންގެ 'ދަ ކޮމިޓީ އޮފް ޓްރާންސިޝަން އެންޑް ދަ ރެސްޓޮރޭޝަން އޮފް އިންސްޓިޓިއުޝަންސް' ގެ މެމްބަރުކަމަށް ބުނެފައެވެ. އަދި ގެބޯން މިވަގުތު އޮތީ އިދާރީ، ސިޔާސީ، އިގުތިސާދީ އަދި އިޖުތިމާއީ 'ކްރައިސިސް'އެއްގެ ތެރޭގައިކަމަށް އޮފިޝަލުން ވަނީ ސިފަކޮށްފައެވެ.

އަސްކަރިއްޔާގެ ބަޔާނަށްފަހު ވެރިރަށުގައި ބަޑީގެ އަޑު އިވިފައިވާކަަމަށް ރިޕޯޓުތައް ބުނެއެވެ. ނަމަވެސް، އެއްވެސް ހަމަނުޖެހުމެއް އެގައުމުގެ މަގުތަކުގައި ހިނގާފައެއް ނުވެއެވެ.

ބުދަ ދުވަހުގެ ހެނދުނު އެތައް ސަތޭކަ އާންމުންނެއް ވަނީ އެގައުމުގެ ވެރިކަން ބަދަލުކުރެވުނުކަމުގެ އުފާ ފާޅުކުރުމަށް މަގުތައް މައްޗަށް ނުކުމެފައެވެ. ގެބޯން އަސްކަރިއްޔާގެ މި ބަޣާވާތް ކާމިޔާބުވެއްޖެނަމަ، ގެބޯން ވެގެންދާނީ ހުޅަނގު އަދި މެދުތެރޭ އެފްރިކާގައި 2020 ވަނަ އަހަރުގެ ފަހުން ބަޣާވާތަކުން ވެރިކަން ވައްޓާލި އަށްވަނަ ގައުމަށެވެ.

މިދިޔަ ޖުލައި މަހު ނައިޖަރގެ އަސްކަރިއްޔާއިން ވަނީ އެގައުމުގެ ވެރިކަން ވައްޓާލައި ގައުމުގެ ވެރިކަމާ ހަވާލުވެފައެވެ. މާލީ، ބުރްކީނާ ފާސޯ، ޗާޑް އަދި ގިނީގެ އަސްކަރިއްޔާއިން ވަނީ އެގައުމުތަކުގައި ބަޣާވާތްކޮށް ގައުމުގެ ވެރިކަން އަތުލައިފައެވެ.

ގެބޯންގެ ވެރިކަމާ، ބޮންގޯ ހަވާލުވެވަޑައިގެންފައި ވަނީ 2009 ވަނަ އަހަރުއެވެ. އޭގެ ކުރިން 1967 ވަނަ އަހަރުން ފެށިގެން އެގައުމުގައި ވެރިކަން ކުރައްވާފައިވަނީ ބޮންގޯގެ ބައްޕާފުޅު، އޮމަރެވެ.

އެގައުމުގެ ސަރުކާރާ އިދިކޮޅު ފަރާތްތަކުން ވަނީ ބޮންގޯގެ އާއިލާއިން ގައުމުގެ ވެރިކަން ކުރިއިރު، ގައުމުގެ ތެޔޮވަޅުތަކުން ލިބޭ ފައިދާ އާންމުންނާ އެއްވެސް ވަރަކަށް ހިއްސާކޮށްފައި ނުވާކަމަށެވެ. ގެބޯންއަކީ ތެލުގެ މުއްސަނދިކަން ލިބިފައިވާ ގައުމެކެވެ.

އުމުރުން 64 އަހަރުގެ ބޮންގޯ އެންމެ ފަހުން ފެނިފައިވަނީ ރިޔާސީ އިންތިޚާބުގައި ވޯޓުލެއްވުމަށް ނުކުމެ އުޅުއްވަނިކޮށެވެ. އޭގެ ފަހުން އާންމުންނަށް ބޮންގޯ ފެނިފައެއް ނުވެއެވެ.

ގެބޯންގައި ކުރިއަށް ގެންދިޔަ ބަޣާވާތަށްފަހު އެގައުމުގެ އަސްކަރިއްޔާއިން ގައުމުގެ ވެރިކަމާ ހަވާލުވުމުން، ފްރާންސްގެ އަސްކަރިއްޔާއިން އެސަރަހައްދުގައި ހަރަކާތްތެރިވަމުންދާ ދިއުމާ ގުޅިގެން އިތުރު ސުވާލުތަކެއް ވަނީ އުފެދެން ފަށާފައެވެ. ފްރާންސް އަސްކަރިއްޔާގެ 350އެއްހާ އޮފިސަރުން ގެބޯންގައި ހަރަކާތްތެރިވަމުންދެއެވެ.

ފްރާންސްގެ ބޮޑުވަޒީރު އެލިސަބެތު ބޯރން ވަނީ އެގައުމުން ގެބޯންގެ ހާލަތު ވަރަށް ގާތުން މޮނިޓަރ ކުރަމުންދާކަމަށް ވިދާޅުވެފައެވެ.

މީގެކުރިން، މާލީއާއި ބުރްކީނާ ފާސޯގައި ހިންގި ބަޣާވާތްތަކަށްފަހު އެގައުމުގެ އަސްކަރިއްޔާތަކުން ވަނީ އެގައުމުތަކުގައި ހަރަކާތްތެރިވަމުންދިޔަ ފްރާންސްގެ އަސްކަރީ އޮފިސަރުން އެގައުމުތަކުން ބަލާފައެވެ. އަދި ނައިޖަރއިންވެސް މިހާރު ވަނީ އެގައުމުން ފްރާންސާއެކު ހަދާފައިވާ އަސްކަރީ އެއްބަސްވުން އުވާލާފައެވެ.

ގެބޯންގެ ހާލަތާ ގުޅިގެން، ޗައިނާގެ ފޮރިން މިނިސްޓްރީން ވަނީ މިކަންތައް ސުލްހަވެރިކަމާއެކު ހައްލުކުރަން ގޮވާލާފައެވެ. އަދި ބޮންގޯގެ ރައްކާތެރިކަން ކަށަވަރުވާންޖެހޭނެ ކަމަށްވެސް ޗައިނާގެ ފޮރިން މިނިސްޓްރީން ވަނީ ބުނެފައެވެ.

ރަޝިއާއިންވެސް ވަނީ ކަމާ ގުޅިގެން ކަންބޮޑުވުން ފާޅުކޮށް، ވީހާވެސް އަވަހަކަށް ގައުމުގެ ހާލަތު ހަމަޔަކަށް އެޅިގެންދާނެ ކަމަށް އުންމީދުކުރާކަމަށް ރަޝިއާގެ ފޮރިން މިނިސްޓްރީން ވަނީ ބުނެފައެވެ.