މިދިޔަ އަހަރު އެންމެ ގިނައިން ހިނގާފައި ހުރީ އަލިފާނުގެ ހާދިސާތައް: ރެޑްކްރެސެންޓް
27 އޯގަސްޓު 2023 | އާދީއްތަ 06:29ގިނަ ހާދިސާތައް ހިނގާފައިވަނީ މާލެ ސަރަހައްދުގައި
ރެޑްކްރެސެންޓްގެ މެނޭޖަރު މުހައްމަދު އަދީލް ވާހަކަފުޅު ދައްކަވަނީ
މިދިޔަ އަހަރު އެންމެ ގިނައިން ހިނގާފައި ހުރީ އަލިފާނުގެ ހާދިސާތައް ކަމަށާއި، ގިނަ ހާދިސާތަކަކީ ފަރުވާ ކުޑަވުމުގެ ސަބަބުން ހިނގާފައިވާ ހާދިސާތައް ކަމަށް ދިވެހި ރެޑްކްރެސެންޓުން ބުނެފިއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ރެޑްކްރެސެންޓްގެ މެނޭޖަރު މުހައްމަދު އަދީލް ވިދާޅުވީ ހިނގާ ކާރިސާތަކަށް ބަލާއިރު، އެންމެ ގިނައިން ހިނގަނީ އަލިފާނުގެ ހާދިސާތައް ކަމަށާއި، މިދިޔަ އަހަރު ވަރަށް ގިނަ އަލިފާނުގެ ހާދިސާތައް ހިނގާފައިވާ ކަމަށެވެ. އަދި ގިނަ ހާދިސާތައް ހިނގާފައިވަނީ މާލެ ސަރަހައްދުގައި ކަމަށާއި، ގިނަ ހާދިސާތަކަކީ ފަރުވާ ކުޑަވުމުގެ ސަބަބުން ހިނގާފައިވާ ހާދިސާތައް ކަމަށް އޭނާ ވިދާޅުވިއެވެ.
ބައެއް ހާދިސާތައް ހިނގާފައިވާ ގޮތްތަކަށް އިޝާރާތް ކުރައްވައި އަދީލް ވިދާޅުވީ ސިގިރޭޓުގެ ސަބަބުންނާއި، އުދުން ހަނދާންނެތި ނިއްވާނުލެވުމާއި، ގޭސް ލީކުވެފައި ހުރުމުން އަލިފާނުގެ ހިތާމަވެރި ބޮޑެތި ހާދިސާތައް ހިނގާފައިވާ ކަމަށެވެ. އަދި ހުޅުމާލޭގެ ދެވަނަ ފިޔަވަހީގެ އިމާރާތްކޮށްފައިވާ ހިޔާ ފްލެޓްތަކުގައި ވެސް ބައެއް އަލިފާނުގެ ހާދިސާތައް ހިނގާފައިވަނީ ސިގިރޭޓްގެ ސަބަބުން ކަމަށް އޭނާ ވިދާޅުވިއެވެ.
އަލިފާނުގެ ހާދިސާތަކަށް ހޭލުންތެރިކުރުމުގެ ޕްރޮގްރާމްތައް ކުރިއަށް ގެންދާކަން ފާހަގަކުރައްވައި އަދީލް ވިދާޅުވީ އޮކްޓޫބަރު މަހުގެ ތެރޭގައި ހިޔާ ފްލެޓްތަކުގެ ސަރަހައްދުގައި ޚާއްސަ ޑްރިލެއް ކުރިއަށް ގެންދާނެ ކަމަށެވެ. މި ޑްރިލްގައި އަލިފާނުގެ ހާދިސާއެއް ހިނގާފިނަމަ ޓަވަރުތަކުން މީހުން ނެރޭނެ ގޮތާއި، ފަރުވާ ދޭނެ ގޮތްތައް ކުރިއަށް ގެންދާނެ ކަމަށް އޭނާ ވިދާޅުވިއެވެ. މިހާރު މިޑްރިލް ކުރިއަށް ގެންދިއުމަށް ކަމާބެހޭ ފަރާތްތަކާއެކު މަޝްވަރާތައް ކުރިއަށްދާ ކަމަށް އަދީލް ވިދާޅުވިއެވެ.
ރެޑްކްރެސެންޓުން ދަނީ އަލިފާނުގެ ހާދިސާތަކަށް މީހުން ހޭލުންތެރިކުރުވުމަށް މާލޭގެ އިތުރުން އަތޮޅުތެރޭގައި ތަފާތު ޕްރޮގްރާމްތައް ހިންގަމުންނެވެ. މީގެ އިތުރުން ހާލުގައި ޖެހޭ އާއިލާތަކަށް އެހީތެރިކަން ފޯރުކޮށްދިނުމާއި ހާދިސާއަކާ ގުޅިގެން އާއިލާއަކަށް ދޭން ޖެހޭ ނަފްސާނީ އެހީތެރިކަން ވެސް ފޯރުކޮށްދެއެވެ.
