ސޮން، ޓޮޓެންހަމް ދޫކޮށްލަން ނިންމައިފި

ޓޮޓެންހަމަށް ކުޅެމުން އައި ސައުތު ކޮރެއާގެ ސޮން ހެއުން މިން، އެ ކުލަބު ދޫކޮށްލަން ނިންމައިފި އެވެ.

އުމުރުން 33 އަހަރުގެ ކުޅުންތެރިޔާ، ބަޔާ ލެވަކޫސަން ދޫކޮށްލުމަށް ފަހު ސޮން ޓޮޓެންހަމް އަށް ބަދަލުވީ 2015 ވަނަ އަހަރު އެވެ. އެ ކުލަބާ އެކު އެންމެ ފަހުން ސޮން ސޮއި ކޮށްފައިވާ އެއްބަސްވުމުގެ މުއްދަތު ހަމަވާން އޮތީ 2026 ވަނަ އަހަރު އެވެ.

ނަމަވެސް، އެއްބަސްވުމުގައި ބާކީ އެއް އަހަރު އޮއްވައި ސޮން ވަނީ ޓޮޓެންހަމް ދޫކޮށްލަން ނިންމާފައިވާކަން އެ ކުލަބުގެ އިސްވެރިންނަށް އަންގައިފަ އެވެ. މީގެ އިތުރުން ސޮން ވަނީ އޭނާގެ ނިންމުން، ޓޮޓެންހަމްގެ އައު ކޯޗު ތޯމަސް ފްރޭންކްއާ ވެސް ހިއްސާ ކޮށްފަ އެވެ.

ޓޮޓެންހަމް ދޫކޮށްލަން ނިންމުމަށް ފަހު ވާހަކަ ދައްކަމުން ސޮން ބުނެފައި ވަނީ، އޭނާގެ ނިންމުން ކުލަބުގެ އިސްވެރިންނާ ވެސް މިހާރު ހިއްސާ ކޮށްފައި ވާނެ ކަމަށެވެ. އަދި ޓޮޓެންހަމްގައި ހޭދަ ކުރި މުއްދަތުގެ ތެރޭގައި އޭނާ އެންމެ ފުރިހަމަ އަށް މަސައްކަތް ކޮށްފައި ވާނެ ކަމަށާއި، ކެރިއަރުގައި މިހާރު ބޭނުން ވަނީ އައު ޗެލެންޖެއް ކަމަށް ސޮން ބުންޏެވެ.

މީގެ އިތުރުން ސޮން ބުނީ އޭނާ ޓޮޓެންހަމް ދޫކޮށްފައި ދަނީ، ގިނަ ކަންތައްތަކެއް ޙާސިލު ކުރުމަށް ފަހު ކަމަށެވެ. އެގޮތުން ފާއިތުވި މުއްދަތުގެ ތެރޭގައި އޭނާ އަށް އެހީތެރިކަން ދިން ކުޅުންތެރިންނާއި، ކޯޗިން އޮފިޝަލުންނާއި، ކުލަބުގެ ވެރިން އަދި އެންމެހާ ސަޕޯޓަރުންނަށް ޚާއްސަ ޝުކުރެއް އޮތް ކަމަށް ސޮން ވަނީ ފާހަގަ ކޮށްފަ އެވެ.

ޓޮޓެންހަމްގައި ސޮން ހޭދަ ކުރި 10 ސީޒަންގެ ތެރޭގައި އޭނާ ވަނީ އެ ކުލަބަށް 454 މެޗު ކުޅެދީ 173 ލަނޑު ޖަހައިފަ އެވެ. މީގެ އިތުރުން ޓޮޓެންހަމާ އެކު އޭނާ ވަނީ ޔުއެފާ ޔޫރޮޕާ ލީގު ކާމިޔާބު ކޮށްފަ އެވެ. އޭގެ އިތުރުން ޔުއެފާ ޗެމްޕިއަންސް ލީގުގެ ފައިނަލް އަދި ކަރަބޯ ކަޕްގެ ފައިނަލްގައި ވެސް ކުޅެފައިވެ އެވެ.

މީޑިއާ ތަކުގައި ބުނެފައިވާ ގޮތުން މޭޖާ ލީގު ސޮކާ (އެމެރިކާ ލީގު)ގެ ލޮސް އެންޖަލަސް އިން އަންނަނީ ސޮން ހޯދުމުގެ މަސައްކަތް ކުރަމުންނެވެ. އެކަމުގެ މަޝްވަރާތަކެއް ވެސް ކުރެވެމުން އަންނަ ކަމަށް މީޑިއާ ތަކުގައި ވަނީ ބުނެފަ އެވެ.

މީގެ އިތުރުން ސައުދީ އަރަބިއްޔާގެ، ސައުދީ ޕްރޯ ލީގުގެ ބައެއް ކުލަބުތަކުން ވެސް ސޮން ހޯދުމުގެ ޝައުޤުވެރިކަން ގެންގުޅެމުން އަންނަ ކަމަށް ވަނީ ރިޕޯޓު ކޮށްފަ އެވެ. ޓޮޓެންހަމް ދޫކޮށްލަން ސޮން ނިންމިއިރު، އޭނާ އަކީ އެ ކުލަބުގެ ކެޕްޓަން އެވެ.