ނިއުރޭޑިއަންޓް ސްޕޯޓްސް ކުލަބުން މި އަހަރުގެ ސީޒަނަށް ތައްޔާރުވުމަށް މާދަމާ ރޭ ޕްރެކްޓިސް ފަށަން ނިންމައިފިއެވެ.
ދެވަނަ ޑިވިޝަނުގައި ވާދަކުރަން ތައްޔާރުވާ ރާއްޖޭގެ އެންމެ ކާމިޔާބު ކުލަބުން ނެރުނު ބަޔާނުގައި ބުނެފައިވަނީ, ޕްރެކްޓިސް ފަށާއިރު އެކުލަބާ ގުޅެން ބޭނުންވާ ކުޅުންތެރިންނަށް ފުރުސަތުދޭނެ ކަމަށެވެ. މި ގޮތުން ނިއުއަށް ކުޅެން ޝައުގުވެރިވާ ކުޅުންތެރިން މާދަމާ ރޭ 20:45ށް ޓާފް ދަނޑަށް އައުމަށެވެ.
ފީފާއާއި އެފްއޭއެމުގެ ސަސްޕެންޝަނެއްގެ ސަބަބުން ފުރަތަމަ ޑިވިޝަނުން ފުރުސަތު ގެއްލުނު ނިއު އަލުން ފުރަތަމަ ޑިވިޝަނަށް އެރުމަށް މަސައްކަތް ފެށީ މިދިޔަ އަހަރުއެވެ. އެކަމަކު ދެވަނަ ޑިވިޝަނުގެ ސެމީ ފައިނަލުން ކެޓީއެވެ. ނަމަވެސް ކުރިއަށް އޮތް ސީޒަނަށް ނިއުއަށް ވަނީ ދިވެހި އަދި ބިދޭސީ މޮޅު ކުޅުންތެރިން ހޯދައި ޓީމު ވަރުގަދަކޮށްފައެވެ. އާ ސީޒަނަށް ޓީމުގެ ކޯޗަކަށް ހުންނާނީ މިދިޔަ އަހަރުގެ ދެ ވަނަ ޑިވިޝަނުގެ ޗެމްޕިއަންކަން ބުރު ސްޕޯޓްސް ކުލަބަށް ހޯދައިން ކޯޗު އީގަލްސްގެ މުހައްމަދު ނިމާދެވެ.
ފުރަތަމަ ޑިވިޝަނަށް އެރުމަށް ނިއުއާ އެންމެ ވާދަކުރާނެ ކަމަށް ބެލެވެނީ ރާއްޖޭގެ އެންމެ ކާމިޔާބު އެއް ޓީމު ކަމަށްވާ ވިކްޓަރީ ސްޕޯޓްސް ކުލަބާއި އަސްއަދު އަލީ (އަޑުބަރޭ)ގެ ބެލުމުގެ ދަށުން ހިންގާ ލެގޫންސް ސްޕޯޓްސް ކުލަބެވެ.
ދެވަނަ ޑިވިޝަން ކުޅެން އެފްއޭއެމުން ހަމަޖައްސާފައިވަނީ އަންނަ އޮކްޓޫބަރު މަހުއެވެ.
