ތ. ވިލުފުށީގެ އެއަރޕޯޓަށް ބޭނުންވާ ބިން ހިއްކާއިރު، ޕިކްނިކް ދިއުމަށް ވަކި ރަށެއް ހިއްކައި ދެއްވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވައުދުވެވަޑައިގެންފިއެވެ.

"އުފާވެރި އަމާންރާއްޖެ" ކެމްޕޭން ޖަލްސާއަށް ތ. ވިލުފުއްޓަށް ވަޑައިގެން ވާހަކަފުޅުދައްކަވަމުން ރައީސް ޞާލިހް ވިދާޅުވީ ރާއްޖޭގެ ރަށްރަށުގައި ކުރަންޖެހިފައިވާ ވަރަށް ގިނަ ކަންކަން އެބަހުރި ކަމަށެވެ. ފުދުންތެރިކަން އިތުުރުކުރުމަށް ކުރަންޖެހޭ ބައިވަރު ކަންކަން އެބަހުރި ކަމަށާއި، ކެމްޕޭން މި ކުރިއަށް ގެންދަނީ ތަސައްވުރަކާއެކީގައި ކަމަށެވެ.

ރައީސް ވިދާޅުވީ ވިލުފުށީގައި ހޮސްޕިޓަލެއް އަޅުއްވައިދެއްވާނެ ކަމަށް އެއްވެސް ވެރިޔަކަށް ވިދާޅު ނުވެވުނު ކަމަށާއި، އެ ވައުދުވީ އެމްޑީޕީގެ ސަރުކާރުން ކަމަށެވެ. އަދި އެ ވައުދު ފުއްދަވާނީ ވެސް އެމްޑީޕީގެ ސަރުކާރުން ކަމަށް ރައީސް ވިދާޅުވިއެވެ.

ވިލުފުއްޓަށް ރައީސް ވެވަޑައިގެންނެވި ވައުދުފުޅުތައް:

- އެއަރޕޯޓް ހިއްކާ އިރު ޕިކްނިކް ދިއުމަށް ވަކިން ފަޅުރަށެއް ހިއްކުން.

- ބަނދަރު އަލުން ހަދާ މައްސަލަ ހައްުލުކުރުން.

- ބާކީ ހުރި ހުިރހާ މަގެއްގައި ތާރު އެޅުން.

- ހޮސްޕިޓަލު އަޅާ ނިމެންދެން ސިއްހީ މަރުކަޒަށް، ކުޑަކުދިންނާއި އަންހެނުންގެ ޑޮކްޓަރުގެ ހިދުމަތް ލިބޭނެ ގޮތް ހެދުން.

ރައީސް ވަނީ ވިލުފުށީ ރައްޔިތުން ވިސްނާ ވަޑައިގެން ސަރުކާރާ އެކު ތިއްބެވުމަށް އެދިވަޑައިގަންނަވާފައެވެ. ރައީސް ވިދާޅުވީ ބައެއް މަސައްކަތް މަޑުޖެހިފައި ހުރެދާނެ ކަމަށާއި އެއީ ނުކުރާނެ ކަމެއް ނޫން ނޫން ކަމަށެވެ.

ރައީސް ވަނީ އިންތިހާބު އޮންނަ ދުވަހު ވިލުފުށީ ރައްޔިތުން ނުކުމެ ނިންމަވަން ޖެހެނީ ވަރަށް މުހިންމު ނިންމުމެއް ކަަމަށެވެ. އެއީ ވަރަށް ވިސްނުންތެރިކަމާއެކު ނިންމަންޖެހެ ނިންމުމެއް ކަމަށާއި، ނިންމުން ނިންމަންޖެހެނީ އެ ނިންމުމުގެ ސަބަބުން ތިމާއަށް ރަށަށް އަދި ގައުމަށް އަންނާނި ކޮން ބަދަލެއްތޯ ވިސްނާ ފިކުރު ކުރުމަށްފަހު ނިންމަންޖެހޭ ނިންމުމެއްގެ ގޮތުގައި ކަމަށް ރައީސް ވިދާޅުވިއެވެ.