ވަޔެކާނޯ ކޮޅަށް ހަތް ލަނޑު ޖަހައިގެން އެތުލެޓިކޯ އަށް ބޮޑު މޮޅެއް

ސްޕެނިޝް ލީގުގައި ރަޔޯ ވަޔެކާނޯއާ ދެކޮޅަށް ކުޅުނު މެޗުން އެތުލެޓިކޯ މެޑްރިޑު މޮޅުވެއްޖެ އެވެ.

ހޯމަ ދުވަހުގެ ރޭ ވަޔެކާނޯގެ ދަނޑުގައި ކުޅުނު މެޗު އެތުލެޓިކޯ އިން ކާމިޔާބު ކުރީ 7-0 ގެ ބޮޑު ތަފާތަކުންނެވެ. މެޗުގެ ފުރަތަމަ ހާފުގައި އެތުލެޓިކޯ އިން ވަނީ ތިން ލަނޑު ޖަހައި، މެޗުގެ ފުރިހަމަ ކޮންޓްރޯލް ހޯދައިފަ އެވެ. އެ ޓީމުގެ އަނެއް ހަތަރު ލަނޑު ޖެހީ ދެ ވަނަ ހާފުގަ އެވެ.

މެޗު ފަށައިގެން ދެ ވަނަ މިނެޓުގައި އެތުލެޓިކޯ އަށް ލީޑު ނަގައިދިނީ ފްރާންސްގެ އެންޓޮއިން ގްރީޒްމަން އެވެ. އެއީ ރޮޑްރިގޯ ޑިޕޯލް ތަނަވަސްކޮށްދިން ފުރުސަތެއްގައި ގްރީޒްމަން ޖެހި ލަނޑެކެވެ. އެތުލެޓިކޯގެ ދެ ވަނަ ލަނޑު، 16 ވަނަ މިނެޓުގައި ޖެހީ މެމްޕިސް ޑިޕާއީ އެވެ. އޭގެ ފަހުން 36 ވަނަ މިނެޓުގައި އެ ޓީމުގެ ތިން ވަނަ ލަނޑު ނަހުއެލް މޮލީނާ ޖެހީ ވެސް ޑިޕޯލް ތަނަވަސްކޮށްދިން ފުރުސަތެއްގަ އެވެ. ދެ ވަނަ ހާފުގައި އެތުލެޓިކޯގެ ހަތަރު ވަނަ ލަނޑު ޖެހީ އަލްވާރޯ މޮރާޓާާ އެވެ. އެއީ 73 ވަނަ މިނެޓުގައި ސައުލް ނިހުއޭޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން 79 ވަނަ މިނެޓުގައި އެންހެލް ކޮރެއާ ވަނީ އެތުލެޓިކޯގެ ފަސް ވަނަ ލަނޑު ޖަހައިފަ އެވެ. އޭގެ ފަހުން އެ ޓީމުން ވަނީ ދެ މިނެޓުގެ ތެރޭގައި ދެ ލަނޑު ޖަހައިފަ އެވެ. އެތުލެޓިކޯގެ ހަ ވަނަ ލަނޑު 84 ވަނަ މިނެޓުގައި ޖެހީ މޮރާޓާ އެވެ. އޭގެ ފަހުން 86 ވަނަ މިނެޓުގައި ހަތް ވަނަ ލަނޑު ޖެހީ މާކޮސް ލޮރެންޓޭ އެވެ.

މިއީ އައު ސީޒަންގެ ސްޕެނިޝް ލީގުގައި އެތުލެޓިކޯ އިން ކުޅުނު ތިން ވަނަ މެޗެވެ. ތިން މެޗުގެ ތެރެއިން އެ ޓީމު ވަނީ ދެ މެޗުން މޮޅުވެފަ އެވެ. އަނެއް މެޗު ނިމުނީ އެއްވަރުވެގެންނެވެ. ޖުމުލަ ހަތް ޕޮއިންޓާއެކު އެތުލެޓިކޯ އޮތީ ދެ ވަނައިގަ އެވެ. ލީގުގައި ދެން އެ ޓީމަށް އޮންނާނީ އަމިއްލަ ދަނޑުގައި ސެޕްޓެމްބަރު މަހުގެ ތިން ވަނަ ދުވަހު ސެވިއްޔާއާ ދެކޮޅަށް ކުޅޭ މެޗެވެ.