ފާރިސް އިންތިޚާބުގައި ވާދަކުރައްވަނީ ވޯޓު ބައިބައި ކުރެއްވުމަށް، އެމްއާރްއެމްގެ ހުރިހާ މެންބަރުން އެމްޑީޕީއާއެކު މަސައްކަތް ކުރުމަށް ގޮވާލަން: ފައިސަލް
27 އޯގަސްޓު 2023 | އާދީއްތަ 10:26އެމްޑީޕީއާއެކު މުސްތަގުބަލެއް އެބައޮތް
މުހައްމަދު ފައިސަލް އެމްޑީޕީއަށް ސޮއިކުރައްވައި ފޯމް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުއާ ހަވާލުކޮށްދެއްވަނީ
ކުރިއަށް އޮތް ރިޔާސީ އިންތިޚާބުގައި އެމްއާރުއެމްގެ ރައީސް އަހްމަދު ފާރިސް މައުމޫން ވާދަކުރައްވަނީ ވޯޓު ބައިބައި ކުރެއްވުމަށް ކަމަށާއި، އެމްއާރްއެމްގެ ހުރިހާ މެންބަރުން އެމްޑީޕީއާއެކު މަސައްކަތް ކުރުމަށް އެމްއާރްއެމްގެ ފުރަތަމަ ކައުންސިލްގައި މަސައްކަތް ކުރެއްވި މުހައްމަދު ފައިސަލް ގޮވާލައްވައިފިއެވެ.
ފާރިސް އިންތިޚާބުގައި އަމިއްލަ ގޮތުން ވާދަކުރައްވާއިރު، އެމްއާރުއެމް އުވާލުމުގެ މައްސަލަ މިވަގުތު އޮތީ ކޯޓުގައެވެ.
ރާއްޖެއެމްވީއަށް ފައިސަލް ވިދާޅުވީ ފާރިސް އިންތިޚާބަށް ކުރިމަތިލައްވައި ކެމްޕޭން ކުރައްވަނީ ރިޔާސީ ކެމްޕޭނެއް ނޫން ކަމަށެވެ. އެއީ ކުރިއަށް އޮތް ރައްޔިތުން މަޖިލީހަށް ވާދަކުރައްވަން ނިންމަވާފައިތީ ކުރާ ކެންޕޭނެއް ކަމަށް އޭނާ ވިދާޅުވިއެވެ. އަދި ވިދާޅުވީ އެމްއާރްއެމްގެ ހުރިހާ މެންބަރުން މިސަރުކާރާއެކު ނުކުތުމަށް އެދިވަޑައިގަންނަވާ ކަމަށާއި، އެމްޑީޕީއާއެކު މުސްތަގުބަލެއް އެބައޮތް ކަމަށެވެ.
އަބޫދާބީގެ ޑެޕިއުޓީ އެމްބެސަޑަރުކަން ވެސް ކުރައްވަމުން ގެންދަވާ ފައިސަލް ވިދާޅުވީ ރައްޔިތުންނާއި ގާތުން މަސައްކަތް ކުރައްވާ ހަމައެކަނި ކެންޑިޑޭޓަކީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ކަމަށެވެ. އަދި ރައްޔިތުން އެދޭ ތަރައްގީއާއި ވެވަޑައިގަންނަވާ ވައުދުފުޅު ފުއްދަވާ ހަމައެކަނި ރައީސްއަކީ، ރައީސް ސާލިހު ކަމަށެވެ.
މީގެ އިތުރުން ހޮނިހިރު ދުވަހުގެ ރޭ ފައިސަލްއާއެކު 77 މެންބަރުން ވަނީ އެމްޑީޕީއަށް ސޮއިކުރައްވާ ފޯމް ހަވާލުކުރައްވާފައެވެ.
