ބޯންމައުތު ބަލިކޮށް ޓޮޓެންހަމް ކުރިއަށް

އިނގިރޭސި ޕްރިމިއާ ލީގުގައި ބޯންމައުތާ ދެކޮޅަށް ކުޅުނު މެޗުން މޮޅުވެ ޓޮޓެންހަމް ކުރިއަށް ޖެހިލައިފި އެވެ.

ހޮނިހިރު ދުވަހުގެ ރޭ ބޯންމައުތުގެ ދަނޑުގައި ކުޅުނު މެޗު ޓޮޓެންހަމުން ކާމިޔާބު ކުރީ 2-0 އިންނެވެ. މިއީ މި ސީޒަންގެ ލީގުގައި ޓޮޓެންހަމް ކުޅުނު ތިން ވަނަ މެޗެވެ. ދެ މެޗުން އެ ޓީމު މޮޅުވެފައިވާއިރު، އެއް މެޗު ނިމުނީ އެއްވަރުވެގެންނެވެ.

މެޗުގައި ޓޮޓެންހަމުން ލަނޑު ޖަހައި ލީޑު ނެގީ 17 ވަނަ މިނެޓުގަ އެވެ. ޕޭޕް މަޓާ ސާ ހުރަސްކޮށްދިން ބޯޅައެއް ބޯންމައުތުގެ ގޯލު އޭރިޔާ ތެރޭގައި ހުރެ ތިރި ތިރިން ގޯލަށް ވައްދާލައިގެން އެ ޓީމަށް ލީޑު ނަގައިދިނީ ޖޭމްސް މެޑިސަން އެވެ. ބޯންމައުތުގެ ގޯލް ކީޕަރުގެ އަތް ކައިރިން މެޑިސަން ފޮނުވާލި ބޯޅަ ހުއްޓުވުމަށް ކީޕަރަށް މާ ބޮޑު މަސައްކަތެއް ވެސް ނުކުރެވުނެވެ. ޓޮޓެންހަމްގެ ދެ ވަނަ ލަނޑު އެ ޓީމުން ޖެހީ ދެ ވަނަ ހާފުގަ އެވެ. 63 ވަނަ މިނެޓުގައި ޑެސްޓިނީ އުޑޯގީ ރޮނގު މަތިން ހުރަސްކޮށްދިން ބޯޅަ ގޯލަށް ވައްދާލައިގެން އެ ޓީމުގެ ދެ ވަނަ ލަނޑު ޖެހީ ޑެހާން ކުލުސެވްސްކީ އެވެ.

މޮޅާއެކު މި ވަގުތު ޔުނައިޓެޑު އޮތީ ތިން މެޗުން ހަތް ޕޮއިންޓު ހޯދައިގެން ދެ ވަނައިގަ އެވެ. އެއް ވަނައިގައި އޮތް ވެސްޓް ހޭމް ޔުނައިޓެޑާ، ތިން ވަަނައިގައި އޮތް އާސެނަލަށް ވެސް ލިބެނީ ހަތް ޕޮއިންޓެވެ. ލީގުގައި ދެން ޓޮޓެންހަމަށް އޮންނާނީ ސެޕްޓެމްބަރު މަހުގެ ދެ ވަނަ ދުވަހު ރަށުން ބޭރުގައި ބާންލީއާ ދެކޮޅަށް ކުޅޭ މެޗެވެ. އޭގެ ކުރިން އޯގަސްޓު މަހުގެ 29 ވަނަ ދުވަހު ކަރަބޯ ކަޕްގެ ދެ ވަނަ ބުރުގައި އެ ޓީމު ނުކުންނާނީ ފުލަމްއާ ދެކޮޅަށެވެ.